ՍԹՐԱԶՊՈՒՐԿ.- Եւրոպայի Հայ Դատի Յանձնախումբը կը տեղեկացնէ թէ Հոկտեմբեր 15-ին, Մարդկային Իրաւանց Եւրոպական Դատարանը վճիռ կայացուց Փերինչէք ընդդէմ Զուիցերիա հարցին շուրջ, ուր նշեց, թէ թուրք ազգայնական Տողու Փերինչէքի խօսքի ազատութիւնը կաշկանդումի ենթարկուած է, երբ ան Հայկական Ցեղասպանութիւնը ուրացող յայտարարութիւններ կատարած է Զուիցերիոյ մէջ:
Յունուար 2015-ին, Եւրոպական դատարանի վերին պալատը հարցը վերատեսութեան ենթարկած էր՝ Զուիցերիոյ դիմումին ընթացք տալով: Այդ դատի վճիռը տրուեցաւ այսօր: Հայաստանը դատին կը մասնակցէր իբրեւ երրորդ հետաքրքրուող կողմ, ներկայացուելով միջազգային իրաւաբաններ Ճէֆրի Ռապըրթսընէ եւ Ամալ Քլունիի կողմէ, ինչպէս նաեւ Հ.Հ. ընդհանուր դատախազ Գէորգ Կոստանեանի կողմէ:
Առաւօտեան կարճ նիստին ընթացքին տրուած որոշումը հայկական կողմին համար կարեւոր է մի քանի կէտերով, որոնցմէ ամենակարեւորը՝ որ դատարանը բեկանեց նախորդ դատարանի այն կէտը, ուր համեմատական կ՚ըլլար Հայկական Ցեղասպանութեան եւ Հրէական Ողջակիզման միջեւ: Ստորին պալատի իրաւասութինները չեն թոյլատրեր նման ակնարկ եւ որոշում մը առնել:
Շատ կարեւոր կէտ մը, որ նաեւ նշուած է այսօրուան որոշումին մէջ այն է, թէ՝ հայ ժողովուրդի արժանապատուութեան եւ ցաւին հետ ո՚չ ոգ խաղալու իրաւունք ունի: Դատարանի որոշման համաձայն՝ Եւրոպայի տարածքին գտնուող հայութիւնը իր արժանապատիւ կեանքին իրաւունքն ունի առանց ոեւէ մէկ ցեղապաշտ կամ այլ բռնութիւններու: Ռապըրթսըն նշեց, որ այսօր Հայաստանին եւ հայութեան համար կարեւոր օր մըն է, որովհետեւ Թուրքիոյ օրէնսդրութեան թիւ 301 յօդուածը նաեւ լուսարձակի տակ կ՚առնուի, եւ պէտք է ջնջուի, եթէ Թուրքիա կ՚ուզէ եւրոպական ընտանիքին անդամ դառնալ:
Կարեւոր է նշել, որ այս որոշումը կը վերաբերի Փերինչէքի խօսքերուն Զուիցերիոյ մէջ: Յարձականի տակ չառներ Հայոց Ցեղասպանութեան իրողութիւնը, եւ ապագային ուրացման փորձերը, որոնք ճիշդ օրէնսդրութեամբ կարելի են քրէական ըլլալ:
Գասպար Կարապետեան, Եւրոպայի Հայ Դատի յանձնախումբի նախագահը, որոշումին մասին հետեւեալը ըսաւ.- «Դատարանը բաց կը ձգէ այն կարելիութիւնը, որ անհատ մը դատապարտուի Ցեղասպանութեան ուրացման համար, որոշ պարագաներու: Դատարանը արձանագրեց, որ սխալ էր Փերինչէքը քրէական հետապնդումի ենթարկել, քանի որ Զուիցերիոյ մէջ պատմական հարցեր չկային, ինչպէս նաեւ բարձր կիրքեր չկային (հայերու եւ թուրքերու միջեւ): Կարելի է եզրակացնել ուրեմն, որ հայերու եւ թուրքերու միջեւ եթէ լարուած իրավիճակ ստեղծուի ուրացման պատճառով՝ Ցեղասպանութեան ուրացումը կարելի է քրէականացնել,:
