Էջմիածնական Թեմի Համագումար՝ Միլուոքիի Մէջ
Արեւելեան Թեմի տարեկան Հոգեւորականներու Ժողովը տեղի ունեցաւ Ապրիլ 28-30-ին, Միլուոքիի (Ուիսքանսին) նահանգին մէջ, 124-րդ Թեմական Պատգամաւորական Ժողովին առիթով, որ հիւրընկալուած էր քաղաքին Սուրբ Յովհաննէս Մկրտիչ եկեղեցւոյ կողմէ։ Ժողովին նախագահեց Թեմակալ Առաջնորդ Գերշ. Տ. Մեսրոպ Եպս. Պարսամեան, եւ ներկայ էին Թեմի գրեթէ բոլոր գործող հովիւները, ինչպէս նաեւ հանգստեան կոչուած հոգեւորականներէն ոմանք։
Համագումարի ատենապետն էր Արժ. Տ. Յովհան Խօճա-Էյնաթեան, փոխատենապետ՝ Արժ. Տ. Ղեւոնդ Աճեմեան, իսկ հայերէն եւ անգլերէն քարտուղարներ՝ համապատասխանաբար Արժ. Տ. Ոսկան Յովհաննիսեան եւ Արժ. Տ. Աւետիս Գալայճեան։ Հիւրընկալ եկեղեցւոյ հովիւ Արժ. Տ. Կիւրեղ Համբարձումեան ողջունեց մասնակիցները։
Առաջնորդ Սրբազանը ներկայացուց տարուան ընթացքին իր հովուական այցելութիւններու աշխոյժ ծրագիրը, որ զինք հասցուցած է Թեմի բոլոր ծուխերուն ու առաքելական համայնքներուն։ Ան նաեւ ուրախութեամբ անդրադարձաւ սարկաւագութեան եւ փոքր աստիճաններու մէջ 200-է աւելի ձեռնադրութիւններ կատարած ըլլալուն մասին, ինչպէս նաեւ իր ընկերային ցանցերու հաղորդակցութեան եւ քարոզչական գործունէութեան մասին։
Մեսրոպ Սրբազան անդրադարձաւ նաեւ Սուրբ Վարդան Մայր Տաճարի վերանորոգման ծրագիրին արձանագրած յառաջդիմութեան։ Աւելի ընդհանրապէս, ան շեշտեց քահանաներու սրբազան կոչումը՝ ժողովուրդին Քրիստոսի ներկայութիւնը բերելու, եւ անընդհատ վերանորոգումի, եղբայրասիրութեան ու մշտական աղօթի մէջ ներգրաւուած մնալու կարեւորութիւնը։
Հոգեւորականները նաեւ տեղեկութիւն ստացան Թեմական Առաքելութիւններու բաժանմունքին նորագոյն նախաձեռնութիւններուն մասին, ինչպէս նաեւ Թեմի նոր Աւետարանչական ծառայութեան՝ «Մանանա–Հոգիի Սնունդ» անունով յայտագրին մասին, որ շուտով պիտի սկսի ծուխերու մէջ։ Ներկայացուեցաւ նաեւ «Ծխական կողմնացոյց–Parish Compass» համալսարանական նախաձեռնութիւնը, որուն նպատակն է ուսանողները կապել իրենց մօտ գտնուող Հայ Եկեղեցիներուն հետ։ Մայր Աթոռ Սուրբ Էջմիածինէն ժամանած երկու հիւր հոգեւորականներ՝ Արժ. Տ. Զաքարիա Բաղումեան եւ Արժ. Տ. Մովսէս Սարգսեան, խօսեցան հայրենիքի վերջին զարգացումներուն եւ ներկայ մտահոգութիւններուն մասին։
Հոգեւորականներու Ժողովը աւարտեցաւ Սուրբ Յովհաննէս եկեղեցւոյ մէջ մատուցուած Սուրբ Պատարագով, զոր մատոյց Արժ. Տ. Վարդան Հայրապետեան, որ ներկայիս կը կատարէ հովուական փորձառական ընթացքը Ուսթըրի (Մասաչուսէց) նահանգի Սուրբ Փրկիչ Հայ Եկեղեցիին մէջ։ Պատարագի աւարտին կատարուեցաւ հոգեհանգստեան կարգ՝ Արեւելեան Թեմի ննջեցեալ հոգեւորականներուն համար։
124-րդ Թեմական Պատգամաւորական Ժողովին Պաշտօնական Ընթրիքը, որ տեղի ունեցաւ Ուրբաթ, Մայիս 1-ին, Փֆիսթըր Հոթելի շքեղ սրահին մէջ, դարձաւ ոգեւորիչ երեկոյ մը՝ լեցուն սրտագին գնահատանքներով։ Հիւրընկալ ծուխը՝ Միլուոքիի Սուրբ Յովհաննէս Մկրտիչ եկեղեցին, ապահոված էր վայելուչ միջավայր մը՝ Արեւելեան Թեմի կեանքին մէջ նշանակալի ներդրում ունեցած եկեղեցական առաջնորդները պատուելու համար։
2026 թուականի «Տարուան Հայ Եկեղեցւոյ Անդամներ» ընտրուեցան Արա Չերչեան եւ Ճոն Քէյիշեան՝ երկուքն ալ սոյն եկեղեցւոյ երկարամեայ անդամներ։ Արա Չերչեան պատուուեցաւ Սուրբ Վարդան Մայր Տաճարի վերանորոգման ծրագիրին եւ Հայաստանի մէջ բազմաթիւ կենսական ծրագիրներու հանդէպ իր նուիրուածութեան եւ առատաձեռնութեան համար։ Իր շնորհակալական խօսքին մէջ, Չերչեան գովեց եկեղեցին՝ պահպանելուն համար հայ ինքնութիւնը եւ այն արժէքները, որոնք հայ ժողովուրդին կարելիութիւն տուած են բարգաւաճելու Ամերիկայի Միացեալ Նահանգներուն մէջ։
Ճոն Քէյիշեան գնահատուեցաւ Միլուոքիի հայկական եկեղեցական համայնքին մէջ իր առաջնորդութեան եւ իր հեռատես նուէրին համար՝ 30 տարի շարունակ Թեմի Հայ Քեմփ ճամբարին իր կալուածը տրամադրելով։ Պրն. Քէյիշեանի որդին՝ Արժ. Տ. Սահակ Քէյիշեան, ծնողքին անունով ստացաւ մրցանակը եւ շնորհակալութիւն յայտնեց Թեմին՝ իր հայրը պատուելուն համար։
Նշանաւոր գիտնական Դոկտ․ Ռոպին Տարլինկ Եանկ պատուուեցաւ որպէս այս տարուան «Հայերու Բարեկամ»՝ դասական հայերէնի եւ հայկական աստուածաբանութեան ուսումնասիրութեան մէջ իր խորունկ ներդրումներուն համար։ Դոկտ․ Եանկ յիշեց իր կեանքի այն պահը, երբ առաջին անգամ հանդիպեցաւ Մովսէս Խորենացիի գրութիւններուն եւ ներկայացուեցաւ «այնպիսի քաղաքակրթութեան մը, որ որքան հմայիչ էր, նոյնքան ալ ներգրաւիչ»։ Ան շնորհակալութիւն յայտնեց ամբողջ հայկական համայնքին՝ զինք ընդունելու եւ իր գիտական աշխատանքը գնահատելուն համար, եւ յայտնեց իր փափաքը շարունակելու ամբողջ կեանքի ուսումնասիրութիւնը՝ հայկական ժառանգութեան մտաւոր եւ հոգեւոր գանձերը համաշխարհային լսարանին հասցնելու նպատակով։
Ծրագրի աւարտին, Թեմակալ Առաջնորդ Գերշ. Տ. Մեսրոպ Եպս. Պարսամեան ջերմ շնորհակալութիւն յայտնեց հիւրընկալ եկեղեցւոյ հովիւ Արժ. Տ. Կիւրեղ Համբարձումեանի եւ ծուխի կազմակերպիչ յանձնախումբին, ապա իր օրհնութիւնը փոխանցեց պատուեալներուն եւ ընթրիքի մասնակիցներուն։
Շքեղ երեկոն յատկանշուեցաւ նաեւ աւանդական հայկական քանոնի երաժշտական կատարումով, զոր ներկայացուցին քոյրեր Լիլիա եւ Ալեքսանդրիա Եարալեան։
