ԽՄԲԱԳՐԱԿԱՆ.- 95 ՏԱՐՈՒԱՅ ԱՆՆԱՀԱՆՋ ՊԱՀԱՆՋԱՏԻՐՈՒԹԻՒՆ

0 0
Read Time:1 Minute, 3 Second

Պահանջատիրութիւն, պահանջատէր… պահանջք:

Դժուար է նկարագրել նմանօրինակ կացութիւն:

Իսկ յատկապէս դժուար է յամառօրէն, կառչած մնալ այդ պահանջատիրութեան սկզբունքներուն վրայ, ամէնադոյզն զիջումն անգամ չկատարելով:

95 տարիէ հայորդին կառչած մնացած է, այս պահանջատիրութիւն կոչեցեալ արժանապատուութեան վրայ, վառ պահելով նահատակներուն թողած կտակին, արժանաւոր ժառանգորդութեան պաշտօնը` ցեղին ձայնը սփռող դաւանանքին հաւատարիմ մնալով:

Դեռ վերջերս, այդ նոյնինքն պահանջատիրութեան աննահանջ պայքարն է որ գործի լծեց հայորդին, անգամ մը եւս բուռն պայքար մղելու “ճանապարհային քարտէս” անունը կրող, եւ պարտադրանքի տակ կատարուած` Հայաստան-Թուրքիա արձանագրութիւններու ետին գտնուող մութ ձեռքերուն դէմ:

Ցեղասպանութիւն մը եւս պիտի կատարուէր հայ ժողովուրդին դէմ: Եւ դեռ ալ փորփեր ու ոտնձգութիւններ կրնան կատարուիլ: Ահա թէ ինչո՞ւ.-

Առանց պահանջատիրութեան, հայուն հաւատքը կը պարպուի իր զօրութենէն:

Առանց պահանջատիրութեան, հայուն յոյսը կ’իմաստազրկուի իր յատկութենէն:

Առանց պահանջատիրութեան, հայուն սէրը կը վերածուի զգացական վիճակի, հեռու` պայքարի, կամքի եւ արդարութեան ոգիէն:

Եղեռնի այդ ահաւոր, սրտաճմլիկ եւ ողբերգական տեսարաններուն, մահուան կապանքներէն, հալածանքի շղթաներէն եւ ջարդի դառնալի գողգոթայէն վերապրած, մազապուրծ փրկուած հայորդիներ` յարութեան վկաներ դարձան, մահ կոչեցեալ սարսափին դէմ պայքարելով, յաղթական դուրս եկան եւ կոչուեցան լոյսի, վրէժխնդրութեան եւ պահանջատիրութեան որդիներ:

Չվհատինք… Մօտալուտ է Հայոց Ցեղասպանութեան ճանաչման գործընթացի վերջնական իրագործումը: Իսկ այս գործընթացին կը յաջորդէ այլ հանգրուան մը` հողահաւաքին եւ ազգահաւաք: Ցեղասպանութեան ճանաչման անմիջականօրէն կապուած է հատուցման հարցը, որ իրողութեան մէջ իրաւազրկուած հայ ժողովուրդի արդարութեան վերականգման այդ յաջորդ հանգրուանն է:

ՀԱՅՐԵՆԻՔ
Ապրիլ 21, 2010

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles