ՎԱՀԱՆԸ ՊԻՏԻ ԸԼԼԱՐ 60 ՏԱՐԵԿԱՆ

0 0
Read Time:3 Minute, 22 Second

1471348941-1833

Եթէ չմեկնէր ան, այսօր պիտի տօնէր իր 60-րդ տարեդարձը:
Վահան Յովհաննիսեան ծնած էր Օգոստոս 16, 1956-ին:
1973-ին, Երեւանի թիւ 55 դպրոցը աւարտելէ ետք, կիսատ ձգելով Բրիւսովի հիմնարկի մէջ իր ուսումը` ան մեկնած է Մոսկուա մասնագիտացման համար: 1978-ին աւարտած է Մոսկուայի Մանկավարժական համալսարանը` գիտական կոչումներով պատմութեան եւ հնագիտութեան մէջ: Աւարտելէ ետք նշանակուած է աշխատանքի, հարաւային Սիպերիոյ մէջ: 1978-1980 ան ծառայած է խորհրդային բանակին:
Բանակային ծառայութեան աւարտէն ետք Վահան Յովհաննիսեան գերադասեց վերադառնալ հայրենիք: Աշխատանքի կոչուեցաւ «Էրեբունի» թանգարանին մէջ, սկիզբը` որպէս գիտաշխատող, հետագային` իբրեւ գիտահետազօտական բաժնի վարիչ: Իսկ 1989 թուականէն ետք ան աշխատանքի կոչուեցաւ Հայաստանի Գիտութիւնների ազգային ակադեմիայի հնագիտութեան եւ ազգագրութեան հիմնարկին մէջ:
Արցախեան շարժման պոռթկումի առաջին իսկ պահերէն Վահան Յովհաննիսեան նետուեցաւ պայքարի ասպարէզ: 1989-ին անդամագրուեցաւ Հ.Յ. Դաշնակցութեան:va

Իբրեւ նորագիր դաշնակցական եւ Հ.Յ.Դ. Հայաստանի պատասխանատու մարմինի անդամ` 1990-էն սկսեալ ան գործօն մասնակցութիւն բերաւ Արցախի ազատագրական պայքարի դաշնակցական կազմակերպման, ծաւալումին եւ ղեկավարումին:
Իսկ երբ Օգոստոս 1990-ին Հ.Յ.Դ. պաշտօնապէս բացայայտեց կազմակերպական իր ներկայութիւնը հայրենիքի մէջ, եւ նոյեմբեր 1990-ին գումարուեցաւ Հ.Յ.Դ. Հայաստանի կազմակերպութեան անդրանիկ Շրջանային ժողովը, ան մաս կազմեց Հ.Յ.Դ. Հայաստանի անդրանիկ Կեդրոնական կոմիտէին:
Հոկտեմբեր 1991-ին, Հայաստանի անդրանիկ նախագահական ընտրութեանց շրջանին, Հ.Յ. Դաշնակցութիւնը Վահան Յովհաննիսեանին թեկնածու առաջադրեց փոխ-նախագահի պաշտօնին` նախագահական թեկնածու Սօս Սարգսեանի կողքին: Թէեւ Դաշնակցութեան թեկնածուները քուէներու միայն չորս տոկոսը ստացան, այդուհանդերձ, ան արժանացաւ հանրային կարծիքի ընդգծուած համակրանքին եւ ունեցաւ փայլուն մուտք` հայրենի քաղաքական բեմահարթակ:1471348941-6388
Վահան Յովհաննիսեան նոյնպէս արժանացաւ Դաշնակցութեան արտերկրի կազմակերպական շրջաններու ջերմ ընդունելութեան, երբ Հայաստանի նախագահական անդրանիկ ընտրութեանց աւարտէն ետք գործուղուեցաւ սփիւռք` Հ.Յ.Դ. շարքերուն եւ համակիր բազմութեանց զեկուցելու համար հայրենիքի մէջ ընթացող քաղաքական բախտորոշ խմորումներուն մասին:
Հոկտեմբեր 1992ին, երբ Հ.Յ.Դ. 25-րդ Ընդհանուր ժողովին Երեւանի մէջ գումարումը յունիսին խափանուեցաւ Հայաստանի անդրանիկ նախագահ Լեւոն Տէր Պետրոսեանի կողմէ, նոյն Ընդհանուր ժողովը իր աշխատանքը շարունակեց Փարիզի մէջ, ուր Հ.Յ.Դ. Բիւրոյի նորընտիր կազմին անդամ ընտրուելով` Վահան Յովհաննիսեան ստանձնեց Հ.Յ.Դ. մարտական-ապահովական գործին պատասխանատուութիւնը: Իսկ 1994-ի յուլիսին, Հ.Յ.Դ. Բիւրոյի օրուան ներկայացուցիչ Հրայր Մարուխեանի ուղեղի կաթուածով անշարժացումէն ետք, Վահան Յովհաննիսեանի ուսերուն դրուեցաւ նաեւ Հ.Յ.Դ. հայրենական կազմակերպութեան մօտ Հ.Յ.Դ. Բիւրոյի ներկայացուցիչի պատասխանատուութիւնը:
Յուլիս 1995-ին Վահան Յովհաննիսեան ձերբակալուեցաւ եւ բանտարկուեցաւ Հայաստանի իշխանութեանց կողմէ` հակապետական յեղաշրջման փորձ կատարած ըլլալու քաղաքական ամբաստանութեամբ, որ սակայն բնաւ չհաստատուած մեղադրանք մնաց մինչեւ վերջ: Ան կալանքի տակ պահուեցաւ մինչեւ յունուար 1998-ի Լեւոն Տէր Պետրոսեանի հրաժարեցումը նախագահական պաշտօնէն:
Իր բանտարկութեան շուրջ երեք տարիներու շրջանին, կալանքի տակ գտնուելով հանդերձ, ան 1997-ին հեռակայ կարգով ընտրուեցաւ Հ.Յ.Դ. Հայաստանի Գերագոյն մարմինի անդամ: Նոյնպէս, իր բանտարկութեան եւ դատավարութեան ամբողջ տեւողութեան ան շարունակեց քաղաքական գործունէութիւն ծաւալել: Դատարանէն ներս անոր ունեցած ելոյթները եւ մամուլով հրապարակումները քաղաքական կարեւոր դեր ունեցան, այդ օրերուն, հայրենիքի մէջ տիրող ներքաղաքական ծանր տագնապը յաղթահարելու առումով:1471348943-67881471348942-0864

Հայաստանի իշխանափոխութեան հետեւող քաղաքական նոր իրադրութեան մէջ, իր ազատութիւնը վերագտած Վահան Յովհաննիսեան գլխաւորեց 1999-ի Հայաստանի Ազգային ժողովի Հ.Յ.Դ. պատգամաւորական թեկնածուներու համամասնական ցուցակը, թէեւ միաժամանակ իր թեկնածութիւնը առաջադրած էր 17-րդ մեծամասնական ընտրատարածքէն, ուրկէ եւ ընտրական յաղթանակ արձանագրեց: Նորակազմ Ազգային ժողովին մէջ ան ստանձնեց պաշտպանութեան, ազգային անվտանգութեան եւ ներքին գործոց մշտական յանձնաժողովի նախագահութիւնը:
2003-ին եւ 2007-ին Վահան Յովհաննիսեան դարձեալ ընտրուեցաւ Հայաստանի խորհրդարանի պատգամաւոր եւ երկու անգամուն ալ ստանձնեց Ազգային ժողովի փոխնախագահի պատասխանատուութիւնը: Այդ պաշտօնը վարեց մինչեւ 2008 թուականը: Այդ ժամանակահատուածին ան ղեկավարեց Հայաստանի ԱԺ պատուիրակութիւնը ԵԱՀԿ խորհրդարանական վեհաժողովին մօտ, նոյնպէս ընտրուեցաւ Հայաստան-Ռուսիա եւ Հայաստան-Պիելոռուսիա միջխորհրդարանական յանձնաժողովներու համանախագահ:
2008-ին Վահան Յովհաննիսեան մասնակցեցաւ Հայաստանի նախագահական ընտրութիւններուն` իբրեւ Հ.Յ.Դ. նախագահական թեկնածու: 2012-ի մայիս 6-ին դարձեալ Ազգային ժողովի պատգամաւոր ընտրուեցաւ համամասնական ընտրակարգով` Հ.Յ.Դ. համամասնական ցուցակով: Ղեկավարեց Հայաստանի առաջին պատուիրակութիւնը Եւրանեսթ խորհրդարանական վեհաժողովին` հանդիսանալով Եւրանեսթի պիւրոյի անդամ:
2013-ի դեկտեմբեր 28-ին Հայաստանի նախագահ Սերժ Սարգսեանի հրամանագիրով Վահան Յովհաննիսեան նշանակուեցաւ Գերմանիոյ մէջ Հայաստանի արտակարգ եւ լիազօր դեսպան:
Վահան Յովհաննիսեան Հ.Յ.Դ. Բիւրոյի անդամ վերընտրուեցաւ 2000 թուականի յունուարին եւ մինչեւ իր Հայաստանի դեսպան նշանակումը, 2013-ի դեկտեմբերին, շարունակեց գործել իբրեւ Հ.Յ.Դ. Բիւրոյի անդամ` վերընտրուելով 2004-ի, 2008-ի եւ 2011-ի Հ.Յ.Դ. Ընդհանուր ժողովներուն կողմէ:
Վահան Յովհաննիսեանի առողջական վիճակը արագ անկումի մատնուեցաւ վերջին տարիներուն` շագանակագեղձի քաղցկեղի բարդութեանց պատճառով: Ան մահացաւ Պերլին, 2014 թուականի Դեկտեմբերի 28-ին:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles