0
0
Նոյեմբեր 16-17ին, Գանատայի Քեպէք նահանգի Մոնրէալ քաղաքին մէջ, տեղի ունեցաւ Հիւսիսային Ամերկայի եւ Աւստրալիոյ Հ.Յ.Դ. Հայ Դատի յանձնախումբերու խորհրդաժողովը, որուն մասնակցեցան Գանատայի, Արեւմտեան Ամերիկայի, Արեւելեան Ամերիկայի եւ Աւստրալիոյ Հայ Դատի յանձնախումբերու ներկայացուցիչները, ինչպէս նաեւ Հայ Դատի յանձնախումբի Ուաշինկթընի գրասենեակի պատուիրակութիւնը:
Խորհրդաժողովի բացումը կատարեց Հ.Յ.Դ. Բիւրոյի անդամ, Հայ Դատի Կեդրոնական խորհուրդի նախագահ Յակոբ Տէր Խաչատուրեանը:
Երկօրեայ խորհրդաժողովի ընթացքին քննարկուեցան համաշխարհային ներկայ քաղաքական իրավիճակը եւ Հայ Դատի ներկայ հանգրուանի մարտահրաւէրները:
Խորհրդաժողովը լսեց ժողովին մասնակից շրջաններու աշխատանքային զեկոյցները եւ քննարկման բովէ անցուց Ամերիկեան ցամաքամասի եւ Ովկիանիոյ ցամաքամասի տարածքին Հայ Դատի աշխատանքներու ներկայ աշխատանքային գործընթացն ու մարտահրաւէրները:
Խորհրդաժողովը անդրադարձաւ Հայոց Ցեղասպանութեան ճանաչման եւ հատուցման խնդիրներուն, Եղեռնի հարիւրամեակին, Արցախի անկախութեան ճանաչման եւ Ջաւախքի հայութեան իրաւունքներու պաշտպանութեան գծով կատարուելիք աշխատանքներուն: Յատուկ շեշտադրութեամբ քննարկուեցան նաեւ Միացեալ նահանգներու, Գանատայի եւ Աւստրալիոյ հայահոծ գաղութներու նորահաս սերունդի յաւելեալ քաղաքականացման հարցը:
Խորհրդաժողովը շեշտեց Ամերիկեան ցամաքամասի եւ Աւստրալիոյ մէջ գործող Հայ Դատի յանձնախումբերու եւ գրասենեակներու Սուրիոյ հայութեան աջակցութեան ուղղութեամբ աշխատանքները հետեւողականօրէն շարունակելու անհրաժեշտութիւնը:
Նշենք թէ, այս ժողովի ազդանշանէն օր մը առաջ` Նոյեմբեր 15-ին, Մոնրէալի “Լը Քրիսթալ“ ընդունելութեան սրահին մէջ տեղի ունեցաւ Գանատայի Հայ Դատի յանձնախումբի նուիրահաւաքը, որուն ներկայ գտնուեցան աւելի քան երկու հարիւր Հայ Դատի զօրակիցներ:
Նուիրահաւաքի հանդիսութիւնները յառաջիկայ ամիսներուն պիտի շարունակուին Թորոնթոյի, Քէմպրիճի, Սէնթ Քէթըրինզի, Համիլթընի եւ Վանքուվըրի մէջ:
Օրուան հանդիսավար Լոռի Ապրաքեանի բարի գալուստի խօսքէն ետք, Գանատայի Հայ Դատի յանձնախումբի գործունէութեան անցեալի եւ ներկայի գործունէութեան զեկոյցն ու յառաջիկայ տարիներու աշխատանքներու ընդհանուր ծիրը համապարփակ ձեւով ներկայացուց յանձնախումբի ներկայացուցիչ Րաֆֆի Տօնապետեան, շեշտելով, թէ յանձնախումբի գործունէութեան գլխաւոր կիզակէտերն են հայ ժողովուրդի պահանջատիրական դատը, Արցախի եւ Ջաւախքի հիմնահարցերը եւ գանատական քաղաքական դաշտին վրայ դաշնակցային եւ նահանգային մակարդակներու վրայ տարուող Հայ Դատի գծով քարոզչական նպատակաուղղուած աշխատանքները:
Հ.Յ.Դ. Բիւրոյի Բիւրոյի անդամ, Հայ Դատի Կեդրոնական խորհուրդի նախագահ Յակոբ Տէր Խաչատուրեան իր կարգին զեկուցեց համաշխարհային գետնի վրայ տարուող աշխատանքներուն մասին, յայտնելով, թէ ներկայ հանգրուանին, 35 շրջաններու մէջ գործող Հայ Դատի յանձնախումբերու դիմագրաւած գլխաւոր մարտահրաւէրը` թրքական եւ ատրպէյճանական հակահայ քարոզչական արշաւն է:
Իրենց շրջաններու գործունէութեան մասին զեկոյցներով հանդէս եկան Ուաշինկթընի գրասենեակի նախագահ Քէն Խաչիկեան, Արեւմտեան Ա.Մ.Ն.-ի Հայ Դատի յանձնախումբի ներկայացուցիչ Նորա Յովսէփեան, Արեւելեան Ա.Մ.Ն.-ի ներկայացուցիչ Ռիչըրտ Սարաճեան եւ Աւստրալիոյ Հայ Դատի յանձնախումբի գործադիր տնօրէն Վաչէ Գահրամանեան:
Օրուան հանդիսավար Լոռի Ապրաքեան յայտարարեց, թէ նուիրահաւաքի հանդիսութեան ընթացքին նուիրատուներէն գոյացած գումարը հասած է 162 հազար տոլարի:
Հանդիսութեան փակումը կատարեց Առաջնորդ Սրբազան Խաժակ Արք. Յակոբեան, որ կոչ ուղղեց համայն գանատահայութեան տէր կանգնելու հայութեան արդար դատին եւ մասնակից դառնալու Հայ Դատի աշխատանքներուն:
