0
0
Լուսանկարներ՝ Իննա Մխիթարեան
Իւրայատուկ թռիչք, տարբեր բնաշխարհ…դիտուած վերէն, բարձունքէն, այս պարագային հայրենի բարձրաւանդակէն: Երիտասարդ պարմանուհին կը պատրաստուի այս հմայիչ արկածախնդրութեան…
Յատկապէս այս ամիսներուն, Կովկասեան բարձրաւանդակի արեւաշոգ օրերուն, կ°արժէ դիմել նման արկածախնդրութեան… անշուշտ լաւապէս մարզուելէ ետք:
65 տարուայ պատմութիւն ունի Հայաստանի անկարգելաւորներու մարզաշխարհը: 2002էն ի վեր կը գործէ յատուկ համադաշնակցութիւն մը, որ օրինաւոր ձեւով կը կազմակերպէ սոյն «օդային» եւ «թռչնային» եզակի արշաւները, ներգրաւելով արկածախնդիր տեղացիներ եւ օտարներ:
Ընդհանրապէս Հայաստան այցելողը դէպի երկինք նայելով կը հմայուի բնութեան ստեղծած իրապաշտ եւ ակնթարթային տեսարաններով: Հակառակն ալ հետաքրքրական է կատարելը…Վերէն՝ երկնային կապոյտէն ակնդրել կանաչը՝ հայրենի լեռն ու ձորը, անտառն ու անծայրածիր այգեստանները…եւ անշուշտ համեմատաբար բաւական տարածութիւն գրաւած այլ «ցամաքային» կապոյտ մը՝ լազուարթ լիճը…Սեւանը:
Հայաստանի անկարգելաւորներու համադաշնակցութեան նախագահ Արմէն Իլիկչեան կը մնայ մրցանիշակիր, իր 4883 «թռիչքներ»ով: Հերթական դրութեամբ, ան կը կազմակերպէ խմբային «թռիչքներ»: Հոս, Արզնիի ռազմական օդակայանին մէջ, ան կը մարզէ երիտասարդ զինուորներ եւ պարզապէս «թռչնազգի» սիրահարներ:
Յունիս 10ին կատարուած այս փորձին կան անփորձներ, որոնց կարգին Դաւիթն ու Կարապետը: ԱՆոնք առաջին անգամ ըլլալով կը պատրաստուին հայրենի աշխարհը վերէն ըմբոշխնելու:
Երբ ուղղաթիռը արդէն իսկ ութ հարիւր մեթր բարձրութեան վրայ է, արդէն իսկ անկարգելաւորները լաւապէս պատսպարուած, յատուկ գլխարկներով օժտուած, ձեռքերու շարժումներով կը փորձեն զրուցել: Ապա կարճ ահազանգ մը եւ անկարգելաւորները շարք շարքի կը մօտենան դռան եւ կը թռչին դէպի երկինք…վերածուելով աննշմարելի կէտի..այդ անծայրածիր կապոյտին մէջ:
