«ԴԻՄԱԴՐՈՒԹԻՒՆ» ՇԱՐԺՄԱՆ ՄԱՐՏԱՎԱՐՈՒԹԵԱՆ ՓՈՓՈԽՈՒԹԻՒՆԸ ԳՐԱՒԱԿԱՆ՝ ԱՒԵԼԻ ԱՐԴԻՒՆԱՒԷՏ ԸՆԹԱՑՔԻ ԵՒ ՅԱՂԹԱԿԱՆ ԵԼՔԻ

0 1
Read Time:2 Minute, 41 Second

ԺԱԳ ՅԱԿՈԲԵԱՆ

«Հայրենիք»

Որեւէ քաղաքական զանգուածային շարժման պարագային, ժամանակի թաւալքին հետ շատ յաճախ անհրաժեշտութիւն կը ծագի, որ մօտեցումներու եւ մարտավարական ընտրանքներու մէջ փոփոխութիւններ կատարուին, տուեալ շարժումը աւելի կենսունակ եւ աւելի աշխուժ դարձնելու համար: Քաղաքական յարափոփոխ կեանքը դէմ է քարացածութեան՝ մասնաւորաբար մարտավարական ընտրանքներու պարագային, եւ քաղաքական շարժում մը, իր ծաւալած պայքարին ընթացքին, առանց երբեք հրաժարելու իր գլխաւոր նպատակներէն եւ սկզբունքներէն, պարտի պատշաճեցումներ կատարել իր գործունէութեան ձեւերուն մէջ, այդ նպատակներուն եւ սկզբունքներուն կենսագործումը ապահովելու համար:

Տարբեր չէր կրնար ըլլալ պարագան Հայաստանի ազգային ընդդիմադիր քաղաքական ուժերը եւ կազմակերպութիւնները համախմբած «Դիմադրութիւն» շարժումին, որուն մեկնարկը տրուած էր անցեալ տարուան Նոյեմբեր 9-ին՝ Արցախեան Բ. պատերազմի աւարտի եւ Հայոց աշխարհին ու հայութեան պարտադրուած Նոյեմբեր 9, 2020-ի պարտուողական, յանձնուողական եռակողմ յայտարարութեան ստորագրութեան միամեակին առիթով: Նոյեմբեր 9 2021-էն ետք «Դիմադրութիւն» շարժումի ուժականութեան մէջ բաւական մեծ ելեւէջներ արձանագրուեցան մինչեւ այս տարուան ապրիլ ամսուան վերջը, երբ անհրաժեշտ նկատուեցաւ փողոցային պայքարը ամէնօրեայ դարձնելու՝ անհնազանդութեան զանգուածային շարժումներու, քայլերթերու, ինքնաշարժներով երթերու եւ բազմամարդ հանրահաւաքներու միջոցով: Իրականութեան մէջ ալ, Ապրիլ 25-էն Յունիս 14 երկարած ժամանակաշրջանին ընթացքին «Դիմադրութիւն» շարժումին ստեղծած փողոցային պայքարի ուժականութիւնը կրցած էր շարժումին շուրջ համախմբել հազարաւորներ, որոնց մէջ արթնցած էր ազգային մաքուր ջիղը՝ երգին մէջի «լաօ»-ն:

Շարժումը կրցած էր հայրենի հանրային կարծիքի մակարդակով ինքզինք պարտադրել իբրեւ հասարակական կեանքին մէջ եղանակ ստեղծող միջոց, իսկ շարժումին որդեգրած քայլերուն շնորհիւ փաշինեանական իշխանութիւնները հաշիւ սկսան ընել Ատրպէյճանի եւ Թուրքիոյ հետ իրենց ունենալիք նոր գործարքներուն համար: Այդ ընթացքին նաեւ Երեւանի Ֆրանսայի հրապարակը որդեգրուեցաւ իբրեւ ամէնօրեայ հաւաքման վայր, շարժման ընելիքները ծրագրելու ու յայտարարելու կեդրոն, եւ իբրեւ իշխանութիւններուն վրայ յաւելեալ ճնշամիջոց այդտեղ տեղադրուեցան վրաններ, որոնք պիտի ապահովէին տուեալ վայրին մէջ երթեւեկի եւ շարժումի անդամալուծումը:

14 Յունիսին շարժումի ղեկավարութեան կողմէ յայտարարուեցաւ, որ այնուհետեւ մարտավարական փոփոխութիւններ կը կատարուին շարժումի գործելաձեւին մէջ: «Դիմադրութիւն» շարժումը այդ օրէն ի վեր կը շարունակէ ի զօրու պահել իր ամէնօրեայ բողոքի ու անհնազանդութեան քայլերը, բայց վերցուց Երեւանի Ֆրանսայի հրապարակին վրայ տեղադրուած վրանները, որոնք առանձինն արդիւնաւէտ միջոց չէին իշխանութիւններուն դէմ մղուող այսպիսի երկար շունչ պահանջող պայքարի մը մէջ: «Դիմադրութիւն» շարժումին նպատակը միեւնոյնը կը մնայ: Նպատակը երբեք եւ երբեք սոսկական իշխանափոխութիւնը չէ: Նպատակը նախ կանխելն է պարտուողական եւ յանձնուողական որեւէ նոր պայմանաւորուածութիւն, որ կրնայ գոյանալ Ատրպէյճանի հետ, ինչպէս նաեւ Թուրքիոյ հետ այսպէս կոչուած «յարաբերութիւններու կարգաւորման» որեւէ քայլ, որ ապագային կրնայ գերեզմանել մեր պահանջատիրական պայքարը, իսկ կանխելու, կանխարգիլելու լաւագոյն միջոցը փաշինեանական իշխանութիւնը հեռացնելն է: Իշխանութիւն մը, որ Նոյեմբեր 9 2020-էն ի վեր բազմիցս ապացուցած է թրքական եւ ատրպէյճանական օրակարգերու իր սպասարկումը:

«Դիմադրութիւն» շարժումի գործունէութեան մարտավարական փոփոխութեան ոլորտին մէջ շատ կարեւոր է պայքարը աւելի ցանցային, ապակեդրոն դարձնելը: Արդէն միտում կայ շարժումին ղեկավարութեան կողմէ՝ երթալու մարզեր, շրջաններուն մէջ ստեղծելու անհնազանդութեան օճախներ: Հոն՝ մարզերուն եւ հեռաւոր շրջաններուն մէջ են, որ առկայ են կնճռոտ ընկերային հարցերը: Եւ պայքարը միայն Արցախի համար չէ, միայն ազգային խնդիրներուն համար չէ, հակառակ վերջիններուս ներկայացուցած կարեւորութեան, այլ նաեւ արդարութիւն եւ արժանապատիւ կեանք ստեղծելու համար է: Բան մը, որ խոստացուած էր այսպէս կոչուած «թաւշեայ յեղափոխութեան» ժամանակ, բայց եւ այնպէս դարձած էր օդին մէջ մնացած խօսք:

Շարժումին եւ պայքարին ցանցայնացումը եւ ապակեդրոնացումը պիտի ապահովէ անհրաժեշտ ճիգերու կուտակումը՝ իրականացնելու համար «Դիմադրութիւն» շարժումին տենչացած փոփոխութիւնը՝ սպասուող երկարաշունչ պայքարէ ետք: Շարժումին ղեկավարութիւնը ներկայիս կը գիտակցի, բայց այս գիտակցութիւնը պէտք է նաեւ արթնցած ժողովուրդին սեփականութիւնը դարձնել, որ այս պայքարը դիւրին չէ, եւ անհրաժեշտ է երկար շունչ ունենալ անոր յաջողութիւնը ապահովելու համար: Այդ յաջողութիւնը անհրաժեշտաբար կ՛ապահովուի նաեւ «Դիմադրութիւն» շարժումին շուրջ Հայաստան-Արցախ-Սփիւռք եռամիասնութեան վերականգնումով:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles