0
0
Յատուկ հաղորդագրութեամբ մը Հայ Օգնութեան Միութեան
Կեդրոնական վարչութիւնը կը տեղեկացնէ թէ Մարտ 20-24, 2014-ին Պոսթընի մէջ, գումարեց իր 22-րդ լիագումար նիստը:
Կազմակերպական, մարդասիրական բազմաբնոյթ օրակարգերու շարքին, կարեւորութեամբ քննարկուեցան Հայոց ցեղասպանութեան 100ամեակի նշման միջոցառումները եւ Սուրիահայութեան օժանդակութեան ծրագիրները:
Թրքական բացայայտ հովանաւորութեամբ զինեալներու Քէսապ ներթափանցման փորձին եւ անոր հետեւանք հայաւանի պարպումին ի տես, յաճախակի կապ հաստատելով եւ խորհրդակցելով տեղւոյն միաւորի շրջանային եւ մասնաճիւղի վարչութեանց ընկերուհիներուն հետ, Լաթաքիա ապաստանած մեր հայրենակիցներու անմիջական կարիքներու բաւարարման համար՝ այս հանգրուանին Լաթաքիոյ եւ Քէսապի մասնաճիւղերուն յատկացուեցաւ $15,000:
Ընթացքի մէջ եղած ծրագիրներու գծով որոշուեցաւ.-
– Միաւորներու աշխոյժ մասնակցութեամբ շարունակել աշխատանքները՝ գաղութային շտապ օգնութեան մարմիններու շրջանակներէն ներս:
– 2012 Նոյեմբերէն սկիզբ առած “Տաք Ճաշ“ ծրագիրը շարունակել նոյն ընթացքով: Այս հանգրուանին ծրագրին տրամադրելով $25,000:
– Ուսումնական ընթացիկ տարեշրջանին համար, սուրիահայ վարժարաններու օժանդակութեան ծիրէն ներս՝ “Դպրոց“ ֆոնտին յատկացնել $75,000:
– Ս.Օ.Խ.-ի Շրջանային վարչութեան ճամբով, Հալէպահայութեան խնամատարական կարիքներու բաւարարման ուղուած ծրագիրներու համար յատկացնել $10,000:
Աշխարհասփիւռ իր միաւորներու անվերապահ եւ յանձնառու աջակցութեամբ առաւել հզօրացած՝ Կեդրոնական վարչութիւնը կը շարունակէ աջալրջութեամբ հետեւիլ զարգացումներուն, կարիքի թելադրութեամբ օժանդակութեան անհրաժեշտ նախաձեռնութիւններ կատարելու:
