Ֆրանսայի Խորհրդարանի Ընկերվարական Խմբակցութեան Պատուիրակութիւնը` Հայաստանի Եւ Արցախի Մէջ

0 0
Read Time:8 Minute, 35 Second

nk7

Սեպտեմբեր 2-ի երեկոյեան Երեւան ժամանեց Ֆրանսայի խորհրդարանի ընկերվարական խմբակցութեան պատուիրակութիւնը` գլխաւորութեամբ խմբակցութեան ղեկավար Պրիւնօ Լը Ռուի:
Չորս օր տեըողութիւն ունեցող այս այցելութեան նախաձեռնած է Հայ յեղափոխական դաշնակցութիւնը (Արեւմտեան Եւրոպայի, Հայաստանի եւ Արցախի կառոյցներ): Պատուիրակութեան կ՛ընկերակցին Հ. Յ. Դաշնակցութեան Արեւմտեան Եւրոպայի Կեդրոնական կոմիտէի, Հայ դատի գրասենեակի եւ «Նոր Սերունդ» երիտասարդական միութեան ներկայացուցիչները:
Այցելութեան նպատակն է Արցախի մէջ ծանօթանալ իրավիճակին, կապ հաստատել Հայ յեղափոխական դաշնակցութեան Արցախի կառոյցին եւ ընդհանրապէս հասարակութեան տարբեր խումբերու հետ:
Հայաստանի մէջ պատուիրակութիւնը հանդիպումներ ունեցան Հայաստանի նախագահին, Ազգային ժողովի նախագահին հետ եւ այցելեցին Ծիծեռնակաբերդ:
Ֆրանսական պատուիրակութեան պաշտօնական հանդիպումներուն մասնակցեցան Հ.Յ.Դ. Բիւրոյի անդամներ Մուրատ Փափազեան եւ Կիրօ Մանոյեան:
Պրիւնօ Լը Ռուի գլխաւորութեամբ Ֆրանսայի խորհրդարանական նման պատուիրակութիւն մը Հայաստան այցելած էր Սեպտեմբեր 2014-ին, Դաշնակցութեան հրաւէրով, նշելու համար ընկերվարական կուսակցութեան առաջնորդ, հայկական իրաւունքներու պաշտպան քաղաքական գործիչ Ժան Ժորէսի մահուան հարիւրերորդ տարելիցը:

Հանդիպում Նախագահ Սերժ Սարգսեանի Հետ

nk8

Հայաստանի Հանրապետութեան նախագահ Սերժ Սարգսեան Սեպտեմբեր 3-ի յետմիջօրէին, ընդունեց Ֆրանսայի խորհրդարանի ընկերվարական խմբակցութեան պատուիրակութիւնը` գլխաւորութեամբ խմբակցութեան ղեկավար Պրիւնօ Լը Ռուի:
Նախագահը ողջունեց հիւրերը եւ նշած, որ ուրախութեամբ կրկին կը հիւրընկալէ տարի մը առաջ Երեւան այցելած Լը Ռուն եւ Ֆրանսայի խորհրդարանականները, ուրախ է նաեւ պատուիրակութեան կազմին մէջ տեսնելու առաջին անգամն ըլլալով Հայաստան այցելող երեսփոխաններ:
Հանդիպումին ընթացքին զրուցակիցները երկուստեք կարեւոր նկատեցին տարբեր մակարդակի յաճախակի փոխադարձ այցելութիւններն ու կապերը, որոնք, ըստ անոնց, աւելի կ՛ամրապնդեն հայ-ֆրանսական բարեկամութիւնն ու լայն կարելիութիւն կու տան տեղւոյն վրայ անմիջական մթնոլորտի մէջ քննարկելու երկկողմանի հետաքրքրութիւն ներկայացնող հարցերը: «Ֆրանսայի պարագային այսպիսի հանդիպումներ դարձած են աւանդական. վերջին մէկ տարուան ընթացքին խորհրդարանական երեք մեծ պատուիրակութիւններ այցելած են Հայաստան եւ նաեւ Արցախ: Ընդհանրապէս, վերջին տարիներուն հայ-ֆրանսական առանձնաշնորհեալ յարաբերութիւնները նոր որակ ստացած են` նշանաւորուելով երկկողմանի կապերու վերընթաց զարգացմամբ բոլոր մարզերուն մէջ», յայտնեց նախագահ Սերժ Սարգսեան:
Հանդիպումին մասնակիցները համակարծիք եղան այն մասին, որ միջպետական յարաբերութիւններու ամրապնդման կարեւորագոյն բաղկացուցիչ է միջխորհրդարանական համագործակցութիւնը, որուն զարգացման մէջ իրենց մեծ աւանդը ունին երկու երկիրներու խորհրդարաններուն մէջ ձեւաւորուած հայ-ֆրանսական բարեկամութեան խումբերը:

Երեսփոխան Պրիւնօ Լը Ռուն նախագահ Սերժ Սարգսեանին փոխանցեց Ֆրանսայի նախագահ Ֆրանսուա Հոլանտի ջերմ ողջոյնները: Ան նաեւ գոհունակութեամբ նշեց, որ տարբեր մակարդակներու վրայ յաճախակի դարձած երկկողմանի հանդիպումները մնայուն կերպով ուշադրութիւն կը գրաւեն իրենց արդիւնաւէտութեամբ` հանդիպումէ հանդիպում նախանշելով համագործակցութեան նոր եզրեր:
Ֆրանսացի երեսփոխանները կարեւոր նկատեցին նաեւ այցելութիւնը Արցախ եւ շեշտեց, որ ըլլալով խորհրդարանականներ, իրենց առաքելութիւնն ու անմիջական պարտականութիւնը կը նկատեն տեղւոյն վրայ ծանօթանալ իրավիճակին, կապ հաստատել մարդոց հետ եւ այդ բոլորին լոյսին տակ կազմել իրենց պատկերացումները, տեսածն ու լսածը փոխանցել նաեւ պաշտօնակիցներուն: Ըստ անոնց, Ֆրանսան շահագրգռուած է, որ Լեռնային Ղարաբաղի հիմնախնդիրի լուծման համար շարունակուին երկխօսութիւնն ու խաղաղութեան հաստատման ուղղուած գործընթացը` հաստատելով, որ Լեռնային Ղարաբաղ իրենց այցելութիւնները եւս այդ նպատակին կը ծառայեն:
Հանդիպման ընթացքին հիւրերը Հայաստանի նախագահէն խնդրեցին հակիրճ կերպով ներկայացնել Հայաստանի սահմանադրական բարեփոխումներուն գործընթացն ու այդ բարեփոխումներուն նպատակը: Պրիւնօ Լը Ռու ընդգծած է, որ, իր համոզումով, որեւէ կառուցակարգային փոփոխութիւն, որ կը միտի կառավարման լաւագոյն տարբերակին եւ կ՛արժանանայ երկրի քաղաքացիներուն համաձայնութեան, միայն ողջունելի է, եւ եթէ պետութիւնը որեւէ ժամանակ կ՛ընթանայ կառավարման համակարգի բարելաւման ուղղութեամբ, ատիկա կը վկայէ պետութեան քաղաքական հասունութեան մասին:
Տեսակցութիւն Ազգային ժողովի նախագահ Գալուստ Սահակեանի Հետ

Հայաստանի Հանրապետութեան Ազգային ժողովի նախագահ Գալուստ Սահակեան ընդունեց Ֆրանսայի Հանրապետութեան խորհրդարանի ընկերվարական խմբակցութեան ղեկավար Պրիւնօ Լը Ռուի գլխաւորած պատուիրակութիւնը:
Ողջունելով պատուիրակութեան անդամները` Հայաստանի Ազգային ժողովի նախագահը նշած է, որ նախորդ այցելութենէն անցած է մէկ տարի, եւ այդ ընթացքին հայ-ֆրանսական միջխորհրդարանական յարաբերութիւնները աւելի խորացած են: Անդրադառնալով հայ-ֆրանսական միջպետական յարաբերութիւններու խորացման` Գալուստ Սահակեան կարեւոր նկատած է երկու երկիրներու ղեկավարներուն փոխադարձ այցելութիւնները, անոնց կարգին` Ապրիլ 24, 2015-ին Ֆրանսայի նախագահ Ֆրանսուա Հոլլանտի գլխաւորած պաշտօնական պատուիրակութեան այցելութիւնը Հայաստան: Խօսելով Ֆրանսա կատարած իր այցելութեան մասին` Ազգային ժողովի նախագահը վերահաստատեց իր հրաւէրը Ֆրանսայի Հանրապետութեան խորհրդարանի նախագահ Քլոտ Պարթոլոնին:
Ազգային ժողովի նախագահը, բարձր գնահատելով բարեկամութեան խումբերուն ծաւալած արդիւնաւէտ գործունէութիւնը, ընդգծեց բարեկամական խումբերու ղեկավարներու մեծ ներդրումը բարեկամ երկիրներու միջխորհրդարանական յարաբերութիւններու զարգացման գործին մէջ:
Անդրադառնալով Ատրպէյճանի` անհանգստութեան տեղի տուող, անհանդուրժող պահուածքին` Գալուստ Սահակեան նշեց, թէ անհրաժեշտ է, որ Եւրոպական խորհուրդի Խորհրդարանական վեհաժողովը իրական քայլերու ձեռնարկէ այդ երկրին յանդուգն, ոչ ժողովրդավար գործելակերպը կանխելու համար:nk2

Իր երախտագիտութեան խօսքը ուղղելով Պրիւնօ Լը Ռուին, որ Հայոց Ցեղասպանութեան ժխտումը քրէականացնող օրինագիծի ջատագովներէն է, Ազգային ժողովի նախագահը յոյս յայտնած է, որ Ֆրանսայի խորհրդարանը հետեւողական ըլլայ նոր օրինագիծի ներկայացման եւ ընդունման հարցին մէջ:
Անդրադառնալով պատուիրակութեան Արցախ կատարուելիք այցելութեան` Գալուստ Սահակեան նշած է, որ կարեւոր կը նկատէ իւրաքանչիւր նման այցելութիւն, որովհետեւ Արցախ այցելող իւրաքանչիւր պատուիրակութիւն կամ անձ առիթը ունի ականատես ըլլալու ազատ ապրելու իրաւունքը նուաճած, անկախութեան համար մարտնչած ժողովուրդի կենսակերպին: Ազգային ժողովի նախագահին խօսքով` անկախ ճանչցուած կամ չճանչցուած ըլլալու հանգամանքէն, Արցախի ժողովուրդը նուաճած է ազատ ապրելու իր իրաւունքը եւ պէտք չէ անտեսուած ըլլայ միջազգային հանրութեան կողմէ:
Ֆրանսայի Հանրապետութեան խորհրդարանի ընկերվարական խմբակցութեան պատուիրակութեան ղեկավար Պրիւնօ Լը Ռուն, շնորհակալութիւն յայտնելով Ազգային ժողովի նախագահին ընդունելութեան համար, նշեց, որ Ֆրանսա-Հայաստան յարաբերութիւնները աւելի հզօրացած են: Կարեւոր նկատելով Ֆրանսայի նախագահ Ֆրանսուա Հոլլանտի այցելութիւնը Հայաստան Ապրիլ 24, 2015-ին` Պրիւնօ Լը Ռու փաստած է, որ իր երկրի նախագահը հետեւողականօրէն վերահաստատած է Ֆրանսայի յանձնառութիւնը Ցեղասպանութեան դատապարտման հարցին մէջ:
Անդրադառնալով պատուիրակութեան այցելութեան Արցախ` պատուիրակութեան ղեկավարը նշեց, որ իրենց նպատակն է կապուիլ արցախցիներուն հետ եւ վերահաստատել այն միտքը, որ այնտեղ ապրող ժողովուրդը իրաւունք ունի խաղաղ ապրելու: Պրիւնօ Լը Ռու նշած է, որ պատուիրակութեան անդամները տեղեակ են հայ-ատրպէյճանական սահմանին վրայ տիրող իրավիճակէն եւ փաստած, որ միջազգային հանրութեան համար անընդունելի են զինադադարի դրութեան խախտումները:
Խօսելով Հայաստան եւ Արցախ այցելութեան մասին` ան նշեց, որ թէ՛ Հայաստանի, թէ՛ Արցախի մէջ պէտք է կարեւոր նկատուին ժողովրդավարութիւնը, մարդու իրաւունքները, հիմնարար ազատութիւնները` ի տարբերութիւն դրացի երկրին, ուր ժողովրդավարութիւնը կը կաղայ:
Անդրադառնալով Ֆրանսա-Հայաստան յարաբերութիւններուն` Պրիւնօ Լը Ռու փաստեց, որ պէտք է խորացնել զանոնք բարեկամ երկիրներու խորհրդարաններու մնայուն յանձնախումբերու մակարդակով:

Լրագրողներու հետ Հանդիպում «Սիմոն Վրացեան» Կեդրոնին Մէջ

Սեպտեմբեր 3-ին, Հ.Յ.Դ. Հայաստանի Գերագոյն մարմինի «Սիմոն Վրացեան» կեդրոնին մէջ լրագրողներուն հետ հանդիպումի մը ընթացքին, Պրիւնօ Լը Ռու զեկուցեց նախագահ Սերժ Սարգսեանի հետ տեսակցութեան մասին:
«Այսօր անձամբ զրուցած եմ Հայաստանի նախագահին հետ սահմանադրական բարեփոխումներուն շուրջ, եւ ասիկա ինծի համար մեծ պատիւ է` քննարկել նման կարեւոր խնդիր նախագահին հետ: Ձեռնպահ կը մնամ որակումներ տալու առումով, բայց ես նախագահ Սարգսեանին ըսի, որ քաղաքական հասունութեան նշան է, որ ձեր երկիրը կը ձեռնարկէ նման բարեփոխումներու: Նոյնիսկ Ֆրանսայի նման երկրի մը մէջ դժուար է նման բարեփոխումներ իրականացնել, որովհետեւ անհրաժեշտ է աւելի լայն փոխհամաձայնութիւն քաղաքական ուժերու եւ քաղաքացիական հասարակութեան միջեւ», ըսաւ ան:
Պատասխանելով լրագրողներու հարցումին, թէ արդեօ՞ք, իրենց կարծիքով, անհրաժեշտութիւն կայ Հայաստանի մէջ իրականացնելու սահմանադրական փոփոխութիւններ, ֆրանսացի պատգամաւորը ըսաւ. «Ես ուշադրութեամբ կը հետեւիմ սահմանադրական բարեփոխումներու գործընթացին, դժուար է յաջողցնել այդ գործընթացը, բայց զիս կը հետաքրքրէ ոչ թէ էութիւնը, այլ գործընթացը: Եթէ գործընթացը մինչեւ վերջ երթայ, ապա պիտի ստեղծէ փոխհամաձայնութիւն քաղաքական ուժերուն եւ հանրային կարծիքին միջեւ»:
Ֆրանսական պատուիրակութեան ուղեկցող Հ.Յ.Դ. Բիւրոյի անդամ Մուրատ Փափազեան նշեց, որ Դաշնակցութիւնը ունեցած է իր մասնակցութիւնը սահմանադրական փոփոխութիւններու գործընթացին մէջ, որովհետեւ, սկսած 1995-էն, Հ.Յ.Դաշնակցութիւնը մշտապէս բարձրաձայնած է խորհրդարանական կառավարման համակարգին ու հարիւր տոկոս համամասնական ընտրակարգին կողմ ըլլալուն մասին:

«Այո՛, ճիշդ պահն է հիմա իրականացնելու սահմանադրական փոփոխութիւններ, որովհետեւ Հայաստանի մէջ պէտք է տեղի ունենան ընտրութիւններ, որոնք մէկ քայլ առջեւ կը տանին Հայաստանը դէպի ժողովրդավարացում: Սփիւռքը եւս կը հետեւի այս գործընթացին: Եւ եթէ սահմանադրական փոփոխութիւնները հանրաքուէով հաստատուին, ապա այդ մէկը կը նշանակէ արդիականացում, մէկ քայլ յառաջ, որովհետեւ սփիւռքը կ՛ապրի այդպիսի արդիականացուած համակարգի մը մէջ եւ կը սպասէ սահմանադրական փոփոխութիւններուն», յայտնեց Փափազեան:

Այցելութիւն Արցախ

Ուրբաթ, Սեպտեմբեր 4-ին, Արցախ ժամանեցին Ֆրանսայի խորհրդարանի ընկերվարական խմբակցութեան անդամները:
Պատուիրակութեան ընկերակցեցան Հ.Յ.Դ. Բիւրոյի անդամներ՝ Մուրատ Փափազեանն ու Կիրօ Մանոյեանը, Հ.Յ.Դ. Արցախի Կեդրոնական կոմիտէի ներկայացուցիչ, Լեռնային Ղարաբաղի Հանրապետութեան Ազգային ժողովի «Դաշնակցութիւն» խմբակցութեան ղեկավար Դաւիթ Իշխանեան եւ Արցախի Հանրապետութեան Ազգային ժողովի «Դաշնակցութիւն» խմբակցութեան պատգամաւոր Լեռնիկ Յովհաննիսեան:p2-3 nk1
Խորհրդարանի ընկերվարական խմբակցութեան անդամները այցելեցին Արցախի պետական համալսարան, ծաղիկներ զետեղեցին Արցախեան պատերազմին ընթացքին նահատակուած ազատամարտիկներուն յիշատակը յաւերժացնող յուշակոթողին, որմէ ետք հանդիպում ունեցան Արցախի պետական համալսարանի ֆրանսախօս ուսանողներու եւ դասախօսական անձնակազմին հետ:
Արցախի պետական համալսարանի նախագահ Մանուշ Մինասեան հակիրճ կերպով ներկայացուց համալսարանին գործունէութիւնը, յառաջիկայ ծրագիրները, որմէ ետք ուսանողները հանդէս եկան հարցադրումներով, մասնաւորապէս` երկկողմանի կապերու ամրապնդման, հաւանական միջհամալսարանական յարաբերութիւններու ստեղծման վերաբերեալ:
Ստեփանակերտի Շարլ Ազնաւուրի անուան կեդրոնին մէջ, տեղի ունեցաւ հանդիպում Հ.Յ.Դ. Արցախի երիտասարդական կառոյցի եւ Արցախի երիտասարդական այլ կառոյցներու ներկայացուցիչներուն հետ: Ձեռնարկին սկիզբը, Ֆրանսայի «Նոր Սերունդ» երիտասարդական միութեան կողմէ Արցախի մէջ կազմակերպուած ամառնային ճամբարին պատանիները հանդէս եկած են գեղարուեստական յայտագիրով:nk4
Ֆրանսայի Խորհրդարանի ընկերվարական խմբակցութեան ղեկավար Պրունօ Լը Ռու, շնորհակալութիւն յայտնելով պատանիներուն եւ «Նոր Սերունդ» երիտասարդական միութեան, նշած է, որ յառաջիկայ ամառուընէ սկսեալ անոնք եւ «Նոր Սերունդ»-ականները պիտի համագործակցին եւ վերջինները պիտի ունենան նիւթական աջակցութիւն:
Պրունօ Լը Ռուն կարեւոր նկատեց այն համագործակցութիւնը, որ գոյութիւն ունի Հ.Յ.Դ.-ի հետ եւ նշած, որ միշտ պէտք է տարբերութիւն դնել այն երկիրներուն միջեւ, որոնք կը յարգեն ժողովրդավարութիւնն ու խաղաղութիւնը եւ այն երկիրներուն միջեւ, որոնք կ՛ոտնահարեն ժողովրդավարութիւնն ու խաղաղութիւնը:
Պատասխանելով այն հարցումին, թէ ե՞րբ Ֆրանսան պիտի ճանչնայ Արցախի Հանրապետութիւնը, Պրունօ Լը Ռուն պատասխանած է, որ միացեալ Նահանգներ, Ռուսիա, Ֆրանսա եւ Հայաստան միասին պէտք է գան այդ յայտարարին:
Ընկերվարական խմբակցութեան անդամները, խմբակցութեան ղեկավար Պրունօ Լը Ռուի գլխաւորութեամբ, հանդիպում ունեցան Արցախի լրատուամիջոցներու ներկայացուցիչներուն հետ:nk6
«Արմենիա» պանդոկի նիստերու դահլիճին մէջ հրաւիրուած մամլոյ ասուլիսին ներկայ էին Հ.Յ.Դ. Բիւրոյի անդամներ Մուրատ Փափազեան եւ Կիրօ Մանոյեան, Հ.Յ.Դ. Ֆրանսայի Կեդրոնական կոմիտէի անդամներ, Հ.Յ.Դ. Արցախի Կեդրոնական կոմիտէի ներկայացուցիչ, Լեռնային Ղարաբաղի Հանրապետութեան խորհրդարանի «Դաշնակցութիւն» խմբակցութեան ղեկավար Դաւիթ Իշխանեան, Հ.Յ.Դ. Արցախի Կեդրոնական կոմիտէի անդամ, Արցախի Հանրապետութեան Ազգային ժողովի փոխնախագահ Վահրամ Բալայեան, Հ.Յ.Դ. Կեդրոնական կոմիտէի անդամներ եւ «Դաշնակցութիւն» խմբակցութեան պատգամաւորներ:
Մամլոյ ասուլիսի բացման խօսքով հանդէս եկաւ Դաւիթ Իշխանեան, որ ներկաներուն տեղեկացուց, թէ Ֆրանսայի պատուիրակութեան այցելութեան կազմակերպումը նպատակ ունի անոնց ծանօթացնելու Արցախի ներքին կեանքին, ինչպէս նաեւ մօտէն անդրադառնալու արցախեան հարցին: Ուստի պատահական չէ, որ ասուլիսէն ժամեր առաջ պատուիրակութիւնը այցելած էր առաջնագիծ եւ ծանօթացած սահմանին վրայ տիրող իրավիճակին: Իշխանեան կարեւոր նկատած է նման այցելութիւններու կազմակերպումը եւ յոյս յայտնած, որ այդ մէկը կ՛ունենայ շարունակական բնոյթ:
Հանդիպումին ընթացքին լրագրողները զիրենք յուզող հարցերը ուղղեցին պատուիրակութեան ղեկավարին: Հարցումները կը վերաբերէին Անգարա-Փարիզ յարաբերութիւններուն, ղարաբաղեան տագնապի լուծման, Արցախ-Ֆրանսա յարաբերութիւններու սերտացման եւ այլն:
«Արցախն ու Հայաստանը պէտք է միշտ առաջնորդուին ժողովրդավարութեան եւ ազատութեան սկզբունքներով: Այդ երկուքը ամէն ինչէ զօրաւոր են եւ ի վերջոյ միշտ կը յաղթեն», շեշտեց Լը Ռու:

Ստեփանակերտի Յուշահամալիրին Մէջ՝ Յարգանքի Տուրք

nk5Արցախ գտնուող Ֆրանսայի խորհրդարանի ընկերվարական խմբակցութեան անդամները, խմբակցութեան ղեկավար Պրունօ Լը Ռուի գլխաւորութեամբ, շաբաթ առաւօտեան այցելեցին Ստեփանակերտի յուշահամալիր, ուր ծաղիկներ զետեղեցին Լեռնային Ղարաբաղի Հանրապետութեան գերագոյն խորհուրդի առաջին նախագահ Արթուր Մկրտչեանի շիրիմին եւ արցախեան պատերազմին նահատակուած ազատամարտիկներու յուշարձանին:
Անոնց ընկերակցեցան Հ.Յ.Դ. Բիւրոյի անդամներ Մուրատ Փափազեան եւ Կիրօ Մանոյեան, Հ.Յ.Դ. Արցախի Կեդրոնական կոմիտէի ներկայացուցիչ, Լեռնային Ղարաբաղի Հանրապետութեան Ազգային ժողովի «Դաշնակցութիւն» խմբակցութեան ղեկավար Դաւիթ Իշխանեան, ՀՅԴ Արցախի Կեդրոնական կոմիտէի անդամ, Լեռնային Ղարաբաղի Հանրապետութիւն Ազգային ժողովի փոխնախագահ Վահրամ Բալայեան, ՀՅԴ Կեդրոնական կոմիտէի անդամ, Լեռնային Ղարաբաղի Հանրապետութեան Ազգային ժողովի «Դաշնակցութիւն» խմբակցութեան պատգամաւոր Արմէն Սարգսեան:
Այնուհետեւ անոնք այցելեցին Արցախի խորհրդանիշ հանդիսացող «Մենք Ենք Մեր Սարերը» յուշարձան, ուր անոնց ներկայացուցին յուշարձանին կերտման պատմութիւնն ու խորհուրդը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Լայնածաւալ Պատերազմի Սադրանք
Next post Հ.Մ.Ը.Մ.-ի Պատգամաւորական 11-րդ Ընդհանուր Ժողովի Բացման Հանդիսութիւն

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles