0
0
ՊՈՍԹԸՆ.- Պոլսոյ երեսփոխան Սելինա Տողան (Ժողովրդային-Հանրապետական Կուսակցութիւն), Ամերիկայի Միացեալ Նահանգներու մէջ պարգեւատրուեցաւ Հայ Կանանց Միջազգային Ընկերակցութեան (AIWA) կողմէ։ Միեւնոյն ժամանակ, ան մասնակցեցաւ այս ընկերակցութեան կազմակերպած եռօրեայ համաժողովին, եւ ներկայացուց «Քաղաքականութեան եւ հանրային կեանքէն ներս կանանց ղեկավարութիւնը» նիւթը։ Այս առթիւ, Հայ Կանանց Միջազգային Ընկերակցութիւնը յանձնեց հանրային բնագաւառէն ներս, ղեկավարութեան մրցանակ մը։
Նշենք թէ, այս համագումարին համախմբուած էին աշխարհի բազմաթիւ երկիրներէ ժամանած հայ կանայք, որոնք բաժնեցին իրենց փորձառութիւնները:
Տողան իր մրցանակը ստացաւ ձեռամբ Սիլվա Խաչիկեանէն, որ պատասխանատուն է այս ընկերակցութեան հիմնադրութեան 25-ամեակի յոբելենական կարգադիր յանձնախումբին։ Տողանի կողքին, մրցանակներ յանձնուեցան նաեւ Քեթրին Սարաֆեանին, Քերըլայն Ռաֆայէլեանին, Քերըլայն Մուկարին եւ վերջերս Ռիոյի Ողիմպիականին մասնակցած՝ Հուրի Կէպէշեանին։
