ՇՈՒՇԻԻ ԱԶԱՏԱԳՐՄԱՆ ՆՈՒԻՐՈՒԱԾ ԶՕՐԱՀԱՆԴԷՍ

0 0
Read Time:2 Minute, 29 Second

 Արցախի Հանրապետութեան նախագահ Բակօ Սահակեան, Շուշիի ազատագրման 20-ամեակին նուիրուած ԼՂՀ զինուած ուժերու զօրահանդէսին ժամանակ, հանդէս եկած է շնորհաւորական ուղերձով` Յաղթանակի տօնի, Լեռնային Ղարաբաղի Հանրապետութեան պաշտպանութեան բանակի եւ Շուշիի ազատագրման 20-ամեակին առիթով։
Ստորեւ կը ներկայացնենք Արցախի Հանրապետութեան նախագահի ուղերձը.

Արցախի հերոսական բանակի յարգարժա՛ն զօրավարներ, սպաներ, զինուորներ,
հայրենական մեծ պատերազմի եւ Արցախեան ազատամարտի թանկագի՛ն վեթերաններ,
Սիրելի՛ հայրենակիցներ,
յարգելի՛ հիւրեր,
Ի սրտէ կը շնորհաւորեմ Յաղթանակի տօնին, Արցախի Հանրապետութեան պաշտպանութեան բանակին եւ Շուշիի ազատագրման 20-րդ տարեդարձին առիթով, տօն, որ սրբագործուած է մեր եղբայրներու եւ քոյրերու արեամբ եւ դարձած համաժողովրդական ամենանուիրական տօներէն մէկը:

Այս տօնական օրը ես, նախեւառաջ, գլուխ կը խոնարհեմ յանուն հայրենիքի ազատութեան նահատակուած բոլոր քաջ հայորդիներու պայծառ յիշատակին առջեւ: Յաւէ~րժ փառք ու պատիւ մեր նուիրեալներուն:

Մայիս 9-ը յաղթանակի տօն է, համազգային միասնութեան ու համախմբուածութեան, ազատատենչ ոգիի եւ անկոտրում կամքի յաղթանակի տօն:

Մայիս 9-ը Մեծ Հայրենականի մէջ մեր հայրերու եւ մեծ հայրերու յաղթանակի օրն է, երբ հայ ժողովուրդի լաւագոյն զաւակները միւս ժողովուրդներուն հետ ձեռք ձեռքի պատերազմեցան ընդդէմ բռնութեան ու չարագործութեան` անձնազոհ սխրանքի ու խիզախութեան օրինակ հանդիսանալով յետագայ սերունդներուն համար:

Մայիս 9-ը մեր ազգային-ազատագրական պայքարի համայն հայութեան յաղթանակի օրն է, երբ հայ ժողովուրդի բոլոր հատուածները համախմբուեցան Արցախի պաշտպանութեան վեհ գաղափարին շուրջ` դառնալով մէկ բռունցք, մէկ մարմին ու ոգի: Ամէն ինչ կը կատարուէր յանուն մեր սուրբ գործի յաղթանակի, յանուն հայ ժողովուրդի դարաւոր նպատակներու իրականացման, անոր յարատեւութեան ու լուսաւոր ապագային:

Այդ իսկ գիտակցումով ազատագրեցինք տարիներ շարունակ գերութեան մէջ գտնուող Շուշին` մեր հինաւուրց բերդաքաղաքը, հոգեւոր ու մշակութային կեդրոնը, որ այսօր կը վերածնի ու կը ստանայ նոր շունչ:

Այդ իսկ գիտակցումով ստեղծուեցաւ պաշտպանութեան բանակը` մեր ժողովուրդի ազատութեան ու անվտանգութեան հիմնական երաշխաւորը, անոր հպարտութիւնն ու մեծագոյն նուաճումներէն մէկը: Բանակը ծնունդ առաւ Արցախեան ազատամարտի բովէն եւ պատուով կատարեց ու այսօր ալ կը շարունակէ կատարել հայրենիքի պաշտպանի իր սրբազան առաքելութիւնը: Հայոց բանակին շնորհիւ կը պահպանուի նաեւ խաղաղութիւնն ու կայունութիւնը ողջ տարածաշրջանին մէջ: Ասիկա անժխտելի իրողութիւն է, որուն հետ հնարաւոր չէ հաշուի չնստիլ:

Մենք կ’ընենք ու պիտի ընենք ամէն ինչ, որպէսզի մեր բանակը ըլլայ միշտ հզօր ու յաղթական, ունենայ մարտունակութեան բարձր մակարդակ ու ամուր ոգի, պատրաստ ամէն պահու իրականացնելու իր առջեւ դրուած իւրաքանչիւր խնդիր:

Ազատ, անկախ ու զօրացող Արցախը բացառիկ արժէք է ամբողջ հայութեան համար: Մայր Հայաստանի, Սփիւռքի մեր քոյրերու եւ եղբայրներու ամենօրեայ աջակցութեամբ Արցախը ոչ միայն կրցաւ ապաքինիլ պատերազմի ծանր վէրքերէն, այլեւ այսօր կանգնած է կայուն զարգացման ուղիի վրայ: Հայրենի հողը արժանապատուօրէն պաշտպանած ժողովուրդը պէտք է ապրի արժանավայել կեանքով, եւ մենք ջանք ու եռանդ չենք խնայեր այդ նպատակին հասնելու համար:

Թանկագի՛ն բարեկամներ,
այսօր հայոց բանակի կազմին մէջ են եւ հպարտ կանգնած են զօրահանդէսի շարքերուն մէջ մեր զաւակները, որոնք ծնած են ազատագրուած հայրենիքի մէջ եւ անառիկ կը պահեն անոր սահմանները: Անոնք պատուով կը շարունակեն իրենց հերոս հայրերուն գործը եւ ատով իսկ վառ կը պահեն մեր բոլոր նահատակներուն յիշատակը:

Մեր նուիրական յաղթանակը կերտողներուն հետ ուս ուսի Արցախեան բանակի այսօրուան զինուորը հաստատուն կերպով կը պաշտպանէ հայրենի երկրի ավտանգութիւնն ու հարազատ ժողովուրդի անդորրը: Այդպէս է արդէն 20 տարի, եւ այդպէս պիտի ըլլայ ընդմիշտ:

Փա՛ռք հերոսական հայ ժողովուրդին:
Փա՛ռք Լեռնային Ղարաբաղի Հանրապետութեան:
Փա՛ռք պաշտպանութեան բանակին եւ անոր քաջարի մարտիկներուն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԱՅՍ ՏԱՐՈՒԱՆ “ՊՈՍԹԸՆ ՓՈՓՍ“Ի ՀԱՅԿԱԿԱՆ ՅԱՅՏԱԳՐԻՆ ԵԼՈՅԹ ՊԻՏԻ ՈՒՆԵՆԱՅ ՆԱՐԵԿ ՅԱՐՈՒԹԻՒՆԵԱՆ
Next post ԱՐՈՒԵՍՏ.- ԵՂԵՌՆԻ 100-ԱՄԵԱԿԻ ՍԵՄԻՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles