0
0
Աւանդապահ Արմենակ Համբարձման օրը այցի եկաւ Էլպիսին հետ, իր լուրերով: Եթէ լրատուական կեդրոն մը ստեղծուի, Արմենակ յարմար տնօրէն է: Թէեւ տարիքը արգելք է գործի ընդունուելու: Օր մը յիշեցուցած էր թրքական առած մը, որ կ’ըսէ, թէ «խելքը գլխուն մէջ է, եւ ոչ տարիքին»: Եւ ես ըսած էի.
– Ի՞նչ, հայերս թուրքին իմաստութեա՞մբ պիտի գործենք: Մեր ունեցածը բաւ չէ՞:
Ձեռքը գրպանը տարաւ: Թուղթի խշրտոց լսուեցաւ:
– Մակա՛ր, երբ Հայաստանի լուրերը կարդամ, կը հիւանդանամ:
– Մի՛ յուզուիր: Հայաստան գացող-եկող ղեկավարներ այդ բոլորը կը տեսնեն եւ չեն անհանգստանար: Դուն ալ այդպէս ըրէ, եթէ կրնաս բան մը ընել, ըրէ՛ եւ վերջ:
Գրպանէն հանած թուղթը բացաւ եւ.
-Ինչպէ՞ս լռեմ: Կարդամ. «Գիւմրիում անցած 2,5 տարում տնակներում ապրող որեւէ ընտանիք բնակարան չի ստացել, բայց 2019-2020 թթ. իշխանութիւնն ինքնապարգեւատրուել է շուրջ 220 մլն դոլարով»: Դրամ չէ, կանաչ է:
– Արմենա՛կ, յիշէ թրքական առածը. «Մեղր բռնողը մատը կը լիզէ»:
– Հայերէնը ճոխացած է «պարգեւավճար»ով, իսկ պետական գանձը կ’աղքատանայ: Լսէ՛. «… 1000 ընտանիք Գիւմրիում դեռ ապրում է տնակներում»: 33 տարի ետք երկրաշարժէն: Երեւանի շէնքերը Մանհաթան են, բայց գիւմրեցի հազար ընտանիք անտուն է:
– Արմենա՛կ, շատ մը երկիրներ, նոյնիսկ հարուստ, առանց երկրաշարժի ալ աներդիքներ ունին: Ի՞նչ կրնաս ընել:
– Լսէ՛ մնացեալը, «Գիւմրիում 1000 հատ 90քմ տարածքով բնակարան կառուցելը պետութեան համար կ’արժենար ընդամէնը 65 միլիոն դոլար: Այդ 1000 բնակարան կառուցելը շուրջ 2000 գիւմրեցու համար կ’ապահովէր առնուազն 1 տարուան աշխատանք»: Բաղդատէ՛ ինքնապարգեւատրման 220 միլիոնին:
Լռեցի: Արմենակ շունչ մը առաւ եւ շարունակեց:
– Մակա՛րս, ժողովուրդը յուսախաբ կ’ըլլայ: Ըսին՝ թաւշեայ յեղափոխութիւն, ըսին՝«կոռուպցիա»-ի դէմ պայքար, պետական եկամուտներու կողոպուտ, իրենց բառռվ՝ «թալան», «թալանչի»: Հիմա ըսէ՛, թէ հաշուակալական որ սիւնակին մէջ պիտի արձանագրուի այս օրինաւոր կողոպուտը:
Արմենակ կրկին գրպանէն հանեց ծալած եւ վերցուցած թուղթը: Ըսաւ.
– Քեզի կարդամ լուրի վերջին տողերը. «Պետութեան հաշուին ձեր հարուստ ապրելը 1000 գիւմրեցի ընտանիքի զրկեց արժանապատիւ ապրելու իրաւունքից»։ Հազար ընտանիք. երկու հազար չափահաս, երեք հազար մանուկ, եւ թերեւս ալ երկու հազար մեծ-հայր եւ մեծ-մայր: Որո՞ւ պիտի դիմեն այդ հազարաւոր դժբախտները:
Ի՞նչ կրնայի ըսել:
Երեկոյեան ժամը 7-էն առաջ տուն պէտք էր հասնիլ: Թագաժահրը լուսմար հաստատած էր: Արմենակ ձայն տուաւ Էլպիսին, եւ ըսաւ «երթանք»:
Դիտեցի անխօս եւ գլխահակ Արմենակը, եւ Էլպիսը, որ կը թուէր բաներ մը ըսել, հաւանօրէն կը փորձէր հանդարտեցնել անզօրութենէ տառապող Կեդրոնականցին:
Կեդրոնականցին այս գիշեր պիտի չքնանայ եւ մտածէ բնակարանէ զրկուած քանի մը հազար հայերու մասին: Պարգեւավճար ստացողներու քունը պիտի չփախի:
Մակար ի Գաղիա, 14 Մայիս 2021
