Վաղարշապատի Աւագանիի Ընտրութիւններ․- Հ․Յ․Դ․-ի Թեկնածուն՝ «Յաղթանակ» Դաշինքը Գլխաւորած Սեւակ Խաչատրեանն Է
ԵՐԵՒԱՆ․- Հայ Յեղափոխական Դաշնակցութիւնը պիտի մասնակցի Նոյեմբեր 16-ին կայանալիք Վաղարշապատ (Էջմիածին) համայնքի աւագանիի ընտրութիւններուն, գործակցելով «Յաղթանակ» դաշինքին հետ։ Նախընտրական ցուցակը պիտի գլխաւորէ Սեւակ Խաչատրեան։
Տեղւոյն Հ․Յ․Դ․ «Վաչէ Ռոստոմեան» կոմիտէութիւնը, հաղորդագրութեամբ մը, կը տեղեկացնէ․-
«Կարեւորելով մեր համայնքին՝ ամբողջ հայութեան հոգեւոր ու մշակութային կեդրոնին զարգացում, արդարութիւն եւ հոգատարութիւն բերելու հանձնառութիւնը, եւ գիտակցելով համապետական ընտրութիւններէն առաջ Վաղարշապատի խոշորացուած համայնքի ընտրութիւններուն նշանակութիւնը՝ կը կոչենք՝
– Վաղարշապատ համայնքի սիրելի բնակիչներուն՝ մասնակցիլ սպասուող ընտրութիւններուն եւ, իրենց ձայնը վստահելով պատասխանատու ուժերուն, կանխել մեր ինքնութեան դէմ ուղղուած արշաւները եւ համայնքի համար բանալ զարգացման նոր էջ մը։
– Ընդդիմադիր բոլոր ուժերուն՝ գործել համախմբումի տրամաբանութեամբ, բացառել իշխող ուժին հետ նախընտրական կամ հետընտրական որեւէ համագործակցութիւն, եւ իրենց ամբողջ ջանքերը ներդնել հանուն հաղթանակի կերտման»։
