0
0
ԵՐԵՒԱՆ (“Արմէնփրես“).- Հայաստանի Արտաքին Գործոց նախարարութեան մամլոյ եւ տեղեկատուութեան վարչութիւնը կը տեղեկացնէ, թէ Յունիս 18-ին, Փարիզի մէջ, Ե.Ա.Հ.Կ.-ի Մինսքի խմբակի համանախագահները, որոնց կարգին դեսպաններ Ռոպըրթ Պրատքէ` Միացեալ Նահանգներ, Իկոր Փոփով` Ռուսիա եւ Ժաք Ֆոր` Ֆրանսա, միացեալ հանդիպում ունեցան Հայաստանի Արտաքին գործոց նախարար Եդուարդ Նալպանտեանի եւ Ատրպէյճանի Արտաքին Գործոց նախարար Էլմար Մամետիարովի հետ:
Հանդիպման կը մասնակցէր նաեւ Ե.Ա.Հ.Կ.-ի գործող նախագահի անձնական ներկայացուցիչ Անճէյ Քասփըրչիք: Համանախագահները նախարարներուն հետ քննարկեցին Արցախի տագնապի լուծման հոլովոյթին մէջ յառաջընթաց արձանագրելու նպատակով ձեռնարկուելիք քայլերը, ինչպէս նաեւ մարդկային շփումներու զարգացման, պատմա-մշակութային արժէքներու պահպանութեան ու զինադադարի խախտումներու հետաքննութեան մեքանիզմի ստեղծման ուղղութեամբ հետագայ աշխատանքները:
Համանախագահները նաեւ խոր մտահոգութիւն յայտնեցին սահմանային գիծերուն վրայ վերջին միջադէպերուն առիթով եւ ընդգծեցին 1994 թուականի զինադադարի համաձայնութեան յարգման անհրաժեշտութիւնը: Արտաքին գործոց նախարարները իրենց վճռականութիւնը յայտնեցին շարունակելու աշխատանքը Մինսքի խմբակի համանախագահներուն հետ` խաղաղ լուծման ուղղութեամբ եւ իրենց պատրաստակամութիւնը` ձեռնարկելու վստահութեան ամրապնդման միջոցներ, ինչ որ կրնայ բարելաւել մթնոլորտը բանակցութիւններու ընթացքին համար:
Հանդիպումը անցաւ կառուցողական եւ դրական մթնոլորտի մէջ:
