Հաղորդագրութիւն Հ.Յ.Դ. Հայ Դատի Յանձնախումբերու Եւ Գրասենեակներու Խորհրդաժողովի Աշխատանքներուն Մասին

0 0
Read Time:3 Minute, 45 Second

Նոյեմբեր 29-էն Դեկտեմբեր 3, 2021-ին Երեւանի, Գորիսի եւ Ստեփանակերտի մէջ գումարուեցաւ ՀՅԴ Հայ դատի յանձնախումբերու եւ գրասենեակներու խորհրդաժողովը: Խորհրդաժողովին մասնակցած են Հայ դատի աւելի քան 20 յանձնախումբերու շուրջ 50 ներկայացուցիչներ:

Ստորեւ, այս գծով Հ․Յ․Դ․ Բիւրոյի Հայ Դատի կեդրոնական գրասենեակին հրապարակած հաղորդագրութիւնը․-

Խորհրդաժողովի մասնակիցները լսեցին զեկուցումներ`

ա) Հ․Յ․Դ․ Բիւրոյի եւ Հայաստանի գերագոյն մարմնի կողմից` Հայաստանի ու Արցախի Հանրապետութիւնների արտաքին քաղաքականութեան մարտահրաւէրների, Հայաստանի Հանրապետութեան ներքաղաքական իրավիճակի եւ 2020 թուականի 44-օրեայ պատերազմի ընթացքում ու այնուհետեւ Հ․Յ․Դ․ Հայ դատի համակարգի աշխատանքների մասին,

բ) ոլորտային փորձագէտների կողմից ներկայացուած` Ատրպէյճանի եւ Թուրքիոյ արտաքին ու ներքին ճակատներում քայլերի ու զարգացումների վերաբերեալ, ինչպէս նաեւ`

գ) Արցախի Հանրապետութեան բարձրաստիճան պաշտօնեաների կողմից (Արտաքին գործերի նախարար, Մարդու իրաւունքների պաշտպան, Անվտանգութեան խորհուրդի քարտուղար)` համապատասխան ոլորտների վերաբերեալ:

Խորհրդաժողովի մասնակիցները Երեւանում այցելեցին Եռաբլուր, իսկ Ստեփանակերտում` Եղբայրական գերեզմանատուն-յուշահամալիր, որտեղ յարգանքի տուրք մատուցեցին արցախեան բոլոր մարտերում եւ Հայաստանի սահմանների պաշտպանութեան ժամանակ զոհուածների յիշատակին: Նրանք ծաղկամատոյցով յարգեցին նաեւ Արցախի Հանրապետութեան Ազգային ժողովի առաջին նախագահ Արթուր Մկրտչեանի յիշատակը:

Խորհրդաժողովը քննութեան է առել Հայ դատի համաշխարհային ցանցի գործունէութիւնը բոլոր ուղղութիւններով` սկսած 2020 թուականի փետրուարին կայացած նախորդ խորհրդաժողովից: Հայ ժողովրդի նկատմամբ նախորդ տարի սանձազերծուած ազրպէյճանաթուրքական յարձակումին եւ դրա հետեւանքով ստեղծուած նոր իրավիճակին համապատասխան` խորհրդաժողովը կատարեց անհրաժեշտ աշխատակարգային եւ մարտավարական ճշգրտումներ, յստակեցրեց գործողութիւնների ծրագիրը` միտուած աւելի ընդարձակելու Հայ դատի գործունէութեան շրջանակը եւ ճշգրտելու թիրախները: Յատուկ ուշադրութիւն է դարձուել Հայ դատի յանձնախմբերի եւ գրասենեակների կարողականութիւնների զարգացմանը` ցանցային գործունէութեան արդիւնաւէտութեան բարձրացման համաթեքսթում:

Քննարկումների արդիւնքում խորհրդաժողովն արձանագրեց

  1. Հայ դատի յանձնախմբերն ու գրասենեակները քայլ անգամ չեն նահանջելու հայութեան շահերի պաշտպանութեան դիրքերից եւ յաւելեալ թափով լծուելու են նոր նախաձեռնութիւնների կենսագործմանը, որոնք նպատակ են ունենալու նպաստել Հայաստանի անվտանգութեան, ժողովրդագրութեան բարելաւմանը, տնտեսական զարգացման եւ ժողովրդավարական խնդիրների լուծմանը:
  2. Հայաստանի Հանրապետութեան անվտանգային համակարգի ուժեղացումը պայմանաւորուած է արտաքին քաղաքականութեան հաւասարակշռմամբ եւ բովանդակային յագեցուածութեամբ: Հայաստանը պէտք է վստահելի գործընկեր հանդիսանայ եւ քաղաքական որոշակի օրակարգ ունենայ ինչպէս ռազմավարական դաշնակցի, այնպէս էլ ռազմավարական գործընկերների եւ առհասարակ բարեկամ պետութիւնների հետ:
  3. Արցախեան հիմնախնդրի վերջնական ու համապարփակ լուծումը հնարաւոր է միջազգային իրաւունքով սահմանուած կարգով` Արցախի ժողովրդի ազատ ինքնորոշման իրաւունքի լիակատար իրացման հնարաւորութեան վերականգնման եւ ճանաչման, ինչպէս նաեւ Արցախի Հանրապետութեան բռնազաւթուած տարածքների ապաբռնագրաւման պարագայում: Արցախի Հանրապետութիւնը մինչեւ իր անկախութեան լիարժէք ճանաչումը պէտք է ունենայ միջազգայնօրէն երաշխաւորուած անվտանգութիւն եւ Հայաստանի Հանրապետութեան հետ անխափան ցամաքային կապ: Արցախի կարգավիճակի ճշդման համար պէտք է վերաշխուժանան Ե․Ա․Հ․Կ․-ի Մինսքի խմբի եռանախագահութեան միջնորդութեամբ բանակցութիւնները:
  4. Հայ դատի յանձնախմբերը, Ուաշինկթընում գրանցուած «Հայկական իրաւական կեդրոն»-ի հետ, շարունակելու են միջազգային դատական գործընթացներում հետապնդել հայ ռազմագերիների խնդիրը` Ատրպէյճանի դէմ ներկայացնելով բազմաբնոյթ դատական գործեր, որոնք վերաբերում են նաեւ մարդկութեան դէմ ուղղուած պատերազմական յանցագործութիւններին:
  5. Հայ դատի յանձնախմբերն ու գրասենեակները հետեւողական աշխատանք են տանելու Արցախի, ներառեալ ներկայում ատրպէյճանական բռնագրաւման տակ գտնուող նրա հատուածներում, հայկական մշակութային ժառանգութեան եւ դրա հայկական պատկանելութեան պահպանման ուղղութեամբ` աշխատելով խնդրով մտահոգ պետութիւնների, միջազգային մշակութային եւ կրօնական կազմակերպութիւնների հետ:
  6. Շարունակուելու է Հայոց ցեղասպանութեան միջազգային ճանաչման եւ հատուցման հետապնդման գործընթացը: Հայոց ցեղասպանութեան դատապարտումն ու հետեւանքների հնարաւորինս յաղթահարումը պէտք է ամրապնդուի որպէս միջազգային խնդիր` մարդկութեան նկատմամբ հետագայ ցեղասպան գործողութիւնների կանխման համաթեքսթում:
  7. Թուրքիոյ ներկայ պահուածքը եւ յարձակողապաշտ քաղաքական վարքը պէտք է ուշադրութեան արժանանան Մ․Ա․Կ․-ի անվտանգութեան խորհրդի կողմից` իբրեւ համընդհանուր սպառնալիք: Թուրքիան, իր փանթուրքական անթաքոյց նկրտումներով, վեր է ածուել միջազգային յարաբերութիւնները կազմաքանդող եւ իրեն յարակից գրեթէ բոլոր տարածաշրջաններն ապակայունացնող գործօնի: Արցախեան 44-օրեայ պատերազմի հրահրմամբ, ապա դրանում ուղղակի ներգրաւմամբ` Թուրքիան, ըստ էութեան, իրեն դուրս է դրել միջազգային յարաբերութիւնների իրաւակարգաւորման տիրոյթից:
  8. Թուրքիոյ ներկայ սանձարձակ պահուածքը խթանող գործօններից մէկն էլ այդ պետութեան նախկին ու ներկայ բռնութիւնների եւ ոճրագործութիւնների, այդ թւում Հայոց ցեղասպանութեան համար միջազգային պատասխանատուութեան չենթարկուելու հետեւանք է:
  9. Հայաստանի իշխանութիւններին շարունակելու ենք խստօրէն յորդորել եւ զգուշացնել` Հայաստան-Թուրքիա քաղաքական երկխօսութեան պարագայում կասկածի չեն կարող ենթարկուել մեր հայրենիքի գերիշխանութիւնը, հայ ժողովրդի անժամանցելի իրաւունքներն ու արժանապատուութիւնը:
  10. Հայաստանի ներկայ իշխանութիւնների քաղաքական վարքը, այդ թւում Թուրքիային եւ Հայաստան-Ատրպէյճան սահմանին առնչուող տարերային յայտարարութիւնները, ինչպէս նաեւ արցախեան հիմնախնդրում անյստակութիւնը ո՛չ միայն հարուածում են հայոց պետականութեան անվտանգութեանն ու ազգային-պետական շահերին, այլեւ խոչընդոտում են Հայ դատի յանձնախմբերի եւ գրասենեակների գործունէութեանը վերոյիշեալ ուղղութիւններով:
  11. Քննարկելով Մերձաւոր Արեւելքի երկրներում ստեղծուած տագնապալի կացութիւնը` Հայ Դատի յանձնախմբերն ու գրասենեակները շարունակելու են յատուկ ուշադրութեան տակ պահել Մերձաւոր Արեւելքի, յատկապէս Սուրիոյ եւ Լիբանանի հայահոծ համայնքների խնդիրներն ու ապահովել համապատասխան օժանդակութիւն միջազգային աղբիւրներից:
  12. Անկախ Հայաստանում ստեղծուած ներքաղաքական իրավիճակից` Հայ Դատի յանձնախմբերն աշխատանքները վերաշխուժացնելու են նաեւ Հայաստանի տնտեսական զարգացմանը նպաստելու ուղղութեամբ:
  13. Շարունակելու ենք մղել հայ երիտասարդութեանը, որպէսզի հայրենիքի, թէ սփիւռքի պարագայում մասնակցեն իրենց ապրած երկրների քաղաքական կեանքին:
  14. Հայ Դատի յանձնախմբերն ու գրասենեակները շարունակաբար արդիականացնելու են իրենց գործելաոճը եւ ընդարձակելու են ընկերային ցանցերում իրենց գործուն ներկայութիւնը` որդեգրելով ժամանակակից արդիական միջոցներ:
  15. Հ․Յ․Դ․ Բիւրոյի Հայ դատի կեդրոնական գրասենեակը շարունակելու է հանրութեանը իրազեկել Հ․Յ․Դ․ Հայ դատի յանձնախմբերի եւ գրասենեակների գործունէութեան հիմնական ուղղութիւնների եւ յընթացս զարգացումների վերաբերեալ:

ՀՅԴ ԲԻՒՐՈՅԻ ՀԱՅ ԴԱՏԻ ԿԵԴՐՈՆԱԿԱՆ ԳՐԱՍԵՆԵԱԿ

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles