ԳՈՐՇ ԳԱՅԼԵՐ…ԵՒ ԱՄՊԵՐ

0 0
Read Time:1 Minute, 36 Second

khemp

ՀԱՅՐԵՆԻՔ
Խմբագրական
Սեպտեմբեր 14, 2015
Միայն լարուած չէ մթնոլորտը, ոչ ալ պարզապէս վատթարացած կարելի է նկատել ապահովական իրավիճակը, այլ բառին բուն իմաստով Թուրքիոյ մէջ, պայթուցիկ կացութիւն կը տիրէ եւ դէպքերը այնպէս մը կ՛ընթանան որ երկրին մէջ կրնայ քաոսային վիճակ տիրել:
Այս գծով, արդէն իսկ Ժողովուրդներու Ժողովրդավարական քրտամէտ Կուսակցութիւնը լոյս ընծայած է մամլոյ հաղորդագրութիւն մը, նկարագրելով ներկայ կացութիւնը, եւ յաւելեալ մանրամասնութիւններ փոխանցելով կատարուած հալածանքներուն, խափանարարական արարքներուն եւ սպանութիւններուն մասին:
Յատկապէս հարաւ-արեւելեան շրջանէն ներս, «Ժողովուրդներու Ժողովրդավարական» Կուսակցութեան ազդեցութեան տակ գտնուող գիւղեր ու քաղաքներ զրկուած են հեռաձայնային եւ ելեկտրացանցային դրութիւններէն: Վերոյիշեալ կուսակցութեան պատկանող աւելի քան հարիւր կեդրոնատեղիներ ականման թիրախ դարձած են: Յիշատակելի է մանաւանդ, մայրաքաղաք Անգարայի կեդրոնատեղիին վրայ կատարուած յարձակումն ու հրկիզումը:
Յարձակող խուլիկանները անխնայ եղած են եւ փճացուցած եւ հրոյ ճարակ դարձուցած՝ արխիւներ, գրասենեակներ եւ ժողովասրահներ: Այս դէպքերը այնքան մը ազդած են տեղւոյն քիւրտերուն վրայ, անոնք հեռացած են մայրաքաղաքէն, նշելով թէ իրենք կը նկատուին անբաղձալի տարր՝ «փերսոնա նոն կրաթա»: Նոյնիսկ, Տիգրանակերտի (Տիարպէքիր) մէջ, ընդհարումներու եւ բախումներու պատճառով Սուրբ Կիրակոս եկեղեցին փոքր վնասներ ստացած է:
Նախագահ Էրտողան եւ իր «Արդարութիւն եւ Բարգաւաճում» կուսակցութիւնը քարոզչական արշաւի մը դիմած են, յաւելեալ պղտոր կացութիւն ստեղծելով եւ աղաւաղելով իրականութիւնը: Այս պարունակով կարելի է դիտել եւ մեկնաբանել վերջերս Թուրքիոյ խորհրդարանին կողմէ մէկ տարիով երկարաձգուիլը, անհրաժեշտութեան պարագային թրքական բանակին Սուրիոյ եւ Իրաքի մէջ զինուորական գործողութիւններու արտօնութեան ժամկէտը: Եւ այդ նոյն բանաձեւին մէջ ահաբեկչական Իսլամական Պետութենէն աւելի Ժողովուրդներու Ժողովրդավարական Կուսակցութեան զինակից Քրտական Աշխատաւորական Կուսակցութեան զինեալ ահաբեկչական տարրերու եւ անոնց հակապետական գործունէութեան մասին եւս նշուած է:
Դեռ աւելին, մտահոգիչը այն է թէ այդ բանաձեւին մէջ կը նշուի թէ Թուրքիան, որ մեծ կարեւորութիւն կ՛ընծայէ դրացի Իրաքի հողային ամբողջականութեան, ազգային միութեան եւ կայունութեան, պէտք է առաւել եւս շարունակէ իր զինուորական, քաղաքական, դիւանագիտական քայլերն ու նախաձեռնութիւնները ընդդէմ ահաբեկչական խմբաւորումներու ներկայութեան:
Ահաւասիկ, շրջանէն ներս անդորրութիւնը խախտելու պատճառաբանութեամբ, մութ հաշիւներ, որոնք կրնան այլ եզրակացութիւններու յանգիլ: Շաբաթներէ ի վեր շարունակուող այս խափանարարական արարքներուն կարգին, բացայայտ է նաեւ ծայրայեղական եւ փանթուրքիզմի դրօշակակիր «Գորշ Գայլեր»ու ներկայութիւնն ու մասնակցութիւնը:
«Գորշ Գայլեր»…որոնք գորշ ամպերով կը ծածկեն Թուրքիան:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Արցախի Տեղական Ինքնակառավարման Մարմիններու Ընտրութիւններ Հ.Յ.Դ.-ի 40 Թեկնածուներէն՝ 32-ը Ընտրուած
Next post ՀԱՅԱՍՏԱՆԻ ՎԵՐԱՆԿԱԽԱՑՄԱՆ ՔԱՌՈՐԴ ԴԱՐԸ ԵՒ ՄԵՆՔ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles