65-ամեայ Ժրաջան Աշխատանք Եւ Աւելին

0 0
Read Time:1 Minute, 52 Second

«Հայրենիք» – Պոսթըն

Խմբագրական

 

Սոսկական տարեդարձի մը նշումը չէ Ա.Մ.Ն. Արեւելեան Թեմի Առաջնորդարանի 65-ամեակը: Ո՛չ ալ այդ առթիւ մատուցուած Սուրբ պատարագ, կազմակերպուած հիւրասիրութիւն, տեղին շնորհաւորանք, դրուատական խօսքեր եւ՝ վերջ:

65 տարիներ թաւալած են այդ օրէն ետք, երբ զանգերը այլ պայմաններու մէջ եւ այլ հողաշերտի վրայ ղօղանջեցին Նոր Աշխարհին մէջ:

Պատմական փուլ մըն էր. Մեծի Տանն Կիլիկիոյ հեռատես եւ իրատես Զարեհ Ա. Կաթողիկոսին համար յստակ էր կատարուելիքը: 12 Հոկտեմբեր 1957-ի թուակիր կոնդակով մը ու հայրական ջերմ գուրգուրանքով՝ Նորին Սուրբ Օծութիւնը իր  օրհնութեան հետ մեկնարկը տուաւ այս կարեւոր առաքելութեան:

Դիպուկ են Արեւելեան թեմի բարեջան առաջնորդ Անուշաւան արք. Դանիէլեանի խօսքերը. «Երախտապարտութեամբ կը նայինք դէպի անցեալը եւ վստահութեամբ ու յոյսով կը նայինք դէպի ապագան, նոր աւիշ քաղելով մեր նուաճումներէն եւ մեր յաղթահարած մարտահրաւէրներէն… »:

Նիւ Եորքի մէջ տեղի ունեցաւ Հիւսիսային Ամերիկայի Ազգային Առաջնորդարանին ծննդոցը: Տարիներ ետք, ամերիկեան այս ափերու հայութեան աճին իբրեւ արդիւնք՝ Մայիս 1973-ին թեմը ճիւղաւորուեցաւ, երբ Արեւմտեան շրջանը (իրողական կեդրոն ունենալով Քալիֆորնիան) հռչակուեցաւ առանձին թեմ: Նման աճի իբրեւ արդիւնք, աւելի ուշ, 2002-ին, Գանատայի շրջանն ալ սկսաւ գործել իբրեւ առանձին թեմ:

Մեծի Տանն Կիլիկիոյ Կաթողիկոսութեան հովանիին տակ ընդունուելէ ետք, Առաջնորդարանին գործը տարածուեցաւ Հիւսիսային Ամերիկայի վրայ եւ ունեցաւ երեք ծաղկուն ճիւղաւորում. 65 տարի առաջ նշուած մեկնարկով՝ երեք թեմերն ալ կը ծառայեն թէ՛ նորաստեղծ եւ թէ հետզհետէ աւելի կազմաւորուող համայնքներուն։

Ինչպէս բոլոր գաղթօճախներուն, նոյնպէս ալ Արեւելեան թեմի օճախներուն մէջ, եկեղեցիներու, ազգային, կրթական հաստատութեանց եւ մշակութային բնագաւառներէն ներս ժրաջան աշխատանքը պէտք է տարեգրութեանց մէջ արձանագրուի: Քուրան կ’ընդգրկէ Ազգային Ուսումնական խորհուրդի հայեցի  դաստիարակութենէն մինչեւ «Սիամանթօ» լսարանը, «Տաթեւ» եիտասարդական լսարան, երիտասարդ երաժշտագէտներ քաջալերող «Միւզիքըլ Արմինիա» ծրագիր եւ դեռ շարքը երկար է:

Անուշաւան արք. Դանիէլեան նոյնպիսի բծախնդրութեամբ եւ հետեւողականութեամբ կը շարունակէ նախկիններուն՝ Հրանդ արք. Խաչատուրեանի, Գարեգին արք. Սարգիսեանի (աւելի ուշ Կաթողիկոս Մեծի Տանն Կիլիկիոյ, ապա՝ Ս. Էջմիածնի), Մեսրոպ արք. Աշճեանի եւ Օշական արք. Չօլոյեանի  երախտաշատ  աշխատանքն ու լայնածաւալ գործունէութիւնը:

Կրկնենք. Ազգային Աառաջնորդարանը, իր 65-ամեայ պատմութեամբ, հաւատարիմ կը մնայ հայ ժողովուրդի լինելութեան եւ անոր ծառայութեան  սկզբունքին: Կը ձայնակցինք Առաջնորդ սրբազանին՝ Անուշաւան արք. Դանիէլեանի հաստատումին.

«Քրիստոսական հաւատքի եւ ազգային նուիրական արժէքներու, առողջ հիմերու վրայ հաստատուած Ազգային առաջնորդարանի 65 տարիներու ծառայութիւնը իր հոգեւոր, մշակութային, բարեսիրական, ընկերային, պահանջատիրական եւ այլ իրագործումներով, առարկայական վկայութիւն  է հաւաքական անսակարկ նուիրումի, մեզի լոյս կը ներշնչէ, որ յաղթահարած ենք երեւելի եւ աներեւոյթ տագնապներ: (…)Մեր կառոյցներուն հիմքերը ամրացնենք ի խնդիր տոկուն եւ փայլուն ապագայի»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles