ՆԻՒ ԵՈՐՔ․- «ՕՐՈՐԱ» ՄԱՐԴԱՍԻՐԱԿԱՆ ՆԱԽԱՁԵՌՆՈՒԹԵԱՆ ՏԱՍՆԱՄԵԱԿ
ՆԻՒ ԵՈՐՔ․- Հինգշաբթի, 6 Նոյեմբերին, էլիս Այլընտի մէջ, տեղի ունեցաւ «Օրորա» մարդասիրական նախաձեռնութեան տասնամեակի տօնակատարութիւնը, մասնակցութեամբ բազմաթիւ հիւրերու։
Այս տարուան մրցանակակիրն էր տոքթ. Ճամալ Էլթաէպը, որ կը վարէ Սուտանի մէջ մնացած սակաւաթիւ հիւանդանոցներէն մէկը, ուր դաժան պայմաններու տակ վիրաւոր եւ տեղահանուած մարդիկ կը բուժուին։
2015-ին հիմնադրուելէն ի վեր, «Օրորա»-ն համաշխարհային ոյժ մը դարձած է, օժանդակելով եւ նիւթապէս սատարելով 517 մարդասիրական ծրագիրներու, որոնք կեդրոնացած են շտապ օգնութեան, բժշկական խնամքի եւ կրթութեան վրայ։
Նուպար Աֆէեան, որ «Օրորա» նախաձեռնութեան համահիմնադիրներէն է, լուսահոգի Վարդան Գրիգորեանի եւ Ռուբէն Վարդանեանի (բանտարկուած Պաքուի մէջ) հետ, խորհրդածեց գերմանացի զինուորներու բարեացակամութեան եզակի շարժման մասին, որ փրկած էր իր մեծ հայրը Հայոց Ցեղասպանութեան տեղահանութեան ընթացքին եւ կարելի դարձուցած, որ իր ընտանիքը վերապրէր։ Ան քաջալերեց հիւրերը որ ապրին իբրեւ մարդասէրներ, օգնելով կարիքաւորներու։ «Թէեւ հայերը ամենահարուստ ազգերու թիւին մաս չեն կազմեր, սակայն անոնց պատմութիւնն ու համոզումները կը պարտադրեն, որ մարդասէր ըլլան», յայտնեց Աֆէեան։
Նշենք, թէ Ուաթըրթաունի (Մասաչուսէց) Սուրբ Ստեփանոս եկեղեցւոյ հոգեւոր հովիւ Գերպ. Տ. Հրանդ Ծ. Վրդ. Թահանեան (աջին) կը ներկայացնէր Ա․Մ․Ն․ Արեւելեան Թեմի Առաջնորդ՝ Գերշ. Տ. Անուշաւան Արքեպիսկոպոս Դանիէլեանը։
