Հ.Յ.Դ.-ի Եզրափակիչ Հանրահաւաքը «Ազատութիւն» Հրապարակին Վրայ

0 0
Read Time:1 Minute, 47 Second


ԵՐԵՒԱՆ.- Հինգշաբթի, Մարտ 30-ին, «Ազատութիւն» հրապարակին վրայ, Հ. Յ. Դաշնակցութիւնը հանրահաւաք կազմակերպեց` ամփոփելով նախընտրական քարոզարշաւը:
Այս հանրահաւաքին ելոյթ ունեցաւ Հ.Յ.Դ. Հայաստանի Գերագոյն մարմինի ներկայացուցիչ Աղուան Վարդանեան, որ նշեց, թէ միայն ազատ քաղաքացին կրնայ ուժեղ, ազատ երկիր ունենալ, արժանավայել կեանքով ապրիլ: Անոր համաձայն, ներկաները հաւաքուած են` պաշտպանելու իւրաքանչիւր հայ մարդու ազատ ապրելու, ազատ ընտրութիւն կատարելու իրաւունքը, որուն նկատմամբ բռնացողները, զայն սակարկութեան առարկայ դարձնողները հայու ինքնութեան հետ կապ չունին:
Աղուան Վարդանեանի հաստատումով` միայն արդարութեամբ կրնանք ունենալ խաղաղ, անվտանգ, զարգացող, ուժեղ, բարեկեցիկ, ազատ Հայաստան, որ իրենք պիտի ստեղծեն` հաւատալով հայ մարդուն, հաւատալով Հայաստանին, գործելով պատասխանատուութեամբ:
Հ.Յ.Դ. Բիւրոյի քաղաքական ներկայացուցիչ Արմէն Ռուստամեան իր ելոյթին ընթացքին նշեց, որ Դաշնակցութեան որեւէ ընտրապայքար նախ եւ առաջ հաշուետուութիւն է իրենց ընտրողներուն` համակիրներուն առջեւ:
Ան շեշտեց, որ Դաշնակցութեան մասնակցութեամբ կատարուած փոփոխութիւններու որակն ու ծաւալը այնքան է, որ առանց չափազանցութեան, կարելի է զանոնք անուանել պատմական եւ յեղափոխական: Անոնք մեր երկրի թռիչքաձեւ զարգացման համար ստեղծած են հիմնական գլխաւոր նախադրեալները: Ռուստամեանի համաձայն, Դաշնակցութեան հռչակած նոր սկիզբը պիտի փոխէ որոշումներու կայացման անդրքուլիսեան ձեւաչափերը, պիտի ապահովէ երկրին մէջ միջազգային յառաջադէմ փորձի վրայ հիմնուած արդար ղեկավարում:
«Մենք համոզուած ենք, որ Ապրիլ 2-ը նոր ժամանակաշրջանի սկիզբը պիտի ազդարարէ: Երկար տարիներէ ի վեր Դաշնակցութիւնը, ըլլայ իշխանութեան մէջ, կամ ոչ, յամառ եւ անզիջում պայքար մղած է, որ պատմական այս շրջադարձը կատարելու կարելիութիւնը ընձեռուի մեր ժողովուրդին, վերացուին մեր յառաջընթացը խոչընդոտող արգելքները, եւ ստեղծուին երկրի զարգացումը խթանող անհրաժեշտ պայմաններ: «Հայ մարդը պիտի ապրի ազատ ու ապահով, Հայաստանը պիտի ըլլայ հզօր, արդար եւ զարգացող, հայութիւնը պիտի ըլլայ հայաստանակեդրոն եւ համերաշխ: 2 ապրիլին այս նոյն անպարտելի ոգիով ընտրենք չորրորդ հանրապետութեան հիմնադիր խորհրդարանը: Կեցցէ՛ այն Հայաստանը, որ այս նոր սկզբունքով, նոր շունչով եւ նոր երանգով պիտի ընթանայ», յայտնեց Ռուստամեան:
Հանրահաւաքին զրորցավարն էր «Երկիր Մետիա» պատկերասփիւռի կայանի լրատուական ծառայութեան ղեկավար Գեղամ Մանուկեան: Մանուկեան համառօտ անդրադարձ կատարեց հայրենիքի մէջ Հ.Յ.Դ.-ի վերջին տասնամեակներու գործունէութեան` ընդգծելով, որ այդ տարիներուն Դաշնակցութիւնը միշտ եղած է նոյնը, միւսներէն տարբեր իր կառոյցի ամրութեամբ:
«Ազատութիւն» հրապարակին վրայ հաւաքուած Հ.Յ.Դ.-ի բազմահազար համակիրները ջերմօրէն ողջունեցին եզրափակիչ հանրահաւաքին իրենց կատարումներով հանդէս եկած արուեստի գործիչները եւ անոնց կատարած ստեղծագործութիւնները: Հանրահաւաքին հնչեցին ազգային-ազատագրական պայքարի երգեր, այլ ստեղծագործութիւններ: Այս առթիւ, Գոռ Սուջեանը, առաջին անգամ ըլլալով հնչեցուց «Նոր սկիզբ, արդար Հայաստան» երգը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles