Զօրակցութիւն, Դատապարտութիւն, Կարծիքներ․ Դարմանները Ի՞նչ Կ՛արժեն

0 0
Read Time:1 Minute, 49 Second

 

            Անձրեւոտ Կիրակի: Արմենակ եւ Էլպիս, դրացի Էրիքի ինքնաշարժով այցի եկան:

            Արդիականացած Մակարուհին չինական կանաչ թէյ հիւրասիրեց, կոնեակով, կիպրական պանիրով եւ լաւաշով:

            Էրիք յուզումով խօսեցաւ Հայաստանի երիտասարդ զոհերու եւ աւերուած Ստեփանակերտի մասին: Ապա՝

            – Ֆրանսա օդանաւով մարդասիրական օժանդակութիւն ղրկեց, ասպետական Ֆրանսան դատապարտեց թուրք-ազերիական նախայարձակումը:

            Էլպիս շարունակեց.

            – Ֆրանսան բարեկամ է:

            Արմենակ կանաչ թէյին հետ կոնեակը կուլ տուաւ եւ ըսաւ.

            – Իրաւ-կեղծ մարդասէրներ, մեծ ու պզտիկ, կը զօրակցին Հայաստանի, կը դատապարտեն թուրքը եւ ազերին: Մեր զարգացած հայերը, էլիտան, վերլուծումներ կ’ընեն, յանկերգելով՝ իմ կարծիքով, à mon avis: Մարդիկ կը լսեն, ըսողները կը լսեն իրենք զիրենք, բայց ոճրագործին ձեռքը չեն բռներ, անհանգիստ չեն ըլլար:

– Մարդ,- ըսաւ Էլպիս,- ի՞նչ կ’ուզես որ ընեն:

            –  Զօրակցութիւն, դատապարտութիւն, կարծիքներ, որսի հրացանի չափ ալ արժէք չունին զէնքի եւ զէնք վաճառողներուն դէմ: Գազանը անդին գնա՛ չի հասկնար: Զայն վախցնելու եւ փախցնելու համար բոց պէտք է: Խօսքերը փուչիկ են, գազան վախցնող խարոյկ չեն: Մակա՛ր, գրոց-բրոց բարեկամներդ, փոխան երախտագիտական խօսքերու, օդային դատապարտութիւններու եւ  հազիւ բերնէ ելած եւ կորսուած զօրակցութիւններու, թող ըսեն որ բառերը զոհ չեն պաշտպաներ, գազան չեն վախցներ:

            Էլպիս կրկին միջամտեց.

            – Կ’ուզե՞ս որ հիւլէական Շարլ տը Կոլ օդանաւակիրը Կովկաս ղրկեն:

            – Ճի՛շդ: Եթէ այդ օդանաւակիրը Կիպրոսի մօտերը գնաց, կրնայ Սեւ Ծով ալ երթալ: Եթէ ճիհատիստներու դէմ բանակ ղրկեցին Մալի, կրնան քանի մը զինուոր ալ ղրկել Արցախ, ժողովուրդ մը եւ անոր մշակոյթը պաշտպանելու համար:

            Մակարուհին միջամտեց եւ լուծում առաջարկեց.

            – Արմենա՛կ, կը բաժնեմ տեսակէտներդ, բայց անոնց մասին հոս խօսիլ այրած սրտի մխիթարանք է, ինչո՞ւ թերթերու մէջ չես գրեր, չես պահանջեր, որ Ֆրանսայի, Ամերիկայի, Գերմանիոյ եւ հիմա ալ Չինաստանի հայերը  այս բոլորը ըսեն թերթով, ձայնասփիւռով, հեռատեսիլով, չգոհանան յայտնի մարդիկը հիւրասիրելով եւ ծափահարելով:

            – Այդ գործն է մեծերու շուրջ անոնց կարեւորութենէն բաժին ունենալու համար թռվռացողներուն: Իսկ լուսաւոր եւ չնաշխարհիկ ձրի կարծիքներ յայտնողները լաւ կ’ընեն եթէ երթան եւ տեղւոյն վրայ աճեցնեն գազան վախցնող խարոյկի բոցերը:

            Որպէսզի Էրիք չվիրաւորուի ըսի.

            –  Արմենա՛կ, գրէ՛: Փա՜ռք սփիւռքին, ունինք հայերէն, անգլերէն, ֆրանսերէն, գերմաներէն, արաբերէն, պարսկերէն, թրքերէն, ռուսերէն, թերթեր,  վաղը զանզիպարերէն եւ զուլուերէն: Դուն գրէ՛:

            – Գրուածը հայը չի կարդար, ինչո՞ւ իր հոգերով տարուած  օտարը կարդայ:

            Արմենակ Յիսուսի պէս է, կը խօսի, չի գրեր: Բայց Յիսուս լսող ունեցաւ:

            Հայաստան կ’ըսեն. «Բա՛ ի՞նչ անենք, որ Արմենակ Յիսուս չի»:

 

Մակար ի Գաղիա, 14 դեկտեմբեր 2020

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles