0
0
Կիրակի, Հոկտեմբեր 27-ին, Հ.Բ.Ը.Մ.-ի կազմակերպութեամբ, Նիւ Եորքի Le Poisson Rouge սրահին, տեղի ունեցաւ իւրայատուկ երաժշտական երեկոյ մը, ի յիշատակ հայազգի հանրածանօթ թմբկահար Փօլ Մոթեանի, որուն մահուան երկրորդ տարելիցն է: Արդարեւ, Նոյեմբեր 22, 2011-ին, յետ ոսկրածուծի բարդոյթներու արդիւնք, ութսուն տարեկան հասակին, իր մահկանացուն կնքած էր հանրածանօթ թմբկահար Փօլ Մոթեանը (ծանօթ` Մոշըն հնչումով), սուգի մատնելով հարուածային գործիքներու աշխարհը:
Այս առթիւ, հրաւիրուած էր հարուածային գործիքներու մասնագէտ Արթօ Թիւնչպոյաճեան, որ նախապէս գործակցած էր Մոթեանի հետ: Անոր կողքին, ելոյթ ունեցան երիտասարդ ապագայ խոստացող արուեստագէտներ` Նորա Կարապետեան (բամբ ջութակ), Մայքըլ Սարեան (փող), Լիւսի Եղիազարեան (ջութակ եւ երգեցողութիւն) եւ Տաթեւ Եղիազարեան (դաշնակ եւ երգեցողութիւն):
Աւելի քան երեք հարիւր ներկաներ ըմբոշխնեցին հրամցուած յայտագիրը, որ կ՛ընդգրկէր Մոթեանի գործերէն մաս մը, յատկապէս “Քրենսթընի Բու“ (Owl of Cranston):
Հայոց Ցեղասպանութէնէն ճողոպրած եւ Քուպայի ճամբով Միացեալ Նահանգներ ժամանած ընտանիքի զաւակ է Ստեփան Պօղոս Մոթեանը: Ծնած Մարտ 25, 1931-ին Ֆիլատելֆիոյ մէջ եւ ապա փոխադրուած` Փրովիտէնս: 2004-էն ի վեր, Մոթեան կը մերժէր Նիւ Եորքէն հեռանալ եւ նոյնիսկ կարճ ճամբորդութիւններ կատարել: Մինչեւ վերջերս, ան կը շարունակէր իր ելոյթները, Նիւ Եորքի հանրածանօթ ճազի ակումբներուն մէջ, ընկերակցելով հոն ժամանող աստղերուն:
Նախապէս, փոքր տարիքին, կիթարի լարային աշխարհը զինք կը հետաքրքրէր, սակայն թմբուկն է որ եղած էր իր մասնագիտութիւնը:
Ան հռչակաւոր դաշնակահար Պիլ Էվընզի հետ գործակցած է, նաեւ բազմիցս ելոյթներ ունեցած դաշնակահար Քիթ Ճարէթի, Ճօ Լովանոյի, կիթարահար Պիլ Ֆրիզէլի, իտալացի դաշնակահար Էնրիքօ Փիեռանունսիի եւ այլոց հետ:
Հ.Բ.Ը.Մ.-ի պատասխանատուներէն Հայկ Արսէնեան յայտնեց, թէ այս ձեռնարկը յաջողութիւն մըն է, մանաւանդ որ ճազ բնագաւառէն ներս, համեմատաբար շատ համոյթներ չեն կազմակերպուիր:
