0
0
Շ. Ժամկոչեան
Տիթրոյթ
Հ.Մ.Ը.Մ. Տիթրոյթի տարեկան ճաշկերոյթ-պարահանդէսը տեղի ունեցաւ Շաբաթ Նոյեմբեր 21, 2009ին, երեկոյեան, շրջանի “Սիլվըր Կարտըն” սրահէն ներս, ներկայութեամբ աւելի քան չորս հարիւր անդամներու եւ համակիրներու:
Հրաւիրեալներու կարգին էին Տէր Վազգէն Աւագ Քահանայ Պէքէարեան, պատուելի Մակարիոս Տարաուին, Հ.Յ.Դ. Տիթրոյթի “Ազատամարտ” կոմիտէի ատենապետ ընկ. Ներսէս Կէտիկեանը, Հ.Մ.Ը.Մ.ի Արեւելեան Ա.Մ.Ն.-ի շրջանի Շրջանային վարչութեան ներկայացուցիչ եղբ. Վարդան Ադամեանը, եւ Շրջանային վարչութեան անդամ եղբ. Լեւոն Սահակեանը:
Ներկաներուն շարքին էին նաեւ Հ.Մ.Ը.Մ.ի Շրջանային վարչութեան նախկին անդամ եղբ. Վարուժան Ճինտոյեան, Հ.Մ.Ը.Մ. Շիքակոյի մասնաճիւղի վարչութեան անդամ Եղբ. Դրօ Խոլամեան, Հ.Օ.Մ.ի կեդրոնական վարչութեան անդամ Ընկհ. Շաքէ Պասմաճեան, Հ.Բ.Ը.Մ. Տիթրոյթի “Ալեք Մանուկեան” ամէնօրեայ վարժարանի տնօրէն Պրն. Դոկտ. Յովսէփ Թորոսեանը:
Յայտագրի բացումը կատարեց օրուան հանդիսավար, Հ.Մ.Ը.Մ. Տիթրոյթի մասնաճիւղի վարչութեան ատենադպրուհի Քոյր Թամիձա Տաւիրեց կղերականները որ օրհնեն ձեռնարկն ու սեղանը, Տէր Վազգէնը նախ հրաւիրեց մասնաճիւղի վարչական կազմը, ետքը բոլորին հրաւիրեց յոտնկայս, մէկ վայրկեան լռութեամբ յարգելու միութեան անդամներէն` Եղբայրներ Արա Մարկոսեանի (Պոսթըն) եւ Սագօ Ղազարեանի (Թորոնթօ) մեզմէ առ յաւետ բաժնուելնուն յիշատակը: Ապա օրհնուեցաւ սեղանն ու ձեռնարկը: Աւարտին Տէր Վազգէնը իր սրտի խօսքը փոխանցելով, ըսաւ թէ այսօր մարտահրաւէրները բազմազան եւ բազմատեսակ են սակայն, շնորհիւ Հ.Մ.Ը.Մ.ի նման մեր ժողովրդին սրտէն ծնած այս կազմակերպութեան, կարելի կը դառնայ դիմագրաւել զանոնք:
Միութեան օրուայ պատգամը փոխանցելու համար, քոյր Տագէսեանը բեմ հրաւիրեց Եղբ. Վարդան Ադամեանը: Ան ողջունելէ ետք հրաւիրեալներն ու ներկաները, շնորհաւորեց վարչութիւնը եւ յատկապէս կազմակերպիչ յանձնախումբի անդամները:
Աւելցնելով ըսաւ թէ Հ.Մ.Ը.Մ.ը փառքի կամ նիւթական վարձատրութիւններ հետապնդողներու կազմակերպութիւն մը չէ այլ անշահախնդիր անձնուրաց զոհողութեան եւ յարատեւ աշխատանքի միութիւն մըն է: Խօսքը ուղղելով սկաուտ աստիճանաւորներուն, ան ըսաւ.- “Լաւ կը յիշեմ քանի մը տարիներ առաջ ձեր տուած խոստումը որ յարգեցիք գործել բարիք մը ամէն օր: Ահա այսօր արդէն ղեկավար պատասխանատուներ դարձած էք, ի խորոց սրտի կը շնորհաւորեմ ձեր յաջող ընթացքը կը մաղթեմ շարունակէք բարձրանալ նաեւ բարձրացնել ձեր յաջորդները”: Եզրափակելով իր խօսքը, ան ըսաւ թէ, իբրեւ ցեղասպանութենէն վերապրող, չի կրնար մոռնալ, մեծ հօր եւ մօր տառապանքն ու անոնց կորուստները, թերեւս պատմութիւնը անցեալին կը պատկանի, բայց անորմէ կարելի է սորվիլ սակայն թէ նոր պատմութիւն կերտելը մեր գործն է, պարտինք կերտել զայն արժանապատուութեամբ եւ ճակատնիս բաց մտնենք պատմութեան փայլուն էջը, մեր նահատակներուն թափած անմեղ արիւնը տնտեսական կամ որեւէ այլ քաղաքական հաշիւներու ի խնդիր չվաճառենք:
Ճաշի սպասարկութեան աւարտին հանդիսավար քոյր Տագէսեանը, հրաւիրեց մասնաճիւղի ատենապետ եղբ. Շանթ Ժամկոչեանը, որ վարչութեան կողմէ փոխանցէ այս առթիւ պատրաստուած յատուկ գնահատագրերը, որոնք տրուեցան քոյրեր Սօսի Փալանճեանին, Արշօ Ճարիճեանին, Մակի Քիւրտեանին, եղբայրներ Սեպուհ Սարգիսեանին եւ Պէրճ Շիքլանեանին, իրենց կատարած երկարատեւ ծառայութեան համար: Ապա հրաւիրուեցան ձեռնարկի կազմակերպիչ յանձնախումբի անդամները` Սեդա Պէտէրեան, Միրէյ Պասմաճեան, Ռոզիկ Պասմաճեան, Սիլվա Սաղրեան, Մակի Քիւրտեան, Սիլվա Շիքլանեան, Սօսի Փալանճեան եւ Պերճ Շիքլանեան, որոնք վարչութեան կողմէ պատուեցան ծաղկեփունջերով:
Ապա բեմ հրաւիրուեցաւ Լոս Անճելըսէն, այս առթիւ յատկապէս հրաւիրուած աշխարհահռչակ երգիչ Փօլ Պաղտատլեանը, որ իր նուագախումբով ներկաներուն հրամցուց իր հին ու նոր երգերէն շարք մը: Ներկաները, այս բացառիկ ձեռնարկէն բաժնուեցան իրենց հետ տանելով անմոռանալի յիշատակներ, դարձեալ հանդիպելու փափաքով:
