ՄԱՅԻՍ 1-Ի ՄՏՈՐՈՒՄՆԵՐ

0 0
Read Time:1 Minute, 40 Second

ARF flag

“… Աշխատ’աւոր ընդհանրութեան ազատագրումը կրնայ էապէս կատարուիլ ճիգերովն ու հաւաքական պայքարովը նոյն այդ աշխատաւորներուն, բանուորներ ըլլան անոնք, գիւղացիներ, արհեստաւորներ, արհեստագէտներ թէ մասնագէտներ: Այդ պայքարին կը միանայ նաեւ յեղափոխական մտաւորականութիւնը:” (Հ.Յ.Դ. Ծրագիր)

 

Ի տարբերութիւն համայնավարական գաղափարախօսութեան` Հայ Յեղափոխական Դաշնակցութեան համար “աշխատաւոր”ի սահմանումն ու Մայիս մէկեան խորհուրդը չի պայմանաւորուիր միայն բանուորագիւղացիական խաւով եւ կ’ընդգրկէ արհեստաւորը, բժիշկը, երկրաչափը, ճարտարապետը, մտաւորականն ու ուսուցիչը:

Դաշնակցութիւնը ծրագրային այս համոզումով կը տարբերի նաեւ աջին կողմէ հրամցուած այն մօտեցումին, թէ իբր ընկերային արդարոթիւն կարելի է հաստատել ընկերութեան բոլոր խաւերու գործակցութեամբ: Որպէս ընկերային արդարութեան հաւատացող ու ձգտող քաղաքական ու գաղափարական շարժում Դաշնակցութիւնը համոզուած է որ ընկերութեան մէջ ընկերային անարդարութեան առկայութենէ օգտուող խաւը չի կրնար համագործակցիլ աշխատաւորութեան հետ յանուն ընկերային արդարութեան հաստատման, այլ այդ արդարոթիւնը “կրնայ էապէս կատարուիլ ճիգերովն ու պայքարովը… աշխատաւորներուն”:

Գաղափարական այս համոզումն է որ տարիներ շարունակ ուղղութիւն տալու աղբիւր պիտի հանդիսանար քաղաքական մեր շարժման որոշումներուն, կեցուածքներուն ու գործունէութեան:

Հայաստանի անկախացումով Հայ Յեղափոխական Դաշնակցութեան ընկերվարական ըմբռնումներու գործնականացման աւելի լայն դաշտ բացուեցաւ, ուր աջէն ու ձախէն էապէս տարբերուող մեր կուսակցութիւնը դրօշակիրը պիտի հանդիսանար ընկերային արդարութեան հաստատման, եւ այն ալ այնպիսի միջավայրի մը մէջ ուր 70 տարիներու կեղծ լօզունքներով վարկաբեկուած էր ընկերվարութեան գաղափարը: Սակայն, տարիները եկան ապացուցելու որ այսօր ընկերային արդարութիւն հաստատելու պահանջը աւելի քան այժմէական ու կենսական է, իսկ աշխատաւորութեան պայքարը հրամայական, երբ շահագործող ցեցեր, օլիկարխներ, մենաշնորհեալներ պատուհաս դարձած են աշխատաւորութեան գլխուն՝ այսինքն գիւղացիին, բժիշկին, մտաւորականին, բանուորին, բարձր ձիրքերով օժտուած արհեստաւորին, գիտնականին եւ ժամանակակից արհեստագէտներու գլխուն:

Մայիս 1-ի խորհուրդը պէտք է հասկնանք գաղափարական հիմունքով, որ մեզի համար պէտք է դառնայ ուղեցոյց՝ տեղական, համազգային ու միջազգային մակարդակներու վրայ մեր կողմէ առնուած իւրաքանչիւր որոշումին ու մեր կողմէ ծաւալուած իւրաքանչիւր գործունէութեան, որովհետեւ ընկերային արդարութեան համար մեր պայքարն ու իւրայատուկ ըմբռնումը եղած է ու կը մնայ մեր գաղափարախօսութեան կարեւոր սիւներէն մէկը:

Որեւէ հասարակութիւն կամ որեւէ երկիր չի կրնար ամբողջական խաղաղութիւն եւ հաւասարակշռութիւն նուաճել ու հաստատ քայլերով զարգանալ եթէ այդ երկրին մէջ որեւէ տեսակի անարդարութիւն գոյութիւն ունի: Աշխատանքը մարդու ազնուագոյն ներդրումն է կեանքին մէջ, աշխատանքի շահագործումը՝ մեծագոյն անարդարութիւն, իսկ Հայ Յեղափոխական Դաշնակցութիւնը տէր կը մնայ «աշխատանքի դատի պաշտպան»ի իր առաքելութեան:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles