0
0
Եւրոպայի Հայ Դատի յանձնախումբը, դատապարտած է Թուրքիոյ Սուրուճ շրջանին մէջ, տեղի ունեցած պայթումը, որ արդիւնքն է 18 գարուններ բոլորած եւ Իսլամական Պետութեան հաշւոյն գործող եւ ծայրայեղական գաղափարներու տէր աղջկայ մը կատարած անձնասպանական գործողութեան:
Ընկերվարական երիտասարդական միութիւններու դաշնակցութեան աւելի քան երեք հարիւր անդամներ կը մնային դէպքին վայրը, որ մշակութային կեդրոն մըն էր: Անոնք կ՛օգնէին Արաբ Բունարի վերականգնման աշխատանքներուն: Մշակութային կեդրոնը կը ղեկավարէ Սուրուճի քաղաքապետութիւնը, որ կը գտնուի քրտամէտ Ժողովուրդներու ժողովրդավարական կուսակցութեան վերահսկողութեան տակ: Կեդրոնը յաճախ կը հիւրընկալէ Արաբ Բունարէն եկած տեղահանուածներու հետ աշխատող կամաւորներ եւ լրագրողներ:
«Այս ահաբեկչութիւնը յատկապէս հրէշաւոր է անով, որ Սուրուճի մէջ հաւաքուած երիտասարդները կը պատրաստուէին երթալ Արաբ Բունար եւ իրենց նպաստը բերել քաղաքի վերանորոգման գործին: Սուրիոյ մէջ ահաբեկիչներուն աջակցելու` Էրտողանի քաղաքականութիւնը ուշ կամ կանուխ իր դէմ պիտի գործէ: Ցաւօք, այսքան անմեղ երիտասարդներու կորուստ եղաւ», յայտնեց Եւրոպայի Հայ Դատի յանձնախումբի նախագահ Գասպար Կարապետեան:
Միւս կողմէ, Պոլսոյ մէջ թրքական ոստիկանութիւնը անգամ մը եւս բիրտ ուժ կիրարկած է Սուրուճի մէջ 32 զոհ պատճառած ահաբեկչական յարձակումին դէմ Թաքսիմ հրապարակին վրայ բողոքի ցոյց կատարողներուն նկատմամբ: Ցուցարարները Թուրքիոյ նախագահ Էրտողանն ու իշխող «Արդարութիւն եւ Բարգաւաճում» կուսակցութիւնը մեղադրած են:
