Ֆրանսայի Նախագահական Թեկնածու Վալերի Փեքրէս Այցելեց Արցախ
ԵՐԵՒԱՆ.- Ֆրանսայի նախագահական թեկնածու տիկին Վալերի Փեքրէս, որ պաշտօնական այցելութեամբ մը, Հայաստան ժամանած էր, Դեկտեմբեր 22-ին այցելեց Արցախ եւ հոն ալ բարձր մակարդակի տեսակցութիւններ ունեցաւ:
Ատրպէյճանի արտաքին գործոց նախարարութիւնը հրապարակեց հաղորդագրութիւն մը, նշելով, թէ.- «Նախընտրական քարոզարշաւի ծիրին մէջ ֆրանսացի քաղաքական գործիչներու եւ այլոց ընկերակցութեամբ կատարուած այդ այցելութիւնը ուղղուած է Ատրպէյճանի ինքնիշխանութեան ու տարածքային ամբողջականութեան դէմ եւ կը հանդիսանայ երկրի ազգային օրէնսդրութեան խախտում»:
Ատրպէյճանի արտաքին գործոց նախարարութիւնը նաեւ աւելցուց, որ Վալերի Փեքրէս եւ անոր հետ Արցախ այցելած ներկայացուցիչները կը ներառուին Ատրպէյճանի «Սեւ ցանկ»-ին վրայ։
Երեւան կեցութեան ժամանակ Փեքրէս եւ անոր ընկերակցող պատուիրակութիւնը, այցելեցին Ցեղասպանութեան թանգարանը եւ Եռաբլուր պանթէոնը։
