0
0
2008-2009 կրթական տարեշրջանին, Հ.Օ.Մ.-ի զանազան միաւորներն ու ՀՕՄ-ի Կեդրոնական Վարչութիւնը աւելի քան $500,000 հազար տոլարի յատկացումներ կատարած են հայրենի տարածքներու եւ արտերկրի մէջ կրթական նպատակներու համար:
«Հ.Օ.Մ.-ը մի՛շտ առաջնահերթ կարեւորութիւն տուած է նորահաս սերունդներու կրթութեան: Այս ծիրին մէջ Հ.Օ.Մ.-ի զանազան երկիրներու մէջ գործող միաւորները, իւրաքանչիւրը իր շրջանի կարիքներուն ու Հ.Օ.Մ.-ի միաւորի կարողութեան համաձայն, առաւելագոյն ներդրումը կը փորձէ կատարել կրթական ծրագիրներու մէջ»,- հաստատեց Հ.Օ.Մ.-ի Կեդր. Վարչութեան Երեմեան Կրթաթոշակի պատասխանատու Մայտա Մելքոնեանը: «Տասնամեակներ շարունակ, սփիւռքեան զանազան շրջաններու մէջ կրթական գործին նեցուկ կանգնելու մեր առաքելութեան կողքին, պարտք կը զգանք նոյնօրինակ նախաձեռնութիւններ ստանձնել Հայաստանի, սակայն յատկապէս Արցախի ու Ջաւախքի մէջ»,- աւելցուց Կեդր. Վարչութեան ատենապետուհի Վիգի Մարաշլեանը, որ վերջերս վերադարձած էր Ջաւախքէն, իր հետ բերելով Հ.Օ.Մ.-ի առաջին «Սօսէ» մանկապարտէզի մը հիմնադրութեան նախնական տուեալները:
Հ.Օ.Մ.-ը կրթական նպաստներ կը յատկացնէ մի քանի մակարդակի վրայ.- համալսարանական ուսանողներու կրթաթոշակներ, կրթական հաստատութիւններու ուղղակի յատկացումներ, նախակրթարանէն մինչեւ երկորդական վարժարաններու կարիքաւոր աշակերտներու կրթաթոշակներ ինչպէս նաեւ սփիւռքեան բազմաթիւ շրջաններու մէջ Հ.Օ.Մ.-ի միօրեայ եւ ամենօրեայ վարժարաններու հովանաւորութիւն: Այս ծիրին մէջ է, որ 2008-2009 տարեշրջանին Հ.Օ.Մ.-ի Հարաւային Ամերիկայի միաւորը՝ $3,000, Արեւելեան Ամերիկայի միաւորը $59,450, Արեւմտեան Ամերիկայի միաւորը՝ $78,000, Գանատայի միաւորը՝ $141,600, Ֆրանսայի միաւորը՝ $104,000, Լիբանանի միաւորը՝ $61,133, Սուրիոյ միաւորը՝ $29,465, Յորդանանի միաւորը՝ $3,265, Երուսաղէմի միաւորը՝ $1,000, Կիպրոսի միաւորը՝ $3,770, Յունաստանի Թրակիոյ եւ Մակեդոնիոյ միաւորը՝ $1,425, Մեծն Բրիտանիոյ միաւորը՝ $1,611, Աւստրալիոյ միաւորը՝ $2,000 ամերիկեան տոլար յատկացուցած են կրթական ծրագիրներու: Նոյնօրինակ կանոնաւոր յատկացումներ կը կատարեն նաեւ Յունաստանի Աթէնքի, Քուէյթի, Պուլկարիոյ եւ ՀՕՄ-ի այլ միաւորներ:
«Համահայկական մակարդակի վրայ կատարուող այս յատկացումներուն վրայ կու գայ աւելնալու Հ.Օ.Մ.-ի Կեդրոնական Վարչութեան տնօրինման ենթակայ Երեմեան Կրթաթոշակը»,- յայտնեց Կեդր. Վարչութեան անդամ Մայտա Մելքոնեանը: «Հակառակ անոր, որ Երեմեան Կրթաթոշակի Ֆոնտը այս տարի հասոյթ չէր ապահոված, սակայն նախորդ տարիներու խնայողութիւններէն, Հ.Օ.Մ.-ի Կեդրոնական Վարչութիւնը այս տարի $11,400 ամերիկեան տոլարի կրթաթոշակներ տրամադրեց արտերկրի զանազան երկիրներէ, ինչպէս նաեւ Հայաստանէն եւ Արցախէն 19 համալսարանական ուսանողներու»,- եզրափակեց ան:
Կ’արժէ նշել, որ որպէս ուսանողներու կրթաթոշակ կամ հայկական վարժարաններու տրուող այս յատկացումներէն անկախ, Հ.Օ.Մ.-ը Արցախի մէջ կը հովանաւորէ «Սօսէ» մանկապարտէզներու ցանցը, «Լաւագոյն Ուսանող» ծրագիրը ինչպէս նաեւ «Որբերու Ուսման Ծրագիր»ը: Այս բոլորը տեղի կ’ունենան շնորհիւ Հ.Օ.Մ.-ի միաւորներու եւ անհատ հովանաւորներու նուիրատուութիւններուն: «Կոչ կ’ուղղեմ մեր հայրենակիցներուն, իրենց նուիրատուութիւններով օժանդակելու մեզի, որ շարունակենք նեցուկ կանգնիլ հայ դպրոցին ու հայ համալսարանականին»,- յայտնեց Կեդրոնական Վարչութեան գանձապահ Միւրիէլ Բարսեղեանը: «Ձեր նուիրատուութիւնները կրնաք կատարել նաեւ համացանցի ճամբով, այցելելով մեր կայքէջը՝ www.ars1910.org»,- եզրակացուց ան:
