0
0
Սիրելի Հայրենակիցներ,
Բոլորս ալ արդէն իսկ տեղեակ ենք, որ տարիէ մը աւելի, Սուրիան պատերազմական նեղ պայմաններէ կ՛անցնի: Այդ երկիրը, ուր միշտ Քրիստոնեաները, եւ ի մասնաւորի հայերը, երկար տարիներու խաղաղութիւն կը վայելէին, ահա դժբախտաբար` զոհ կը դառնայ քաղաքական եւ պատերազմական աղիտալի պայմաններու:
Արդ, տրուած ըլլալով որ Սուրիոյ մէջ գտնուող մեր հայ քոյրերն ու եղբայրները, անկախաբար թէ ինչ համայնքի կամ կուսակցութեան կը պատկանին անոնք, դժուարագոյն պայմաններէ կ՛անցնին սոյն պատերազմին պատճառաւ, որպէս անդամ Սուրիահայերու Օգնութեան ֆոնտի կեդրոնական յանձնախումբին, կը միանամ սոյն յանձնախումբին միւս անդամ եւ անդամուհիներուն, կոչ ուղղելով մեզի բոլորիս ալ, որ առատ նուիրատուութիւններով հասնինք մեր Սուրիահայ տառապող քոյրերուն ու եղբայրներուն:
Մեր ազգային պարտականութիւնն է, սիրելի հայրենակիցներ, հասնիլ մեր կարօտեալ ազգակիցներուն իրենց այս նեղ պայմաններուն մէջ, եւ վստահ ըլլանք, որ Տէրը պիտի տեսնէ ու պիտի հատուցանէ մեզի մեր քրիստոնէական այս վսեմ արարքին համար:
Հ. Թովմաս Վրդ. Կարապետեան
Ս. Աննա Հայ Կաթողիկէ Եկեղեցւոյ Ժողովրդապետ,
Նիւ Եորք
Անդամ Սուրիահայերու Օգնութեան ֆոնտին
Կեդրոնական Յանձնախումբին
