ԿԵԴՐՈՆԱԿԱՆՑԻ ԱՐՄԵՆԱԿ ՏԵՍԱԿԱՆ ՀԱՐՑԵՐՈՎ ԿԸ ԶԲԱՂԻ

0 0
Read Time:1 Minute, 48 Second

Ֆրանսայի նախագահական ընտրապայքարի հեռատեսիլային հաղորդումներուն եւ վիճարկումներուն կը հետեւէր Արմենակ: Կարեւոր մարդոց պէս էր ժամանակ չունէր, այցի չէր գար, եւ մենք աշխարհի բաներէն անտեղեակ մնացած էինք:
«Ռոման ֆլէօվ»ի նմանող եւ բազմաթիւ արարներով ընտրութիւնը վերջ գտաւ: Արմենակ եւ Էլպիս յամեցող գարնան արեւոտ շաբաթ օրը սակառ մը ծիրանով այցելութեան եկան: Հայաստանը հեռու էր, բայց օտար ծիրանը իր գոյնով հասաւ: Եղածով գոհանալ վատ չէ:
Հազիւ նստած, Արմենակ՝ ինքնագոհ՝ յայտարարեց.
– Այնքա՜ն բաներ ըսին, օր եւ գիշեր, թեր ու դէմ, որ ինքզինքս քաղաքական գիտութիւններու համալսարանի ուսանող կարծեցի: Մեծ գաղափարներ եւ վերլուծումներ կը լսէի եւ անոնց հակառակը: Գիտես ի՞նչ, շատ բան սորվեցայ, բայց չքուէարկեցի, որովհետեւ կը խորհէի որ բոլորն ալ ճիշդ էին եւ բոլորն ալ սխալ:
– Ըսել կ’ուզես, որ վերջին եւ նախորդ խօսողին ըսածով կը համոզուէիր:
– Ճիշդ այդպէս: Երբ հեռատեսիլը կ’անջատէի, ես ինծի հարց կու տայի, որ այդ բոլոր մեծերը եւ բանգէտ լրագրողները ի՞նչ ըսին, որ երէկ ըսած չըլլային, երէկ՝ նախորդ եւ նախորդին նախորդ ընտրութեան առիթով: Մէկ ողջմտութիւն կար: Կ’ըսուէր, որեւէ պետական պաշտօնի ընտրուող, յաջորդական երեք անգամէ աւելի թեկնածու պէտք չէ ըլլայ:
– Արմենակ, չե՞ս գիտեր, որ մարդիկ երբ կը խօսին ճիշդ բաներ կ’ըսեն: Բայց կը մոռնան իրենց ըսածը, երբ անոնք վերաբերին իրենց:
– Դուն ալ ճիշդ ես, Մակա՛ր: Մարդը տկար է, դժուար է կպչուն մեղրի կարասին քովէն հեռանալ, անաշխատ եկամուտի աղբիւրէ: Այսքան բաներ ըսելէ եւ լսելէ ետք մարդիկ երբ նոյն անձերը կ’ընտրեն, անոնց մօտ կ’աճի նախախնամական կամ անփոխարինելի ըլլալու զգացումը, եւ գահի վրայ մնալու համար միջոցներու միջեւ խտրութիւն չեն դներ: Բայց այնքան լսեցի, որ ես ալ համոզուեցայ, որ բան մը պիտի փոխուի:
– Ի՞նչ բանի համոզուեցար, Արմենակ:
– Այն բանին, որ ժողովրդավարութիւնը կեղծիք պէտք չէ ըլլայ, նոյն անձերէն եւ նոյն ընտանիքներէն դուրս խելացի մարդիկ կան, հայրենասէրներ, ազգասէրներ, հանրութեան ծառայելու ցանկութիւն ունեցողներ: Բայց անոնք բաւարար չափով աճպարար չեն քուէատէրի քիթէն բռնելով իրենց ուզած տեղը տանելու համար:
– Ուրեմն, սիրելիս, երեք ամիս տեւած հեռատեսիլային համալսարանէդ այն սորվեցար, որ ընտրել-ընտրուելու խաղին մէջ մտնողը լաւ աճպարար պէտք է ըլլայ:
– Ճիշդ այդպէս: Եւ քուէարկելու չգացի, որպէսզի ի վերուստ տրուած կամ հօր եւ որդիի ծննդեան իրաւունքով ստացուած աճպարարի խաղին զոհ չերթամ: Գիտես, Մակար, մենք ածու ենք փոքր, բայց մեծերու խաղերէն սորվելիք չունինք,- եզրակացուց ինքզինք յարգող վերջին մոհիկանի հայատեսակ Կեդրոնականցին:

Մակար ի Գաղիա

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles