0
0
ԹԻՖԼԻՍ.- Փետրուար 19-ին, մեծ շուքով նշուեցաւ Յովհաննէս Թումանեանի ծննդեան 149-ամեայ յոբելեանը, որուն իրենց մասնակցութիւնը բերին նաեւ Վրաստանի մէջ Հ.Հ. դեսպանութեան անձնակազմը:
Ձեռնարկները տեղի ունեցան Թիֆլիսի հայ գրողներու եւ հասարակական գործիչներու Խոջիվանքի պանթէոնին մէջ, ուր ծաղիկներ խոնարհուեցան Յովհաննէս Թումանեանի շիրմաքարին առջեւ եւ Վիրահայոց թեմի Առաջնորդ Վազգէն եպիսկոպոս Միրզախանեանը մատուցեց հոգեհանգստեան կարգ: Ապա, բանաստեղծուհի Անահիտ Բոստանջեանի սկիզբ դրած աւանդոյթին համաձայն` գիրք նուիրելու տօնի ծիրէն ներս ներկաներուն նուիրուեցան գիրքեր:
Տուն-թանգարանի աշխատակազմի եւ Թիֆլիսի Պետրոս Ադամեանի պետական դրամատիկական թատրոնի աշխատակազմի կողմէ բեմադրուեցան տիկնիկային ներկայացում` Յովհաննէս Թումանեանի «Շունն ու կատուն» ստեղծագործութեան հիման վրայ:
Ներկայացման աւարտին՝ Վիրահայոց թեմի Առաջնորդը ընդգծեց մշակոյթի դերն ու նշանակութիւնը` աւելցնելով որ տիկնիկային թատրոնի ստեղծումը նոր երանգ պիտի հաղորդէ Թիֆլիսի հայութեան մշակութային կեանքին:
Վրաստանի մէջ Հ.Հ. դեսպանութեան մամուլի խօսնակ Յարութիւն Հայրապետեանը շնորհակալութիւն յայտնեց նախաձեռնութեան հեղինակներուն եւ ընդգծեց Հայրենիքի սահմաններէն դուրս եւս հայկական մշակոյթը աշխոյժ պահելու կարեւորութիւնը:
