ՓԱԿՈՒՄ՝ ՀԱՄԱ-Հ.Մ.Ը.Մ.ԱԿԱՆ 9-ՐԴ ԲԱՆԱԿՈՒՄԻՆ

Համա-Հ.Մ.Ը.Մ.ական 9րդ բանակումը աւարտեցաւ Կիրակի Օգոստոս 8, 2010-ին, Բիւրականի բանակավայրին մէջ: Աշխարհի 18 երկիրներէն Հայաստան ժամանած 560 սկաուտները յուզուած, պատմութեան յանձնեցին այս յոյժ յիշատակելի բանակումը: Վերջին երկու օրերուն անոնք անմոռանալի պահեր անցուցին՝ այցելելով Սեւանայ լիճ, նաեւ խումբերու բաժնուելով այցելեցին Գառնի, Գեղարդ, Խոր Վիրապ, Նորավանք, Սաղմոսավանք, Մուղնի, Օշական, Հաղբատ եւ Սանահին: Փակման հանդիսութիւնը տեղի ունեցաւ յետմիջօրէին՝ ներկայութեամբ Հայաստանի Հանրապետութեան Ազգային Ժողովի անդամ եւ Հ.Յ.Դ. Հայաստանի Գերագոյն Մարմինի անդամ Արտաշէս Շահպազեանի, Հ.Մ.Ը.Մ.ի Կեդրոնական Վարչութեան անդամ եղբայրներ՝ Գրիգորիս Պողարեանի, Միհրան Շիմշիրեանի, Կարպիս Գապասագալեանի, Յարութ Յարութիւնեանի եւ Գարլոս Սէֆէրեանի: Փակման հանդիսութիւնը սկսաւ »Մեր Հայրենիք« քայլերգով, որմէ ետք բարի գալուստի խօսք արտասանեց բանակումի հերթապահ եղբ. Ռոմանոս Պետրոսեան ու հրաւիրեց բանակումի փոխ խմբապետուհի քոյր Թալին Օրտողլեանը փոխանցելու զարգացման մրցումին արդիւնքները: Առաջին դիրքը գրաւեց Երուսաղէմի Մեկուսի Շրջանը, երկրորդ դիրքը Արեւելեան Միացեալ Նահանգներու Շրջանը, իսկ երրորդ դիրքը՝ Լիբանանի շրջանը: Ապա բանակումի հերթապահ եղբ. Ռոմանոս Պետրոսեան հրաւիրեց Կեդրոնական Վարչութեան սկաուտական ներկայացուցիչ եղբ. Կարպիս Գապասագալեանը, »Արարատեան կարգ«ի տուչութիւն կատարելու համար: Եղբ. Գապասագալեան փոխանցեց, թէ միութեան պատմութեան մէջ առաջին անգամ ըլլալով կÿիրագործուի »Արարատեան կարգ«ը եւ հրաւիրեց քոյրեր Ալին Պաղտասարեանը (Արեւելեան Միացեալ Նահանգներէն), Թալին Հինտոյեանը (Արեւմտեան Միացեալ Նահանգներէն), եղբայրներ Ռոմանոս Պետրոսեանը (Հ.Մ.Ը.Մ.-Հ.Ա.Ս.Կ.էն), Յակոբ Չպլաքեանը, Ժանօ Քէչէճեանը (Լիբանանէն), Յարութ Պաղամեանը, Ռուբէն Նալպանտեանը (Երուսաղէմէն), Ակուսթին Անալեանը (Հարաւային Ամերիկայէն), Աւետիս Տէրվիշեանը (Սուրիայէն) բեմ՝ ստանալու իրենց վկայագիրներն ու մետալները: Ծափողջոյններով, եղբայրներն ու քոյրերը բարձրացան բեմ, ուր Կեդրոնական Վարչութեան անդամները կատարեցին »Արարատեան կարգ«ի տուչութիւնը: Ապա, մասնակից պատուիրակութիւնները իրենց յուշանուէրները փոխանցեցին Կեդրոնական Վարչութեան, բանակումի խմբապետութեան եւ Հ.Մ.Ը.Մ.-Հ.Ա.Ս.Կ.ի Վարչութեան: Կեդրոնական Վարչութիւնը իր կարգին յուշանուէրներ փոխանցեց մասնակից պատուիրակութիւններուն ու բանակումի խմբապետական կազմին: Յուշանուէրներ փոխանցուեցան նաեւ Կեդրոնական Վարչութեան եւ Հ.Մ.Ը.Մ.-Հ.Ա.Ս.Կ.ի գործավարութեան, »Մարզիկ« պաշտօնաթերթի թղթակից քոյր Սեւան Նազարեանին, բանակումի խոհանոցային բաժինը ստանձնած Յարութ եւ Այտա Մատէնեաններուն, ինչպէս նաեւ բուժօգնութեան պատասխանատուներուն: Հ.Մ.Ը.Մ.-Հ.Ա.Ս.Կ.ի Վարչութեան ատենապետ եղբ. Հրաչ Շմաւոնեան շնորհաւորեց մասնակիցներուն բանակումին հեզասահ ընթացքին համար՝ նշելով, որ Հ.Մ.Ը.Մ.-Հ.Ա.Ս.Կ.ի քոյրերն ու եղբայրները միշտ պատրաստ են սփիւռքահայ իրենց քոյրերն ու եղբայրները հիւրընկալելու Հայաստանի մէջ: Ան շնորհակալական խօսք ուղղեց բանակումի խմբապետական կազմին եւ յատկապէս բանակումի ընդհանուր խմբապետ եղբ. Օշին Փիրումեանին, որուն յարատեւ եւ հետեւողական աշխատանքին շնորհիւ կարելի եղաւ իրագործել Համա-Հ.Մ.Ը.Մ.ական 9րդ բանակումը: Բանակումի ընդհանուր խմբապետ եղբ. Օշին Փիրումեան խօսքը մասնակիցներուն ուղղելով նշեց որ բանակումի սկիզբ կոչ ուղղած էր իրականութեան վերածել »Գործենք միասնաբար« նշանաբանը եւ մասնակիցները գիտակից նշանաբանին անվերապահ աջակցութեամբ ապահովեցին բանակումին յաջողութիւնը: Ան փոխանցեց, թէ Հ.Մ.Ը.Մ.ական բանակումներու պատմութեան մէջ աւելցած է նոր գեղեցիկ էջ մը, ուր ամփոփուած ու մարմնաւորուած են 18 երկիրներէն համախմբուած հայ երիտասարդներուն աշխատանքը, յուշերն ու իղձերը՝ աւելցնելով, որ այս բոլորին հեղինակները մասնակիցներն են իրենց նուիրուածութեամբ, սկաուտական ոգիով ու խանդավառութեամբ: Եղբ. Փիրումեան նշեց, որ 560 սկաուտները բանակումի ընթացքին տարբեր աշխատանքներու մասնակցած են, յաղթահարած են զանազան փորձութիւններ, մարզած են միտքն ու մարմինը ու նոր ընկերներու ծանօթացած են: Բաժանման պահը հասած է ու այդ ամէնէն դժուար պահն է, փոխանցեց եղբ. Փիրումեան՝ յիշեցնելով սակայն, որ բոլորին սիրտերուն մէջ կը հնչէ »միայն ցտեսութիւն եղբայրք, միայն ցտեսութիւն, դարձեալ իրար կը հանդիպինք…«ը: Փիրումեան շնորհակալութեան խօսք ուղղեց բոլոր պատուիրակութիւններու պատասխանատուներուն, որոնք անգնահատելի աջակցութիւն ցուցաբերեցին բանակումի խմբապետական կազմին: Ան նաեւ, բանակումի մասնակիցներուն անունով շնորհակալական խօսք ուղղեց բանակումի խոհանոցի պատասխանատու կազմին՝ Յարութ եւ Այտա Մատէնեաններուն, որոնք անշահախնդրօրէն իրենց եռանդն ու ժամանակը տրամադրեցին գործի յաջողութեան համար: Շնորհակալական խօսք ուղղուեցաւ նաեւ Կարմիր Խաչի կամաւորներուն, որոնք բանակավայրին մէջ մնայուն ներկայութիւն եղան բանակումի ամբողջ տեւողութեան: Վերջին բաժնով, եղբ. Փիրումեան նշեց որ բանակումը առիթ եղաւ բոլորին՝ հայրենիք վերադառնալու: Ան յոյս յայտնեց, որ այսպիսով իրենց սէրը հայրենի հողին հանդէպ աւելի ամրանայ եւ պատճառ դառնայ, որ կրկին ու կրկին վերադառնան հայրենիք: Հ.Յ.Դ. Հայաստանի Գերագոյն Մարմինի խօսքը փոխանցեց Արտաշէս Շահպազեան: Ան ողջունեց մասնակիցներուն ներկայութիւնը հայրենիքին մէջ ու նշեց որ իրենք են ապագան, որուն շնորհիւ հայրենիքը կը բարգաւաճի ու կը յառաջանայ: Ան շեշտեց Սփիւռք-Հայաստան անքակտելի կապերու իրողութիւնը, նշելով որ միասնաբար կարելի է իրագործել զանազան նպատակներ: Հայաստանի Հանրապետութեան Ազգային Ժողովի մէջ Դաշնակցութեան խմբակցութեան եւ Հ.Յ.Դ. Հայաստանի Գերագոյն Մարմինի կողմէ Ա. Շահպազեան շնորհաւորեց կազմակերպողները, իրագործողներն ու մասնակիցները՝ նշելով, որ հայրենիքը միշտ կը սպասէ բոլորին: Հ.Մ.Ը.Մ.ի Կեդրոնական Վարչութեան խօսքը փոխանցեց ատենապետ եղբ. Գրիգորիս Պողարեան: Ան նշեց, որ հրաժեշտի պահը հասած է, սակայն սոսկական բանակումի թիւ մը չէ, որ կþաւելնայ նախորդներուն վրայ, այլ բանակում, որ առաւել կենսունակութիւն տուած է միութեան եւ վերանորոգած Հ.Մ.Ը.Մ.ական ուխտը, վերահաստատած հայրենիքի հանդէպ սէրն ու հաւատարմութիւնը եւ վերարժեւորած սկաուտին դերը: Եղբ. Պողարեան նշեց, որ յառաջիկայ օրերուն բոլորը պիտի վերադառնան իրենց տուները աւելի հմտացած սկաուտական գիտելիքներով եւ շատ աւելի հայացած: Ան շեշտեց, թէ այդ է արդէն Հ.Մ.Ը.Մ.ին առաքելութիւնը, հայացնել, իմաստային ամբողջ խորքով հայացնել յաջորդական սերունդները: Եղբ. Պողարեան փոխանցեց թէ Համա-Հ.Մ.Ը.Մ.ական 9րդ բանակումը պատմութեան պիտի անցնի նաեւ տարիներու երազի մը իրականացումով՝ »Արարատեան կարգ«ի տուչութեամբ: Ան հաստատեց, որ Հ.Մ.Ը.Մ.ի պատմութեան մէջ առաջին անգամ ըլլալով խմբապետ-խմբապետուհիներ ամբողջացնելով »Արարատեան կարգ«ի պայմանները ստացան համապատասխան մետալ եւ վկայագիր: Եղբ. Պողարեան նշեց, որ Արարատեան կարգը ցուցանիշ չէ փառքի, այլ պարզապէս հաստատական թէ ենթական իր »աղքատի լուման« զետեղած է ազգապահպանումի եւ ազգակերտման գանձանակին մէջ: Եղբ. Պողարեան շնորհակալութեան խօսք ուղղեց հայրենի պատկան նախարարութիւններուն իրենց տածած հոգածութեան համար: Շնորհակալութիւն յայտնեց բանակումի ծրագրաւորումին եւ գործադրութեան մասնակցող բոլոր քոյրերուն եւ եղբայրներուն անխտիր: Շնորհակալութիւն յայտնեց ծնողներուն, որոնք իրենց զաւակները վստահած են Հ.Մ.Ը.Մ.ին, որ դարձաւ երկրորդ ծնողք եւ երկրորդ դպրոց: Իսկ վերջին շնորհակալական խօսքը ուղղեց բանակումի մասնակիցներուն, որոնց գործակցութեամբ բանակումը աւարտեցաւ յաջողութեամբ: Ապա, տեղի ունեցաւ Համա-Հ.Մ.Ը.Մ.ական 9րդ բանակումի վերջին դրօշակի արարողութիւնը, որմէ ետք բանակումի դրօշը փոխանցուեցաւ Կեդրոնական Վարչութեան սկաուտական ներկայացուցիչ եղբ. Կարպիս Գապասագալեանի, որ իր կարգին, մասնակիցներուն ծափողջոյններուն վրայ, բանակումի դրօշը փոխանցեց բանակումի ընդհանուր խմբապետ եղբ. Օշին Փիրումեանին: Նշենք թէ Հայաստանի Հանրապետութեան փոխ վարչապետ եւ տարածքային կառավարման նախարար մեծարգոյ Արմէն Գէորգեան եւ Սփիւռքի նախարար տիկ. Հրանոյշ Յակոբեան Հինգշաբթի, Օգոստոս 5, 2010ին այցելութիւն տուին Համա-Հ.Մ.Ը.Մ.ական 9րդ բանակումի մասնակիցներուն: Անոնց կÿընկերակցէին »Արի տուն« ծրագիրի մասնակիցները: Հիւրերը բանակավայրի մուտքին ընդունուեցան Հ.Մ.Ը.Մ.ի Կեդրոնական Վարչութեան եւ բանակումի խմբապետութեան կողմէ: Բանակումի փողկապը փոխանցուեցաւ փոխ վարչապետին ու նախարարուհիին: Ապա, պաշտօնական ընդունելութեամբ հիւրերը առաջնորդուեցան բանակավայր: Հիւրերուն բարի գալուստի խօսք արտասանեց բանակումի ընդհանուր խմբապետ եղբ. Օշին Փիրումեան: Ան նշեց որ բանակումի հինգերորդ օրը հասած է իր աւարտին եւ մասնակիցները օրը անցուցած են սկաուտական մրցոյթներով: Ապա ան հրաւիրեց Կեդրոնական Վարչութեան սկաուտական ներկայացուցիչ եղբ. Կարպիս Գապասագալեանը, որպէսզի Կեդրոնական Վարչութեան խօսքը փոխանցէ ներկաներուն: Այս վերջինը ողջունեց փոխ վարչապետին ու Սփիւռքի նախարարուհիին ներկայութիւնը բանակավայրէն ներս: Ան նշեց որ Սփիւռքի Հ.Մ.Ը.Մ.ական սկաուտները նախապէս որեւէ պահանջք ներկայացուցած չեն Սփիւռքի նախարարութեան, սակայն առիթը պատեհ համարելով անոնք կը խնդրեն որ նախարարութիւնը աւելի մեծ բանակավայր մը տրամադրէ Հ.Մ.Ը.Մ.ին: Ան նշեց որ բանակավայրի տարածքին պատճառով մասնակիցներու թիւը սահմանափակուած էր, իսկ աւելի մեծ բանակավայրի պարագային, մասնակիցներուն թիւը կը բարձրանայ հազարէն աւելի: Խօսք առաւ փոխ վարչապետ Արմէն Գէորգեան, որ իր ուրախութիւնը յայտնեց համա-Հ.Մ.Ը.Մ.ական 9րդ բանակումի մասնակիցներուն ծանօթանալու առիթով: Ան խոստացաւ Հ.Մ.Ը.Մ.ին աւելի ընդարձակ բանակավայր տրամադրելու փափաքը հետապնդել: Յայտարարուեցան երկիրներու ներկայացման (մշակոյթ, արուեստ, աւանդութիւններ) արդիւնքները: Առաջին հանդիսացաւ Սուրիոյ պատուիրակութիւնը, երկրորդ՝ Հայաստանի պատուիրակութիւնը եւ երրորդ Լիբանանի պատուիրակութիւնը: Յատուկ յուշանուէրներ յանձնուեցան յաղթական շրջաններուն: Կատարուեցաւ դրօշակի արարողութիւն եւ »Յառաջ Նահատակ« քայլերգով աւարտեցաւ օրուան հիւրընկալութիւնը: Հայաստանի Հանրապետութեան Սփիւռքի նախարարութեան հովանաւորութիւնը վայելող »Արի տուն« ծրագիրի մասնակիցները այցելեցին Բիւրականի բանակավայր: Անոնք շրջեցան կրպակները ու ծանօթացան զանազան երկիրներու մշակոյթներուն: Ապա անոնք ճաշի հիւրը եղան համա-Հ.Մ.Ը.Մ.ական բանակումի մասնակիցներուն: Անոնք նաեւ ներկայ գտնուեցան դրօշակի արարողութեան, որմէ ետք խօսք առաւ բանակումի ընդհանուր խմբապետ Օշին Փիրումեան եւ բարի գալուստ մաղթեց »Արի տուն« ծրագիրի մասնակիցներուն Հ.Մ.Ը.Մ.ի բանակավայրէն ներս: Բանակումի եւ »Արի տուն«ի մասնակիցներուն յատուկ անակնկալ կը սպասէր երեկոյեան: Լէյլա Սարիբէկեան եւ Արսէն Գրիգորեան իրենց ներկայութեամբ եւ հայրենասիրական երգերով խանդավառեցին բոլորին, հայրենի հողին վրայ գտնուելու գոհունակութիւնը կրկնապատկելով: Համա-Հ.Մ.Ը.Մ.ական 9րդ բանակումը պատմութեան յանձնուեցաւ իւրայատուկ եւ յուզիչ յիշատակներով, »Յառաջ նահատակ« քայլերգով: Ապա հնչեց »Ցտեսութիւն մըն է եղբայրք, միայն Ցտեսութիւն…«:

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

ՓԱԿՈՒՄ՝ ՀԱՄԱ-Հ.Մ.Ը.Մ.ԱԿԱՆ 9-ՐԴ ԲԱՆԱԿՈՒՄԻՆ

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

ԳԵՐՄԱՆԻՈՅ ՄԷՋ ԼՈՅՍ ՏԵՍԱՒ THE TALLIS SCHOLARS ՁԱՅՆԱՅԻՆ ՀԱՄՈՅԹԻ 2017 ԹՈՒԱԿԱՆԻ ՎԵՆԵՏԻԿԵԱՆ ԲԱՑԱՌԻԿ ՀԱՄԵՐԳԻ ՆԿԱՐԱՀԱՆՈՒՄԻ ԵՒ ՁԱՅՆԱԳՐՈՒԹԵԱՆ ԶՈՅԳ ԽՏԱՍԱԼԻԿՆԵՐՈՒ ԱՐԿՂԻԿԸ

Մահացած է Ճարտարապետ Եւ Պատմական Ժառանգութեան Պահպանութեան Նուիրեալ Վարուժան Առաքելեանը

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է