ԹՈՒՐՔԻՈՅ ՄԷՋ ԷՏԸՄ ՇԻՖ ՔՆՆԱՐԿԱԾ Է ՔԵՍԱՊԻ ԵՒ ՀԱՅՈՑ ՑԵՂԱՍՊԱՆՈՒԹԵԱՆ ՀԱՐՑԵՐԸ

0 0
Read Time:1 Minute, 52 Second

p2 Adam-Schiff  ՊՈԼԻՍ.- Միջին Արեւելքին վերաբերող շարք մը հարցեր քննելու նպատակով Թուրքիա այցելած Միացեալ Նահանգներու քոնկրէսական պատուիրակութեան մաս կազմած է քոնկրէսական Էտըմ Շիֆ, որ վարչապետ Ռեճէպ Թայիպ Էրտողանի, նախագահ Ապտուլահ Կիւլի ու այլ բարձրաստիճան պաշտօնատարներու հետ իր ունեցած հանդիպումներուն ընթացքին քննարկումի նիւթ դարձուց Հայոց Ցեղասպանութեան, Քեսապի հայութեան տեղահանութեան ու հայութիւնը յուզող հարցերը:

Կիւլի հետ իր ունեցած հանդիպման ընթացքին Շիֆ շեշտեց, որ իր ընտրատարածքին մէջ ապրող ութսուն հազար հայերէն իւրաքանչիւրը Հայոց Ցեղասպանութեան հետեւանքներէն ձեւով մը ազդուած է: “Անոնցմէ իւրաքանչիւրը ծնողք մը, մեծ հայր կամ մեծ մայր մը, զարմիկ մը, եղբայրներ ու քոյրեր, կամ նոյնիսկ ամբողջ ընտանիքը կորսնցուցած է: Անոնց ցաւը իրական է եւ վէրքը տակաւին բաց կը մնայ: Ասիկա (Ցեղասպանութիւնը) պատմութեան պատկանող յուշ մը չէ միայն: Երբ դուք կամ վարչապետը կը յայտնէք, թէ հայերու նման թուրքերն ալ վնասներ կրած են, ապա ասիկա համազօր է ըսելու, թէ Համաշխարհային Բ. պատերազմին ընթացքին գերմանացիներն ալ տուժած են: Ճիշդ է, որ մեծ թիւով գերմանացի քաղաքայիններ սպաննուեցան, բայց այդ իրողութիւնը ոչ մէկ կերպով կը նուաստացնէ կամ կրնայ պատճառ դառնալ Ողջակիզման ուրացման: Նոյն տրամաբանութեամբ, կարելի չէ ուրանալ Ցեղասպանութիւնը, պարզապէս որովհետեւ մեծ թիւով թուրքեր մահացած են: Կ`ըսէք, թէ պատմական յանձնախումբ մը պէտք է կազմուի Ցեղասպանութեան դէպքերը հաստատելու համար, սակայն նման առաջարկ մը համազօր է ըսելու, թէ յանձնախումբ մը պէտք է կազմուի՝ Ողջակիզման պատմական իրականութիւնը հաստատելու համար“, նշեց Շիֆ:
Իսկ, Էրտողանի հետ ունեցած իր հանդիպումին ընթացքին, ան անտրամաբանական նկատեց իր խօսակիցին այն պնդումը, թէ Հայոց Ցեղասպանութիւնը տեղի չէ ունեցած, որովհետեւ տակաւին հայեր կ`ապրին Թուրքիոյ տարածքին: Ան աւելցուց, որ նման խօսք մը համազօր պիտի ըլլար անհիմն այն պնդումին, թէ քանի որ որոշ թիւով հրեաներ վերապրած են հրէական Ողջակիզումէն ետք, ուրեմն Ողջակիզում տեղի չէ ունեցած: Շիֆ նաեւ հարցականի տակ առաւ Էրտողանի այն պնդումը, թէ 19151923ի իրադարձութեանց շուրջ կարելի է ազատ քննարկումներ կատարել Թուրքիոյ մէջ, մինչ Հայոց Ցեղասպանութիւնը հաստատող մտաւորականներ, պատմաբաններ կամ լրագրողներ շարունակ հալածանքի կ`ենթարկուին եւ կը պաշտօնազրկուին:
Ան նաեւ քննեց Քեսապի հայութեան տեղահանութեան ստեղծած հարցը, ինչպէս նաեւ փոքրաթիւ քեսապահայերու Թուրքիա տեղափոխման հարցը, միաժամանակ կոչ ուղղած է Անգարայի իշխանութեանց, որ Արցախի տագնապի լուծման բանակցութիւնները անջատեն Հայաստանի դէմ իրենց պարտադրած շրջափակումէն, որպէսզի կարելի ըլլայ առնուազն ԹուրքիաՀայաստան առեւտրական յարաբերութիւնները բնականոնացնել:
Այս գծով, Ամերիկայի Հայ Դատի յանձնախումբի գործադիր վարիչ Արամ Համբարեան յայտնեց . “Կ`ուզենք շնորհակալութիւն յայտնել քոնկրէսական Շիֆին, որ Հայոց Ցեղասպանութեան ուրացման հարցը ուղղակի քննարկման նիւթ դարձուցած է Թուրքիոյ ղեկավարներուն հետ՝ արդարութիւն եւ իրականութեան բացայայտում պահանջելով“:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles