ՀԱՅ ԴԱՏԻ ԽՈՐՀՐԴԱԺՈՂՈՎԻՆ ԱՌԻԹՈՎ

0 0
Read Time:2 Minute, 42 Second

Ա.Ա.

Նոյեմբեր 29-էն մինչեւ Դեկտեմբեր 3, հինգ օրերու ընթացքին Հ․Յ․Դ․ Հայ Դատի մարմիններու, գրասենեակներու եւ յանձնախումբերու շուրջ յիսուն ներկայացուցիչներ՝ աշխարհի չորս ծագերէն հասնելով Հայաստանի մայրաքաղաք Երեւան, մասնակցեցան Հ․Յ․Դ․ Բիւրոյի Հայ Դատի Կեդրոնական Գրասենեակին կազմակերպած Հայ Դատի Խորհրդաժողովին, որ ամէն տարի կը կայանայ՝ լուսարձակի տակ բերելով տարբեր մայրաքաղաքներու մէջ գործող Հայ Դատի կառոյցներուն աշխատանքը, ծրագրերը եւ ընդհանուր ռազմավարութիւնը, որոնց հիմնական նպատակն է դէմ դնել թուրքեւատրպէյճանական ճակատին հակահայ գործողութիւններուն։

Եթէ նախապէս՝ մինչեւ 90-ական թուականները, Արցախեան հերոսամարտէն առաջ, հայ դատի աշխատանքները գլխաւորաբար կը կեդրոնանային Հայոց Ցեղասպանութեան միջազգային ճանաչումը ապահովող ընդհանուր նպատակին վրայ, Արցախի հանրապետութեան հռչակումէն ետք, Հայ Դատի ծիրին մէջ բնականօրէն կը մտնէր նաեւ Արցախի հանրապետութեան կայացման, հայկական երկրորդ հանրապետութեան ամրապնդման եւ Արցախի ժողովուրդին արդար իրաւունքներուն ապահովման կարեւոր աշխատանքը, որովհետեւ Հայ Դատի կառոյցները լաւապէս եւ ճիշդ կերպով գնահատած էին Արցախի  հարցին անբաժանելիութիւնը՝ Հայ Դատի ընդհանուր աշխատանքներէն։

Առաջին հերթին պէտք է ընդգծել, որ խորհրդաժողովին կայացման վայրերուն ընտրութեան շարքը իր պատգամը ունեցաւ։ Մասնակիցները խորհրդաժողովին աշխատանքներուն սկսան Հայաստանի մայրաքաղաքին մէջ, ապա անցան Սիւնիքի մարզի Գորիս քաղաքը, ուր շարունակեցին նիստերը։ Իսկ խորհրդաժողովին եզրափակիչ նիստերը կայացան Արցախի հանրապետութեան մայրաքաղաք Ստեփանակերտի մէջ։ Երեւան- Գորիս- Ստեփանակերտ։ Այս եռեակն է, որ ներկայիս առաւելաբար, անշուշտ խորհրդանշականօրէն վերածուած է պայքարի դաշտերու, նկատի ունենալով, որ Թուրքիա կը ջանայ իր նախապայմաններով Երեւանի իշխանութիւններուն հետ յարաբերութիւններու կարգաւորման հոլովոյթի սկսիլ։ Ուրեմն ասիկա բնականաբար դիւանագիտական լուրջ աշխատանքի եւ ներքին միասնականութեան կարիքը ունի, որպէսզի կարելի ըլլայ կեցուածքները եւ դիրքորոշումները ճշգրտել եւ համակարգել։ Երեւանէն արձակուած որեւէ որոշում՝ հայեւթուրք յարաբերութիւններու կարգաւորման վերաբերեալ, անկասկած պէտք է ունենայ ամբողջ հայութիւնը ներկայացնող քաղաքական բոլոր հոսանքներուն անվերապահ աջակցութիւնն ու զօրակցութիւնը։ Այլապէս խնդիրը պիտի վերածուի քաղաքական – դիւանագիտական այնպիսի իրավիճակի մը, ուր հայկական կողմը պիտի ըլլայ պարտեալը։ Հայ Դատի համակարգին մէջ գործող կառոյցները ասիկա յստակօրէն նշեցին եւ շեշտեցին խորհրդաժողովին ընթացքին։

Երկրորդ վայրը Գորիսն էր։ Այլ խօսքով Հայաստանի Սիւնիքի մարզը, որ այսօր ենթակայ է համաթուրանականութեան անմիջական վտանգին։ Դարձեալ լսելի են միջին դարերուն Հայաստանը ասպատակած Ալփարսլաններու բանակներուն ժխորն ու աղմուկը, որովհետեւ թրքական ճակատը վայրագ արշաւի մը անցած է՝ Հայաստանի հարաւը իր համաթուրանականութեան ընդարձակման վերջին հանգրուանին իրականացման եւ գործադրութեան թատերաբեմը դարձնելու համար։ Հայ Դատի խորհրդաժողովը այս իմաստով եւս յստակօրէն շեշտեց Հայաստանի հարաւին դէմ ցցուած վտանգը համակարգուած աշխատանքով եւ միասնական ճակատով չէզոքացնելու կարեւորութիւնը եւ յայտարարեց, որ առաջին գիծերու վրայ պիտի շարունակեն մնալ Հայ Դատի գործիչները, նուիրեալները, կամաւորները։Ամբողջ բանակ մը հայորդիներու։ Իրաւաբան, միջազգային օրէնքի մասնագէտ, պատմաբան, քաղաքական հարցերու եւ միջազգային յարաբերութիւններու փորձագէտ, ընկերաբան, նաեւ՝ տարբեր մասնագիտութիւններու տիրացած տղոց եւ աղջիկներու ուժեղ բանակ մը, որ միջազգային կազմակերպութիւններու մէջ եւ հարթակներու վրայ, պիտի շարունակէ պաշտպանել հայ ժողովուրդին արդար իրաւունքները։ Պիտի գործէ անշահախնդրօրէն։

Արցախեան երկրորդ պատերազմին պարտութենէն ետք ստեղծուած չափազանց վտանգաւոր իրավիճակները երրորդ հանգրուանին՝ Արցախի մայրաքաղաք Ստեփանակերտի մէջ խոր քննարկման առարկայ դարձնելով՝ Հայ Դատի խորհրդաժողովը  հաստատեց, որ Արցախի հիմնահարցը անբաժանելի մասն է Հայ Դատի ընդհանուր աշխատանքներուն։ Արցախեան գրաւեալ շրջաններու ազատագրման խնդիր, միջազգային հարթակներու վրայ Արցախի տագնապին էութեան ճիշդ մեկնաբանութեան նպաստող համակարգուած աշխատանք, Արցախի ժողովուրդին ինքնորոշման իրաւունքի իրաւականութեան ապահովում, Արցախի եւ գրաւեալ շրջաններու մէջ հայկական մշակութային ժառանգութեան պահպանման խնդիր եւ այլ կարեւոր հարցեր Ստեփանակերտի մէջ քննարկելով եւ ապա եզրափակիչ յայտարարութիւնը Արցախի յաւերժական մայրաքաղաքէն հրապարակելով՝ Հ․Յ․Դ․ Հայ Դատի մէկ եւ միացեալ համակարգը հաստատեց, որ պայքարը պիտի շարունակուի։ Պայքար մը, որ թելադրուած է «Պայրաքտարներ»-ու եւ թուրքեւատրպէյճանական ճակատին կողմէ սանձազերծուած, միջազգային ահաբեկչական խմբակներու եւ վարձկաններու կարեւոր մասնակցութեամբ մղուած պատերազմին նահատակներուն պատգամով։

Հայ Դատի կառոյցները ամբողջ հայութեան ուղղուած  մարտահրաւէրները դիմագրաւելու անսահման ներուժ ունին։ Ասիկա անգամ մը եւս հաստատուեցաւ։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՍԱՀՄԱՆԱԶԱՏՈՒՄ-ՍԱՀՄԱՆԱԳԾՈՒՄ. ԱՌԱՆՑ ՉԱՐ ԼԵԶՈՒ ԸԼԼԱԼՈՒ, ԲԱՅՑ ԽՈՐ ՄՏԱՀՈԳՈՒԹԵԱՄԲ
Next post ԵՐԵՒԱՆԻ ՑԱՄՔՈՂ ԳԵՏԸ…

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles