Մարտ 8-ին, Ֆրանսահայ Կապոյտ խաչ միութեան նախաձեռնութեամբ Հայոց ցեղասպանութեան 100-ամեակին նուիրուած ձեռնարկներու ծիրէն ներս եւ Կիներու միջազգային օրուան առիթով, լոյսերու քաղաքի՝ Փարիզի Սէն գետի ափին, Կոմիտասի արձանի մօտ, 
տեղի ունեցաւ յուշակոթողի բացման արարողութիւն` գլխաւորութեամբ Փարիզի քաղաքապետ Անն Հիտալկոյի եւ Ֆրանսայի մէջ Հայաստանի դեսպան Վիգէն Չիտեչեանի: Ձեռնարկին ներկայ եղան Փարիզի քաղաքապետական խորհուրդի բազմաթիւ անդամներ, հասարակական-քաղաքական ու պետական գործիչներ, մշակութային ու լրատուական շրջանակներու ներկայացուցիչներ, հարիւրաւոր ֆրանսահայեր եւ տեղացիներ:
Դեսպան Չիտեչեան իր խօսքին մէջ շնորհակալութիւն յայտնեց Փարիզի, ինչպէս նաեւ ամբողջ Ֆրանսայի իշխանութիւններուն` ծագումով հայ իրենց քաղաքացիներու նախնիներու յիշատակին նկատմամբ ընդգծուած հոգատար վերաբերմունքին եւ մնայուն ուշադրութեան համար:
