Բազմավաստակ Հ.Մ.Ը.Մ.-ական Բիւզանդ Թորիկեան Ոչ Եւս Է

ՊԷՅՐՈՒԹ.- Երեքշաբթի, Դեկտեմբեր 6-ին, կեանքէն հեռացաւ բազմավաստակ Հ.Մ.Ը.Մ.-ական Բիւզանդ Թորիկեան, որ կը նկատուի Հ.Մ.Ը.Մ.-ի սփիւռքեան գործունէութեան երկրորդ սերունդի ամէնէն կարկառուն դէմքերէն մէկը: Անոր վիճակուած էր, հաւատաւոր այլ Հ.Մ.Ը.Մ.-ականներու հետ, Հ.Մ.Ը.Մ.-ը համագաղութային կազմակերպութեան վերածելու պատասխանատու աշխատանքը: Ան ծնած էր Հալէպ, 1932-ին եւ փոքր տարիքէն փոխադրուած՝ Լիբանան: Թորիկեան Հ.Մ.Ը.Մ.-ին մաս կը կազմէ 1943-ին, Պէյրութի Ս. Նշան վարժարանի աշակերտութեան օրերուն, շնորհիւ հանրածանօթ Հ.Մ.Ը.Մ.-ական Լեւոն Աբգարեանի: Այնուհետեւ, ընտանեօք ան կը փոխադրուի Ժունիէ, ուր 1951-ին կը հանդիսանայ Հ.Մ.Ը.Մ.-ի Ժունիէի մասնաճիւղի հիմնադիրներէն: Մինչեւ 1957 մաս կը կազմէ Հ.Մ.Ը.Մ.-ի Ժունիէի մասնաճիւղի յաջորդական վարչութիւններուն, ապա Պէյրութ հաստատուելով` վարչական գործունէութիւնը կը շարունակէ Հ.Մ.Ը.Մ.-ի Պէյրութի մասնաճիւղին մէջ, 1958-1968 ստանձնելով մասնաճիւղին վարչութեան ատենադպրութեան պաշտօնը: Բիւզանդ Թորիկեան 1958-ին կը պսակուի Տիգի Չպուքճեանի հետ եւ կը բախտաւորուի չորս զաւակով: Ան յանձնառու մասնակցութիւն կ՛ունենայ լիբանանահայ ազգային կեանքին` բազմիցս մաս կազմելով Լիբանանի հայոց թեմի Ազգային երեսփոխանական ժողովին եւ Ազունիէի խնամակալութեան: Բիւզանդ Թորիկեանի նախասիրութիւնը եղած է աթլեթիզմը: Ան տիրացած է աթլեթիզմի միջազգային իրաւարարի տիտղոսին: Իբրեւ Հ.Մ.Ը.Մ.-ի ներկայացուցիչ, 1965-ին եղած է լիբանանեան աթլեթիզմի ֆետերասիոնի հիմնադիր անդամներէն մէկը, նաեւ` գլխաւոր հիմնադիրներէն ԼԵՎԱՄ-ի մարզախաղերուն: 1969-ին, Բիւզանդ Թորիկեան ընտրուած է անդամ Հ.Մ.Ը.Մ.-ի Մերձաւոր Արեւելքի Շրջանային վարչութեան, որ օրին կը նկատուէր միութեան գերագոյն մարմինը, տրուած ըլլալով, որ ան կը ղեկավարէր Հ.Մ.Ը.Մ.-ի Սուրիոյ, Լիբանանի եւ Յորդանանի մասնաճիւղերը: 1969-1974 Մերձաւոր Արեւելքի Շրջանային վարչութեան մաս կազմելէ ետք, 1974-ին, Հ.Մ.Ը.Մ.-ի Պատգամաւորական առաջին ընդհանուր ժողովին, Բիւզանդ Թորիկեան կ՛ընտրուի Հ.Մ.Ը.Մ.-ի անդրանիկ Կեդրոնական վարչութեան անդամ: Հետագային, ան կը վերընտրուի 1979-ին եւ 1983-ին: Այսպէս, ան Հ.Մ.Ը.Մ.-ի համագաղութային բարձրագոյն մարմիններուն մաս կը կազմէ 1969-1987` 18 տարի անընդմիջաբար: 1999-ին, չորս տարուան համար, ան դարձեալ կ՛ընտրուի Հ.Մ.Ը.Մ.-ի Կեդրոնական վարչութեան անդամ եւ կը վարէ միութեան ատենապետի պաշտօնը: 1990-ականներու սկիզբը, Բիւզանդ Թորիկեան կը լծուի Հ.Մ.Ը.Մ.-ի հայանուէր գործունէութեան պատմագրութեան աշխատանքին եւ չորս հատորով կը հրատարակէ միութեան պատմութիւնը` նախահիմնադրութեան հանգրուանէն մինչեւ 21-րդ դարու սկիզբը: «Հայ մարմնակրթական ընդհանուր միութեան պատմութիւն» խորագրեալ իր ստուար աշխատասիրութիւնները լոյս կը տեսնեն 1995-ին, 1999-ին, 2003-ին եւ 2007-ին: Վերջին տարիներուն, Բիւզանդ Թորիկեան կը ձեռնարկէ Հ.Մ.Ը.Մ.-ի թանգարանի յուշամատեան-ալպոմի պատրաստութեան: Աշխատանքը գրեթէ հասած է աւարտին եւ հրատարակութեան կը ներկայանայ Հ.Մ.Ը.Մ.-ի 100-ամեակին առիթով: Համագաղութային իր պատասխանատուութիւններուն բերումով, Բիւզանդ Թորիկեան այցելած է սփիւռքեան գրեթէ բոլոր գաղութները եւ ամէնուրեք ունեցած է Հ.Մ.Ը.Մ.-ի գաղափարախօսութեան եւ ազգային-բարոյական արժէքներուն մասին ելոյթներ: Ան ներկայ գտնուած է Հ.Մ.Ը.Մ.-ի բոլոր Ընդհանուր ժողովներուն, բացի վերջինէն (2015): Յաճախ հանդէս եկած է բանախօսութիւններով եւ միութեան «Մարզիկ» պաշտօնաթերթին աշխատակցութիւններով: Երկար տարիներ մաս կազմած է «Մարզիկ»-ի խմբագրական եւ վարչական կազմերուն: 2004-ին, ան արժանացած է Հ.Մ.Ը.Մ.-ի բարձրագոյն` «Արժանեաց» շքանշանին: Բիւզանդ Թորիկեանի մահով Հ.Մ.Ը.Մ.-ը կը կորսնցնէ բազմավաստակ Հ.Մ.Ը.Մ.-ական մը, որուն բովանդակ կեանքը հայ մարմնակրթական շարժումին ճամբով բոլորանուէր ծառայութիւն մը եղաւ հայութեան եւ Հայաստանին:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Բազմավաստակ Հ.Մ.Ը.Մ.-ական Բիւզանդ Թորիկեան Ոչ Եւս Է

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Հարաւային Ափրիկէի Սիրոյ Պատգամը

ԳՈՅԺ

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է