0
0
Նիւ Եորքի Հայ Օգնութեան Միութեան ’’Մայր’’ մասնաճիւղի տարեկան անդամարշաւը տեղի ունեցաւ, Կիրակի, Մարտ 20-ին, կ.ե. Ժամր 3:00 -ին ընկհ.Ռօզիթա Պոյաճեանի բնակարանէն ներս: Անդամարշաւին նպատակը` մտերմիկ հանդիպում մը ունենալ բոլոր ընկերուհիներուն հետ կազմակերպչական աշխատանքներուն առաւել թափ տալու մտադրութեամբ, եւ ծանօթանալ նորեկներու, որոնք լսելով Հ.Օ.Մ.ի գործունէութեան մասին թերեւս փափաքին անդամակցիլ Հ.Օ.Մ.-ին: Ներկաները վայելեցին ընկերուհիներուն պատրաստած Մեծ Պահքի համեղ ճաշերը: Ապա մասնաճիւղիս ատենապետուհին ընկհ. Անայիս Չոլաքեան բարի գալուստ մաղթեց ներկաներուն, Տէրունական աղօթքով եւ Հ.Օ.Մ.-ի քայլերգով բացումը կատարուեցաւ Անդամարշաւի նպատակին նուիրուած այս հանդիպումին: Ճաշէն ետք լուսապատկերներով (power point) ներկայացուեցաւ Հ.Օ.Մ.-ի մասին տեղեկութիւններ պատրաստուած ընկհ. Ժանէթ Մարգարեանի կողմէ: Ներկաները ծանօթացան Հ.Օ.Մ.-ի կառոյցին, եւ աշխարհասփիւռ գործունէութեան նեռարեալ Հայաստան:
Ընկհ. Ժանէթ շեշտեց որ Հ.Օ.Մ.-ը իր հիմնադրութենէն ի վեր, հայ որբերն ու կարիքաւոր երեխաները յատուկ ուշադրութեան առարկայ դարձուցած է: ’’Փրկել, պատսպարել, կերակրել եւ հայեցի դաստիարակութիւն տալ անոնց` ապագան փրկելու միտումով: Փաստ` ի սփիւռս աշխարհի Հ.Օ.Մ.ին պատկանող ամենօրեայ դպրոցները, մանկամսուրները, մանկապարտէզները, երկրորդական վարժարանները: Աւելին, ամէն գաղութի մէջ Հ.Օ.Մ.ի մասնաճիւղերը կը հովանաւորեն եւ նիւթապէս կ՛օգնեն տեղական հայ դպրոցներուն: Պատանիներուն համար` Հ.Օ.Մ.-ի փոխանակման ծրագիրը զանազան վայրերու ճամբարներուն միջեւ կը միտի ամրապնդել հայ պատանիներու կապը իրար հետ’’, ըսաւ ան եւ յիշեց նաեւ համալսարանականներուն ուսման յատկացուած կրթաթոշակներու կարեւորութիւնը: Ընկերուհին նշեց Հ.Օ.Մ.-ի ընկերաբժշկական հիմնարկները, ծերանոցները, պատսպարաններն ու կազդուրման կայանները զանազան երկիրներու մէջ: 1990էն իվեր երկրաշարժի եւ Արցախեան պատերազմի հետեւանքով որբերու հովանաւորման ծրագիրը եւ »Սօսէ« մանկապարտէզներու ցանցը Արցախի մէջ: Ապա ընկերուհին ծանրացաւ Ա.Մ.Ն.-ի Արեւելեան Շրջանի Շրջանային Վարչութեան գործունէութեան վրայ, որը ի շարս բազմաթիւ այլ աշխատանքներու, տարեկան նիւթական յատկացում կը կատարէ շրջանիս Ամենօրեայ եւ Միօրեայ վարժարաններուն, իրականացուց երիտասարդական ’’Youthconnect ’’ միօրեայ Սէմինարը, երկրաշարժի օրերէն, վերակառուցեց Ախուրեանի Նիկոլ Աղբալեան դպրոցը եւ Մօր ու Մանկան Ծննդատունը հիմնադրեց: Այս դաստիարակչական մասէն ետք, մասնաճիւղի ատենապետուհի ընկհ. Անայիս Չոլաքեան կատարեց երկու ընկերուհիներու, Անահիտ Ուղուրլայեանի եւ Նորիքա Պոյաճեանի երդման արարողութիւնը: Անոնք նաեւ պարգեւատրուեցան Հ.Օ.Մ.-ի շքանշանով:
Հաճելի անակնկալ մըն էր հազիւ տաս գարուններ բոլորած Նիքոլաս Մարտիրոսեանի ելոյթը որ արտասանեց Պարոյր Սեւակի ’’Մօր Ձեռքերը’’: Ճափոնի աղէտեալներուն համար տեղի ունեցաւ դրամահաւաք եւ ներկայ ընկերուհիները սրտաբուխ նուիրատուութիւններ կատարեցին: Այս դաստիարակչական եւ օգտաշատ անդամարշաւը ընթացաւ մտերմիկ ու հաճելի ընկերային մթնոլորտի մէջ: Ատենապետուհի ընկհ. Անայիս Չոլաքեան շնորհակալութիւն յայտնեց նոր անդամագրուած ընկերուհիներուն եւ բոլոր ներկայ ընկերուհիներուն որ մասնակցեցան ու քաջալերեցին ձեռնարկը եւ մասնաւոր շնորհակալութիւն հիւրընկալ ընկհ. Ռօզիթա Պոյաճեանին որ սիրով բացաւ իր դռները Հ.Օ.Մ.-ին համար: Հարկ է նշել որ մասնաճիւղը այս ձեռնարկը կը կատարէ 1991-էն ի վեր: Այս տարի եւս մասնաճիւղը իրագործեց այս ծրագիրը եւ ծանօթանալով իր բազմաբեղուն գործունէութեան, հաստատակամութեամբ պիտի շարունակէ իր ազգանուէր գործունէութիւնը: Սիրելի ընկերուհիներ, կը մաղթենք որ շարունակէք նոր կորովով անշէջ պահել Հայ Օգնութեան Միութեան հարիւրամեայ ջահը:
Մարիա Շամլեան Եփրեմեան
