Ուաշինկթընի Մէջ` Արեւելեան Ա․Մ․Ն․-ի Հայ Դատի Ջատագովման Հաւաք

ՈՒԱՇԻՆԿԹԸՆ․- Սեպտեմբեր 14-15ին, Արեւելեան Ա․Մ․Ն․-ի Հայ Դատի յանձնախումբերուն նախաձեռնութեամբ եւ համագործակցութեամբ Ամերիկայի Հայ Դատի յանձնախումբի կեդրոնական գրասենեակին տեղի ունեցաւ երկօրեայ հաւաք մը, որուն ընթացքին շեշտը դրուեցաւ հայութիւնը յուզող հարցերուն վրայ։ Քոնկրէսական հանդիպումներէն մինչեւ Քափիթըլ Հիլի եզրափակիչ ծրագիրը, այս տարուան հաւաքին մասնակցեցան հայ համայնքներու ներկայացուցիչներ, զանազան նահանգներէ,- Օհայօ, Փենսիլվանիա, Ռոտ Այլընտ, Քոնեթիքթ, Տելաուըր, Ֆլորիտա, Ճորճիա, Իլինոյ, Ինտիանա, Մէյն, Մէրիլենտ, Մասաչուսէց, Միշիկըն, Միզուրի, Նիւ Հեմշըր, Նիւ Ճըրզի, Նիւ Եորք, Հիւսիսային Քարոլայնա, Հարաւային Քարոլայնա, Թենըսի, Վիրճինիա եւ Ուաշինկթըն Տի. Սի.։ Անոնք աւելի քան 150 հանդիպումներ կատարեցին եւ կապ հաստատեցին Ներկայացուցիչներու Տան 435 եւ Ծերակոյտի 100 գրասենեակներուն հետ։ Երկօրեայ ծրագիրը համախմբեց Հայ Դատի նախկին ծրագիրներու շրջանաւարտներ եւ առաջին անգամ մասնակցող եւ փորձառու ջատագովներ՝ երիտասարդ ամերիկահայ համալսարանականներէ մինչեւ տեղական Հայ Դատի յանձնախումբերու եւ համայնքային ղեկավարներ։ Այս հաւաքը նպատակ ունի Հայ Դատի նախկին ծրագիրներու շրջանաւարտները եւ առաջին անգամ մասնակցողները անմիջականօրէն ներգրաւելու իրենց տեղական Հայ Դատի յանձնախումբերու շարունակական աշխատանքներուն եւ ամրապնդելու Արեւելեան Շրջանի համայնքներու եւ իրենց Քոնկրէսական ներկայացուցիչներուն միջեւ ամբողջ տարուան համագործակցութիւնը։ Արեւելեան Շրջանի հետ Քոնկրէսի որոշ հանդիպումներուն մասնակցեցաւ նաեւ Մարդկային իրաւանց եւ արդարութեան հայկական իրաւական կեդրոնի գործադիր վարիչ եւ Միջազգային եւ համեմատական իրաւունքի կեդրոնի նախագահ,Սիրանուշ Սահակեան, որ միջազգային դատական գործընթացներու մէջ կը ներկայացնէ Ատրպէյճանի մէջ պահուող հայ ռազմագերիները։ Ան իր մասնագիտական փորձառութիւնը ներկայացուց Քոնկրէսի գրասենեակներուն։ Երկուշաբթի՝ Սեպտեմբեր 14-ին, մասնակցողները հաւաքուեցան անձամբ՝ լրացուցիչ տեղեկատուութիւն եւ ուսուցում ստանալու համար։ Անոնք վերատեսութեան ենթարկեցին ժամանակացոյցները, քարոզչական նիւթերը եւ հիմնական պատգամները։ Հայ Դատի պատասխանատուները անմիջականօրէն ներկայացան մասնակիցներուն, որոնք նաեւ հնարաւորութիւն ունեցան հանդիպելու իրենց նահանգներու պատուիրակութիւններուն եւ միւս մասնակիցներուն հետ։ Առաջին անգամ մասնակցողներուն համար այս աշխատանքը յատկապէս կարեւոր էր, որովհետեւ անոնք իրենց առաջին հանդիպումէն իսկ Քափիթըլ Հիլ ներկայացան անհրաժեշտ նախապատրաստութեամբ, նիւթերով եւ աջակցութեամբ։ Երկու պալատներուն մէջ ալ մասնակցողներու հիմնական պահանջներէն մէկը Ծերակոյտի անդամներուն եւ Ներկայացուցիչներուն կոչ ուղղելն էր՝ միանալու երկկուսակցական համատեղ նամակի մը, որու նախաձեռնողներն են ծերակուտական Կերի Փիթըրս (Դեմոկրատական՝ Միչիկըն), ներկայացուցիչ Կաս Պիլիրաքիս (Հանրապետական՝ Ֆլորիտա) եւ Ներկայացուցիչ Ֆրանք Փալոն (Դեմոկրատական՝ Նիւ Ճըրզի)։ Նամակը ուղղուած է Պետական քարտուղար Մարքօ Ռուպիոյին եւ կը պահանջէ դադրեցնել Ատրպէյճանին տրամադրուող ամերիկեան ռազմական օժանդակութիւնը, մինչեւ հայ պատանդներու ազատ արձակումը, հայկական քրիստոնէական ժառանգութեան վայրերու պաշտպանութիւնը եւ Ատրպէյճանի ուժերու հեռացումը Հայաստանի սահմաններէն։ Ջատագովները նաեւ կոչ ուղղեցին Քոնկրէսի անդամներուն՝ միանալու ARMENIA Security Partnership Act (H.R. 6840) օրէնսդրական նախաձեռնութեան։ Օրէնքի նախագիծը, որ ներկայացուած է Ներկայացուցիչներ Պիլիրաքիսի եւ Փալոնի կողմէ, կը նախատեսէ սահմանափակել նախագահին՝ 907-րդ բանաձեւին կիրառումը չեղարկելու լիազօրութիւնը, մինչեւ ապահովութեան շարք մը պայմաններու կատարումը։ Այդ պայմաններն են՝ Ատրպէյճանի ուժերու ամբողջական դուրսբերումը Հայաստանի միջազգայնօրէն ճանաչուած տարածքէն, Ատրպէյճանի մէջ պահուող հայ ռազմագերիներու անվերապահ ազատ արձակումը, բռնի տեղահանուած Արցախի հայերու՝ իրենց նախնիներու հայրենիք վերադառնալու իրաւունքի ճանաչումը, եւ Ատրպէյճանի կողմէ հայերու դէմ բոլոր ռազմական գործողութիւններու դադրեցումը։ Հանդիպումներու ընթացքին մասնակցողները նաեւ կոչ ուղղեցին Քոնկրէսի անդամներուն՝ հովանաւորելու Azerbaijan Sanctions Review Act (H.R. 5369) երկկուսակցական օրէնսդրական նախագիծը, որ կը նախատեսէ պատժամիջոցներ կիրառել Ատրպէյճանի այն պաշտօնեաներուն դէմ, որոնք պատասխանատու են մարդու իրաւունքներու խախտումներու, ներառեալ հայ ռազմագերիներու եւ քաղաքական պատանդներու ապօրինի կալանաւորման համար։ Նաեւ Ներկայացուցիչներու Տան գրասենեակներուն կոչ ուղղեցին հովանաւորելու Armenian Genocide Education Act (H.R. 2585)-ը, որ Հայ Դատ Սեպտեմբեր 2026-ի օրէնսդրական օրակարգի մաս կը կազմէ եւ կը նախատեսէ դաշնային միջոցներ տրամադրել Հայոց Ցեղասպանութեան մասին հանրային կրթութիւնը խթանելու համար։ Սեպտեմբեր 15-ին, տեղի ունեցաւ «Պատասխանատուութիւն 2026․ Արցախ. Արդարութիւն. Ազատութիւն. Վերադարձի Իրաւունք» ձեռնարկը, որուն ընթացքին ներկաները պահանջեցին, որ Ատրպէյճան ազատ արձակէ Պաքուի մէջ ապօրինի պահուող հայ պատանդները եւ արտօնէ, որ Արցախի բնիկ ժողովուրդը ապահով վերադառնայ իր հայրենիքը։ Քոնկրէսականները իրենց ձայնը միացուցին Հայ Դատի ջատագովներուն, հոգեւորականներուն եւ միջազգային իրաւական մասնագէտներուն՝ Ամերիկայի Հայ Դատի յանձնախումբին կազմակերպած՝ ընթացքին: Հայ Դատը կը շարունակէ մնալ Ուաշինկթընի եւ ամբողջ երկրի համայնքներուն մէջ հայկական իրաւունքներու եւ ապահովութեան հարցերու ջատագովութեան գործուն ձայներէն մէկը։ Արեւելեան Շրջանը իր խորին երախտագիտութիւնը կը յայտնէ մասնակցողներուն, իրենց կատարած կարեւոր աշխատանքին եւ Հայ Դատի ամրապնդման ուղղութեամբ ունեցած իրենց ներդրումին համար։

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Ուաշինկթընի Մէջ` Արեւելեան Ա․Մ․Ն․-ի Հայ Դատի Ջատագովման Հաւաք

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Հ․Յ․Դ․ Հայաստանի Երիտասարդական եւ «Նիկոլ Աղբալեան» Ուսանողական միութիւններու Ցոյցը՝ Սիւնիքի Դէպքին Առթիւ

Լոյս Տեսաւ.- «Դրօշակ»-ի 9-րդ Համարը

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է