Հ.Մ.Ը.Մ.-ի Արցախի Նորագիր Սկաուտներու Բանակում` Բիւրականի Մէջ
Երկուշաբթի Օգոստոս 23-ին, Հ.Մ.Ը.Մ.-ի Կեդրոնական վարչութեան նախաձեռնութեամբ եւ Հ.Մ.Ը.Մ.-Հ.Ա.Ս.Կ.-ի կազմակերպութեամբ, Հ.Մ.Ը.Մ.-ի Բիւրականի բանակավայրին մէջ, Հայաստան, ընթացք առաւ Արցախի վերականգնած մասնաճիւղին առաջին բանակումը` մասնակցութեամբ 89 նորագիր սկաուտներու:
Հնգօրեայ այս բանակումին Արցախէն եկած նորագիր պատանի-պարմանուհիները առիթը կ’ունենան ծանօթանալու Հայ Մարմնակրթական Ընդհանուր Միութեան, սկաուտութեան ընդհանուր սկզբունքներուն եւ ազգային այն բոլոր արժէքներուն, որոնց դրօշին տակ գործած է 103-ամեայ Հ.Մ.Ը.Մ.-ը: Բանակումը կը յատկանշուի դաստիարակչական հարուստ յայտագիրներով, արշաւներով եւ ընկերային-ժամանցի պահերով:
Այս բանակումէն երկու շաբաթ առաջ, Օգոստոս 10-15-ին, Արցախէն 16 սկաուտ խմբապետներ իրենց մասնակցութիւնը բերին համահայաստանեան բանակումին, որ տեղի ունեցաւ Հ.Մ.Ը.Մ.-Հ․Ա․Ս․Կ․-ի վարչութեան նախաձեռնութեամբ եւ Հայաստանի բոլոր մասնաճիւղերէն 300 սկաուտներու մասնակցութեամբ:
Զուգահեռ, Հ.Մ.Ը.Մ.-Հ․Ա․Ս․Կ․, Հ․Օ․Մ․-ի Հայաստանի մասնաճիւղին հետ գործակցաբար, Օգոստոս 18-21-ին Բիւրականի մէջ իրականացուց Արցախի հերոսներու ընտանիքներու եւ Արցախէն գաղթական ընտանիքներու երեխաներուն յատուկ բանակում մը:
Արցախեան պատերազմին յաջորդած 10 ամսուան ակամայ դադարէն ետք, Հ.Մ.Ը.Մ.-ի Արցախի մեկուսի մասնաճիւղը վերականգնեցաւ անցնող Յուլիսին` Հ.Մ.Ը.Մ.-ի Կեդրոնական վարչութեան եռանդամ պատուիրակութեան մը Ստեփանակերտ այցելութեամբ: Մասնաճիւղը այժմ կը գործէ եօթնանդամ վարչութեամբ եւ կը պատրաստուի հոկտեմբերին իր կազմակերպելիք բանակումին, որուն հիւրաբար պիտի մասնակցին Հայաստանէն սկաուտներ:
