ՈՒԱՇԻՆԿԹԸՆԻ ՄԷՋ.- «Ի ՊԱՇՏՊԱՆՈՒԹԻՒՆ ՔՐԻՍՏՈՆԵԱՆԵՐՈՒ» ԿԱԶՄԱԿԵՐՊՈՒԹԵԱՆ ՀԱՄԱԺՈՂՈՎ

0 0
Read Time:1 Minute, 53 Second

ՈՒԱՇԻՆԿԹԸՆ.-  Վերջերս տեղի ունեցաւ «Ի Պաշտպանութիւն Քրիստոնեաներու»  (“In Defense of Christians”)  համաժողովը, որուն մասնակցեցան Միջին Արեւելքի քրիստոնեաներու ճակատագիրով մտահոգ հարիւրաւոր կրօնական առաջնորդներ, կրօնական ազատութեանց եւ մարդկային իրաւանց ջատագով կազմակերպութեանց ներկայացուցիչներ եւ պետական պաշտօնատարներ:

2014-ին ծնունդ առած է «Ի Պաշտպանութիւն Քրիստոնեաներու» կազմակերպութիւնը, երբ Մեծի Տանն Կիլիկիոյ կաթողիկոս Արամ Ա. եւ Միջին Արեւելքի քրիստոնեայ այլ առաջնորդներ միասնութեան ազդեցիկ կոչ մը ըրած էին՝ շրջանի քրիստոնէական պատմական համայնքներուն դէմ ուղղուած սպառնալիքը դիմագրաւելու համար:

Հայ Դատի պատուիրակութիւնը քոնկրէսական Ճեֆ Ֆորթընպերիի․․․

«Հաւասարութեան, ազատութեան եւ ապահովութեան ի խնդիր պայքարելով» նշանաբանին տակ, Սեպտեմբեր 10-ին տեղի ունեցած համաժողովին անգամ մը եւս քննարկուեցաւ Հայոց Ցեղասպանութեան ճանաչման հարցը եւ Թուրքիոյ մղած ուրացման արշաւին հակադրուելու կարեւորութիւնը, որպէսզի կարելի ըլլայ մերօրեայ ցեղասպանութիւններուն առաջքը առնել:

Սեպտեմբեր 11-ին, համաժողովին մասնակիցները հանդիպումներ ունեցան Քոնկրէսի անդամներու հետ։

«Ի Պաշտպանութիւն Քրիստոնեաներու» կազմակերութեան նախագահ Թուֆիք Պաաքլինիի հետ

Այս ոչ-շահութաբեր կազմակերպութեան առաքելութիւնն է՝ ապահովել Միջին Արեւելքի մէջ քրիստոնէութեան եւ քրիստոնեայ մշակոյթի պաշտպանութիւնն ու պահպանումը։ Ամերիկայի Հայ Դատի Յանձնախումբը գլխաւոր հովանաւորներէն է այս համաժողովին, ուր հաւատքի առաջնորդներ ու մարդկային իրաւանց պաշտպաններ միանալով,  կոչ յղեցին պետական պաշտօնատարներու, որպէսզի Միջին Արեւելքի քրիստոնէութեան պաշտպանութեան ուղղուած քայլերու ձեռնարկեն։ Ժողովը նաեւ կոչ ուղղեց վաւերացնելու Հայոց Ցեղասպանութեան ճանաչման բանաձեւերը (Ծերակոյտի որոշումնագիր թիւ 150 եւ Ներկայացուցիչներու Տան որոշումնագիր թիւ 296)։

Ա.Մ.Ն. արեւելեան թեմի բարեջան առաջնորդ՝ Անուշաւան արք. Դանիէլեան մասնակցեցաւ այս համաժողովին եւ կատարեց բացման աղօթքը: Ուաշինկթընի Հայ Դատի Յանձնախումբի անձնակազմն ալ իր մասնակցութիւնը բերաւ: Իսկ արեւելեան Ա.Մ.Ն.-ի Հ.Յ.Դ. Կեդրոնական Կոմիտէէն մասնակցեցաւ Անի Չաղլասեան:

Երկու օրերուն ընթացքին, Հայ Դատի ներկայացուցիչները նաեւ առիթը ունեցան հայութիւնը յուզող հարցերու շուրջ խորհրդակցութիւններ ունենալու առաւել քան հարիւր քոնկրէսականներու հետ։ Համաժողովի ընթրիքի ընթացքին ելոյթ ունեցաւ Ամերիկայի Հայ Դատի յանձնախումբի գործադիր վարիչ Արամ Համբարեան, որ լուսարձակի տակ առաւ հայութիւնը յուզող հարցերը։ Ան նաեւ մասնակցեցաւ հանրային քննարկումներուն։ Ելոյթներ ունեցան նաեւ միջազգային կրօնական ազատութեան հարցերու Միացեալ Նահանգներու դեսպան Սեմ Պրաունպեք եւ Սպիտակ տան անձնակազմի պետ Միք Մալվէյնի։

Համաժողովի մեծարուողներէն էին Քոնկրէսի Հայկական համախմբումի համա-ատենապետներ Կաս Պիլիրաքիս եւ Ճեքի Սփիր, քոնկրէսական Ճեֆ Ֆորթընպերիի կողքին։ Խօսք առնելով, Սփիր ըսաւ․- «Հպարտ եմ հայ ըլլալով, սակայն կը ցաւիմ, որ մեր Քոնկրէսը տակաւին պաշտօնապէս Ցեղասպանութիւն չի համարեր առաւել քան հարիւր տարի առաջ տեղի ունեցած 1.5 միլիոն հայերու սպանդը», իր ելոյթին մէջ ըսաւ Ճեքի Սփիր։

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles