0
0
ՊԷՅՐՈՒԹ.- Վերջերս “Ազդակ“ օրաթերթի կառոյցի “Փիւնիկ“ սրահին մէջ, տեղի ունեցաւ “Նիւթեր Հ.Յ.Դաշնակցութեան պատմութեան համար – Թ. Հատոր“ի ներկայացումը, ներկայութեամբ քաղաքական, միութենական եւ կրթական ներկայացուցիչներու ու մեծաթիւ ներկաներու:
Խմբագիր Երուանդ Փամպուքեան, շնորհակալութիւն յայտնեց բոլորին, յատկապէս իր խոր գոհունակութիւնը յայտնելով հայրենի պատմագէտ Մհեր Յովհաննիսեանին, որուն ճիգերով “Նիւթեր“ու բոլոր հատորները ձեռնտու եւ օգտագործելի պիտի ըլլան համացանցի վրայ: “Արխիւային հարուստ տեղեկութիւններ կան, սակայն աշխատողի պակաս կայ: Մեր ժողովուրդի ազատագրական կարեւոր շրջանի մասին ամբողջական տեղեկահաւաք կայ, որ անաչառ կերպով կարելիութիւն պիտի ընծայէ բոլոր պատմագէտներուն, որ իրազեկ դառնան ամբողջ տեղեկութեանց եւ ապա դատին“, յայտնեց Փամպուքեան:
Նախապէս, լեզուաբան եւ հայագէտ Յովիկ Պերթիզլեան խօսք առած էր, կեդրոնանալով Փամպուքեան խմբագիրի, պատմաբանի առանձնայատկութիւններուն վրայ:
Ան սեղմ գիծերու մէջ, ներկայացուց Փամպուքեանի կենսագրական կէտերը:
Երեւանի պետական համալսարանի Հայագիտական հետազօտութիւններու հիմնարկի փոխտնօրէն, պատմական գիտութիւններու թեկնածու Մհեր Յովհաննիսեան, որ անդրադարձաւ հատորի նիւթերուն, անձնանուններու եւ տեղանուններու յիշատակութեան պայմաններուն եւ առաւելութիւններուն:
Երեւանի պետական համալսարանի պատմութեան բաժանմունքի վարիչ, պատմական գիտութիւններու փրոֆեսէօր Էտիկ Մինասեան, ներկայացուց հատորի հիմնական մասերը:
“Աւելի քան 295 փաստաթուղթերով, բովանդակութեան իմաստով այս հատորը արժէքաւոր է ոչ միայն Հ.Յ.Դաշնակցութեան պատմութեան, այլեւ` 19-րդ եւ 20-րդ դարերու հայոց պատմութեան ու Հայաստանի խորհրդային շրջանի պատմագրութեան համար“, ընդգծեց փրոֆ. Էտիկ Մինասեան:
Հ.Յ.Դ. Լիբանանի Կեդրոնական կոմիտէի քարոզչական մարմինի անունով Գրիգոր Հաշէօլեան բացումը կատարած էր ձեռնարկին` ներկայացնելով հատորի հիմնական ենթաբաժանումներն ու օրուան բանախօսները:
Աւարտին կատարուեցաւ մակագրութիւն:
