Լրահոս
Մ.Ա.Կ.-ի Ընդհանուր Ժողովին Փաշինեան Կը Խօսի Կառուցողական Երկխօսութեան Մասին
ՆԻՒ ԵՈՐՔ.- Մ.Ա.Կ.-ի Ընդհանուր ժողովի 76-րդ նստաշրջանին, Հ.Հ. վարչապետ Նիկոլ Փաշինեան առցանց ելոյթ ունենալով, յայտնեց, թէ Հայաստանը պատրաստ է կառուցողական երկխօսութեան, որ պիտի յանգեցնէ շրջանին մէջ կայուն եւ յարատեւ խաղաղութեան հաստատման:
Փաշինեան խօսեցաւ նաեւ Ատրպէյճանի կողմէ հրադադարի դրութեան խախտման, Հայաստանի քանի մը տասնեակ քաղաքացիներ գերութեան մէջ պահելու ու խոշտանգելու եւ Հայաստանի ու հայ ժողովուրդին դէմ յարձակողապաշտ կեցուածքին եւ յայտարարութիւններուն մասին: Փաշինեան նշեց, որ գրեթէ ամէն օր տեղի կ՛ունենան իրադարձութիւններ, որոնց նպատակը խաղաղութեան օրակարգի օրինականացումը խանգարելն է, թշնամութեան մթնոլորտը ո՛չ միայն խորացնելը, այլեւ աւելի համակարգուած դարձնելը:
