«Փոքրիկ»-ը Կը Կազմակերպէ Հեքիաթահաւաք

0 0
Read Time:2 Minute, 2 Second

ՊՈԼԻՍ․- «Փոքրիկ» հեքիաթարանը կը կազմակերպէ «հեքիաթահաւաք» մը։ Այս նոր ձեռնարկութեամբ «Փոքրիկ»-ը կը փափաքի քաջալերել հեղինակները, խրախուսել նորեկ գրողները ու նպաստել հայ մանկական գրականութեան՝ նոր եւ ուրոյն ստեղծագործութիւններով։

«Հիմա գրելու ժամանակն է։ Եթէ կը սիրէք գրել, յաճախ կը կարդաք մանկական գրականութիւն, ձեզի անծանօթ չեն մանկական գրականութեան, մանկավարժութեան կամ հոգեբանութեան ոլորտները, կ՛ուզէք աւելի արդիական նիւթեր զարցագնել հեքիաթներուն մէջ, ուրեմն հրամմեցէ՛ք», կ՛ըսէ հեքիաթահաւաքի աշխատակազմը։

Հեքիաթահաւաքին մասնակցող հեքիաթի լեզուն պէտք է ըլլայ հայերէն ՝ արեւելահայերէն կամ արեւմտահայերէն։ Տարիքի սահմանափակում չկայ եւ որեւէ նիւթի մասին կարելի է գրել։ Հեքիաթները պէտք է ուղարկուին info@pokrig.org հասցէին մինչեւ 28 Փետրուար 2022։ Պիտի ընտրուին երեք հեքիաթներ եւ իւրաքանչիւր հեքիաթ պիտի ստանայ 250 տոլար մրցանակ։ Մրցանակաբաշխութիւնը տեղի պիտի ունենայ 31 Մարտ 2022ին։

Հեքիաթը պէտք է գրուի առաւելագոյն 500 բառով՝ Microsoft Word-ի վրայ գրաշարուած Sylfaen տառատեսակով եւ 12 տառաչափով։ Հեքիաթը նախապէս հրատարակուած պէտք չէ ըլլայ: Նոյն անձը առաւելագոյնը երեք հեքիաթով կրնայ մասնակցիլ։ Հեքիաթները մէկէ աւելի հեղինակներ կրնան ունենալ։

Մրցանակի արժանացած հեքիաթները արեւմտահայերէնով պիտի հրապարակուին «Փոքրիկ»-ի կայքին վրայ։

Հեքիաթահաւաքի աշխատակազմի անդամներն են՝ մանկական գիրքերու հեղինակ Անահիտ Սարգիսեան, Երեւանի «Խնկօ Ապոր» մանկական գրադարանի հեքիաթի բաժինի վարիչ Իսկուհի Աւետիսեան, Ամերիկայի Արեւմտեան թեմի Ազգային վարժարաններու Խնամակալ մարմինի գործադիր տնօրէն Թամար Թիւֆէնկճեան, Պոլսոյ մէջ հայերէնի ուսուցչուհի եւ «Փոքրիկ»-ի խմբագրական կազմի անդամ Մարի Գալայճը, Ամերիկայի Արեւելեան թեմի Ազգային առաջնորդարանի Ուսումնական խորհուրդի վարիչ տնօրէն Մարի Կիւլիւմեան եւ Լիբանանահայ բեմադրիչ Սէրուժ Յովսէփեան։

«Գրպաններդ խուզարկէ, բարձիդ տակն ալ լաւ նայէ,

պահուըտած բառերդ փնտռէ գտիր ու լեզուիդ վրայ, քով քովի շարէ…

Երկու բառ կամ երկու հարիւր բառ, թող ըլլայ հի՛նգ հարիւր բառ,

յետոյ շիտա՛կ նստէ ու ծուռ գրէ կամ ծո՛ւռ նստէ եւ շիտակ գրէ,

փոքրիկ հեքիաթ մը շարադրէ․․․», կ՛ըսէ Անահիտ Սարգիսեան։

Նշենք, որ «Փոքրիկ» հեքիաթարանը հիմնուած է 2014-ին, Պոլսոյ մէջ եւ մինչեւ այսօր հրապարակած է 150է աւելի հեքիաթներ՝ արեւմտահայերէնով։ Անոր հեքիաթները կը պատրաստուին 4-7 եւ 8-11 տարիքի մանուկներու համար։ Կայքին առընթեր, հեքիաթները կը հրապարակուին նաեւ YouTube-ի վրայ: Այս հեքիաթներուն իւրաքանչիւրը գունաւոր շարժուն պատկերներով կը զարդարուի եւ կը ձայնագրուի: Հեքիաթարանը կը պարունակէ նաեւ հեքիաթաշարքեր, երգեր եւ շուտասելուկներ։ Հեքիաթներուն կից պատրաստուած են աշխատութեան էջեր, որպէսզի փոքրիկները աւելի լաւ ըմբռնեն հեքիաթները եւ ուսուցիչները դիւրութեամբ զրուցեն անոնց հետ հեքիաթներու բովանդակութեան մասին: «Փոքրիկ»ը կը կազմակերպէ «Հեքիաթատօն», կ՛այցելէ դպրոցներ եւ կը ձեռնարկէ աշխատանոցներ։ Ներկայիս անոր կը հետեւին հեռու մօտիկ 21 երկիրներ: Հեռու մօտիկ, փոքրիկ ընթերցասէրներ ամէն ամիս աւելի քան 7000 անգամ կ՛այցելեն «Փոքրիկ»-ի աշխարհը։

Յաւելեալ տեղեկութիւններու համար դիմել հետեւեալ յղումներով․

www.pokrig.org

Youtube : Pokrig Hekiataran

Instagram : @pokrig_hekiataran

Fb :@pokrig

Twitter: @Pokrig

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles