0
0
Միացեալ Նահանգներու Արեւելեան թեմի Ազգային երեսփոխանական ժողովը, գումարեց իր 54-րդ ժողովը` Փրովիտէնսի մէջ, Մայիս 10-էն 12: Համաձայն տարիներու ընկալեալ սովորութեան, Թեմի Ազգային Վարչութեան զոյգ ժողովները` Կրօնական եւ Վարչական, գումարուեցան միասին, իսկ Կրօնական Ժողովը ունեցաւ առանձին եօթը նիստեր եւ խորհրդակցական հանդիպումներ, ինչպէս նաեւ հեռաձայնային ժողովներ` նախագահութեամբ Թեմի բարեջան Առաջնորդ Սրբազան Հօր:
Հովանաւորութեամբ շրջանի Սուրբ Վարդանանց եկեղեցւոյ եւ նախագահութեամբ Թեմի Բարեջան Առաջնորդ Օշական Արք. Չօլոյեանի, երեք օրերու վրայ տեւողութիւն ունեցող այս ժողովը քննարկեց Առաջնորդարանին, Կրօնական ժողովին ու Ազգային վարչութեան միամեայ աշխատանքներն ու արձանագրուած արդիւնքները:
Ներկայ էին ազգային երեսփոխաններուն մեծ մասը, հոգեւոր դասի անդամներ, ազգային վարչութեան անդամներ, հոգաբարձութեանց ներկայացուցիչներ եւ հրաւիրեալներ:
Կրօնական ժողովի նոր անդամ ընտրուեցաւ Տէր Կոմիտաս Աւագ Քհնյ. Պաղսարեան (Փրովիտէնս): Ազգային վարչութեան անդամ վերընտրուեցան Ստեփան Յակոբեան (Կրանիթ Սիթի), Յակոբ Անդրանիկեան (Ուայթընզվիլ, Մասաչուսէց), Ռաֆֆի Ուրլեան (Տիթրոյթ, Միշիկըն): Նոր անդամ ընտրուեցաւ Սարգիս Օհաննէսեան (Նիւ Ճըրզի):
Մշակուեցաւ յառաջիկայ տարուան ծրագիրը, ապա կատարուեցան կրօնական ժողովի եւ ազգային վարչութեան ընտրութիւնները:
Անցեալ տարուայ տեղեկագրին մէջ, նշուած է թէ Առաջնորդ Սրբազան Հայրը կանոնաւոր եւ հետեւողական կերպով կապ պահած է Արամ Ա. Վեհափառ Հայրապետին հետ` նամակագրութեամբ եւ հեռաձայնային հաղորդակցութեամբ:
Անցնող տարեշրջանի ընթացքին Սրբազան Հայրը երեք առիթներով գտնուած է Վեհարան: Միասնաբար քննուած են զանազան հարցեր: Մարտ 7-21-ին, Սրբազան Հայրը ընկերակցութեամբ Ազգային Կեդրոնական Վարչութեան անդամ Տոքթ. Տրդատ Մանկիկեանին եւ Տիար Ճէք Մարտոյեանին, Անթիլիասի մէջ մասնակցեցաւ Ազգային Կեդրոնական Վարչութեան լիակատար նիստերուն եւ Կիլիկիոյ Կաթողիկոսութեան առաջնորդներու եւ Թեմական ներկայացուցիչներու ժողովին: Առանձնապէս քննարկուեցան Թեմի կապուած հարցեր եւ Վեհափառ Հայրապետին Հոկտեմբեր 2012-ին Թեմի տալիք հովուապետական այցելութեան առնչուած մանրամասնութիւնները: Նաեւ, Առաջնորդ Սրբազան Հայրը մնայուն կապի մէջ մնաց Ամենայն Հայոց Կաթողիկոս Նորին Սուրբ Օծութիւն Տ. Տ. Գարեգին Բ. Հայրապետին հետ, քննարկելով Հայ Եկեղեցւոյ ներկայ կացութեան դիմագրաւած մարտահրաւէրները եւ ծիսական ու կանոնական հարցերը:
Մեծի Տանն Կիլիկիոյ Կաթողիկոսութիւնը եւ Ամերիկայի Արեւելեան Թեմը բծախնդրութեամբ առաջ կը տանին միջ-եկեղեցական յարաբերութիւններ: Անցնող տարուան ընթացքին այդ յարաբերութիւնները պահուեցան կանոնաւոր կերպով` Առաջնորդ Սրբազան Հօր ջանքերով ու մանաւանդ Թեմի Առաջնորդական Փոխանորդ` Գերաշնորհ Տ. Անուշաւան Եպիսկոպոս Դանիէլեանի աշխատանքով, որ իր Առաջնորդական Փոխանորդի պաշտօնին առընթեր Մեծի Տանն Կիլիկիոյ Կաթողիկոսութեան միջ-եկեղեցական յարաբերութեանց ներկայացուցիչն է Ամերիկայի Միացեալ Նահանգներուն մէջ եւ կը մասնակցի Համաշխարհային Եկեղեցիներու Խորհուրդի Ամերիկայի բաժանմունքի` WCC-ի Faith and Order Commission-ի ժողովներուն:
Առաջնորդ Սրբազան Հայրը ներկայացնելով Մեծի Տանն Կիլիկիոյ Կաթողիկոսութիւնը, Օգոստոս 24-29, 2011-ին մասնակցեցաւ Ասսիզիի (Իտալիա) մէջ գումարուած միջ-կրօնական “Խաղաղութիւն եւ Արդարութիւն Համագումար“ին, հրաւէրովը քահանայապետ Բենետիկտոս 16-րդի: Աշխարհի բոլոր կրօններու ներկայացուցիչներուն հետ, աղօթական պահերով եւ մարդկութեան եղբայրութեան սկզբունքներով, բոլոր ներկաները շեշտեցին կարեւորութիւնը խաղաղ գոյակցութեան, արդարութեան հաստատման եւ փոխադարձ յարգանքի:
Արեւելեան Ամերիկայի եւ Գանատայի Թեմերուն մէջ ծառայող հոգեւորականներու Սրբոց Ղեւոնդեանց տօնի միացեալ համագումարը տեղի ունեցաւ Փետրուար 13-16, 2012-ին, նախագահութեամբ` Առաջնորդ` Բարձրաշնորհ Տ. Օշական Ս. Արքեպիսկոպոս Չօլոյեանի եւ Գանատայի Թեմին Առաջնորդ` Բարձրաշնորհ Տ. Խաժակ Ս. Արքեպիսկոպոս Յակոբեանի, եւ հիւրընկալութեամբ` Նիւ Ճըրզիի Սրբոց Վարդանանց Եկեղեցւոյ Հովիւին ու Հոգաբարձութեան: Համագումարի խորհրդածութեան գլխաւոր նիւթն էր Նորին Սուրբ Օծութիւն Տ. Տ. Արամ Ա. Վեհափառի հայրապետական պատգամը, որով 2012 թուականը կը հռչակէր “Հայ Գիրքի Տարի“: Քննարկուեցան նաեւ հովուական կեանքի հետ առնչուած զանազան հարցեր եւ մտահոգութիւններ:
Թեմի մէջ ծառայող եկեղեցականներու չորրորդ հոգեւոր հաւաքը տեղի ունեցաւ Հոկտեմբեր 9-12 , 2011-ին, Ղպտի Եկեղեցւոյ Սուրբ Կոյս Մարիամ հոգեւոր կեդրոնին մէջ (Չարլթըն, Մասաչուսէց), մասնակցութեամբ Թեմի եկեղեցական հայրերուն:
Կրօնական եւ դաստիարակչական աշխատանքներն ու ծրագիրները կ՛իրականացուին Ազգային Առաջնորդարանի Կրօնական Դաստիարակութեան գրասենեակին կողմէ, որուն վարիչ քարտուղարն է Բարեշնորհ Շանթ Աւագ Սարկաւագ Գազանճեանը: Կրօնական դաստիարակութիւնը կը հանդիսանայ Առաջնորդարանի կարեւոր առաքելութիւններէն մէկը, որուն համար թէ՛ Առաջնորդարանը եւ թէ՛ մեր բոլոր համայնքները կը գործադրեն ու կ՛իրականացնեն ծրագրուած բոլոր աշխատանքները: Ըլլա՛յ Աւետարանի ճշմարտութեանց տարածումը եւ այս նպատակով նուիրեալ անձերու պատրաստութիւնը, ըլլա՛յ պատանիներու մօտ հաւատքի ներարկումը եւ ըլլա՛յ գործնական նպատակներով օգտակար գիրքերու հրատարակութիւնը կորիզը կը կազմեն այն կենսական աշխատանքին, որով Թեմ կը ջանայ քրիստոնէական հաւատքը վառ պահել եւ տարածել մեր հաւատացեալներուն մէջ:
Կիրակի, Մարտ 25-ին, Նիւ Եորքի մէջ նշուեցաւ Առաջնորդական Փոխանորդ Գերշ. Տ. Անուշաւան Եպիսկոպոս Դանիէլեանի քահանայական ձեռնադրութեան 40-ամեակը: 1984-ին Միացեալ Նահանգներ ժամանելէ ի վեր, Անուշաւան Սրբազան հոգեւորական, մտաւորական եւ անձնական իր ձիրքերը ի սպաս դրած է մեր թեմին: Անոր գործունէութիւնը միշտ բարձր գնահատուած է հաւատացեալներուն կողմէ, որոնք փութացած էին խուռներամ ներկայ գտնուելու թէ՛ Ս. Պատարագի արարողութեան Տակլըսթընի Ս. Սարգիս եկեղեցւոյ մէջ, որուն հոգեւոր հովիւը եղած էր Անուշաւան Սրբազան իր վարդապետութեան շրջանին, եւ թէ՛ յոբելինական ճաշկերոյթի մը` Terrace on the Park ճաշարանի շքեղ վերնայարկին մէջ (Ֆլաշինկ, Նիւ Եորք): Շնորհաւորանքի ու գնահատանքի իր խօսքը բերաւ նաեւ Միացեալ Ազգերու Կազմակերպութեան մօտ Հայաստանի մշտական ներկայացուցիչ` դեսպան Կարէն Նազարեանը: Ցուցադրուեցաւ յատուկ տեսերիզ մը` յոբելեարի կեանքին ու վաստակին մասին:
Հրամանաւ եւ կարգադրութեամբ Թեմի Առաջնորդ Հօր եւ հաւանութեամբ Առաջնորդարանիս Ազգային Վարչութեան, Տ. Հրանդ Քահանայ Գէորգեան ստանձնեց Րէյսինի Սուրբ Յակոբ Եկեղեցւոյ եւ Ուոքիկընի Ս. Պօղոս Եկեղեցւոյ հոգեւոր հովիւի իր պաշտօնը Նոյեմբեր 1, 2011-ին:
Ս. Գրիգոր Տաթեւացի ամառնային լսարանի 25-րդ տարուան դասընթացքները տեղի ունեցան Յուլիս 3-10, 2011-ին, Էլվըրսըն, Փենսիլվանիայի մէջ: Տասը համայնքներէ եկած ուսանողներուն ընդհանուր թիւն էր 56:
Յուլիս 4-ին, Ամերիկայի Անկախութեան Տօնին առիթով, տեղի ունեցաւ աւանդական դաշտահանդէսը, որուն սեղանակից դարձան Առաջնորդ Սրբազան Հայրը, շրջանիս ազգայինները եւ համագումարի կեդրոնի բնակիչները: Քսան տարիներու գովելի սովորութեան համաձայն, ուսանողներու եւ կեդրոնի բնակիչներուն համար պատրաստուած համադամ ճաշերը պատրաստուած եւ նուիրուած էին Armenian Delight-ի սեփականատէր` Տիկին Աստղիկ Գազանճեանին կողմէ:
2011-ին Ս. Գրիգոր Տաթեւացի լսարանը բոլորեց իր 25-րդ ամեակը: Այս առիթով Առաջնորդ Սրբազան Հայրը նշանակած էր յանձնախումբ մը, բաղկացած լսարանի 20 շրջանաւարտներէ` գլխաւորութեամբ Տոքթ. Արսէն Միքայէլեանի եւ Տոքթ. Ճորճ Պէրպէրեանի: Արծաթեայ յոբելեանի տօնակատարութիւնը տեղի ունեցաւ Յուլիս 9, 2011-ին Ֆիլատելֆիայի Ս. Գրիգոր Լուսաւորիչ Եկեղեցւոյ սրահին մէջ:
Առաջնորդ Սրբազան Հայրը բարձր գնահատեց Առաջնորդական Փոխանորդ Անուշաւան Եպիսկոպոսի Տեսչական 25-ամեայ անմնացորդ ծառայութիւնը: Նոր Տեսուչ նշանակուեցաւ Տէր Նարեկ Քահանայ Թրթրեանը:
