0
0
Կիրակի Դեկտեմբեր 6, 2009-ին, Միշըն Հիլի (Քալիֆորնիա) Արարատ-Էսքիճեան Թանգարանէն ներս, տեղի ունեցաւ յատուկ ձեռնարկ մը,
որուն նիւթն էր հայոց հնաբանութիւնը: Օրուան դասախօսներն էին դոկտ. Բաւել Աւետիսեան` Հայաստանի Հնաբանութեան եւ Մարդաբանութեան Ակադեմիայի վարիչ տնօրէն, եւ դոկտ. Կրէկըրի Արէշեան` Լոս Անճելըսի Եու. Սի. Էլ. Էյ. Համալսարանի Հնաբանութեան Քոթսըն Ակադեմիայէն:
Ելոյթը հովանաւորուած էր թանգարանի, Իւ. Սի. Էլ. Էյ.-ի Հայկական Լեզուի եւ Մշակոյթի Կեդրոնի, եւ Հայերէն Ուսումնասիրութիւններու Ազգային Հիմնարկի (NAASR) կողմէ:
Դոկտ. Աւետիսեան դասախօսեց հայերէնով: Ուղղակիօրէն անոր խօսքը անգլերէնի թարգմանեց դոկտ. Արէշեան: Նիւթն էր` “Միջազգային Ակադեմական Համագործակցութիւն, եւ Անոր Կարեւորութիւնը Հայկական Պատմութեան եւ Քաղաքակրթութեան ճիւղերէն ներս”:
Դոկտ. Կրէկըրի Արէշեանի նիւթն էր “Վեց Հազար Տարուայ Քարայրաբնակ Քաղաքակրթութեան մը Յայտնաբերումը Հայաստանի մէջ”, ներկայացուած անգլերէն լեզուով: Արէշեան ներկաներուն տեղեկացուց 2007-2009ի միջեւ տեղի ունեցած պեղումներուն մասին, Վայոց-Ձորի նահանգի Արփա Գետի մօտերը: Սոյն ծրագիրը երաշխաւորած էին Հայաստանի Հնաբանութեան եւ Մարդաբանութեան Ակադեմիան եւ Եու. Սի. Էլ. Էյ.-ի Հնաբանութեան Քոթսըն Ակադեմիան:
