ԲԱՑՈՒՄ՝ «ՍՈՒՐԲ ԳՐԻԳՈՐ ՏԱԹԵՒԱՑԻ» ԱՄԱՌՆԱՅԻՆ ԼՍԱՐԱՆԻՆ 

Կիրակի, 6 Յուլիսին, Ա.Մ.Ն. Արեւելեան Թեմի Ազգային Առաջնորդարանի «Սուրբ Գրիգոր Տաթեւացի» լսարանի ամառնային 39-րդ տարեշրջանին բացումը կատարուեցաւ «Շիլոհ» (Հիուիթ, Նիւ Ճըրզի) ճամբարին մէջ։ Այս տարի, լսարանը ունի 13-18 տարեկան 58 երկսեռ աշակերտներ։ Անձնակազմին մաս կը կազմեն հոգեւորական եւ աշխարհական 19 ուսուցիչներ եւ օգնականներ։ Լսարանը կեդրոնացած է երեք նպատակներու վրայ՝ քրիստոնէական դաստիարակութիւն եւ կազմաւորում, մարզական խաղեր եւ աղօթք ու պաշտամունք։

Մասնակիցները Միացեալ Նահանգերու եւ Գանատայի 11 ծուխերէ եկած են. Ս. Լուսաւորիչ Մայր Եկեղեցի (Նիւ Եորք), Ս. Գրիգոր Լուսաւորիչ եկեղեցի (Ֆիլատելֆիա, Փէնսիլվէնիա), Ս. Վարդանանց եկեղեցի (Ռիճֆիլտ, Նիւ Ճըրզի), Ս. Ստեփանոս եկեղեցի (Ուութըրթաուն, Մասաչուսէց), Ս. Գրիգոր Լուսաւորիչ եկեղեցի (Նորթ Անտովըր, Մասաչուսէց), Ս. Վարդանանց եկեղեցի (Փրաւիտընս, Ռոտ Այլընտ), Ս. Խաչ եկեղեցի (Թրոյ, Նիւ Եորք), Ս. Լուսաւորիչ եկեղեցի (Ուայթ Փլէնյզ, Նիւ Եորք), Ս. Ղեւոնդեանց եկեղեցի (Ֆէր Լօն, Նիւ Ճըրզի), Ս. Աստուածածին (Ուիլոտէյլ, Օնթարիօ) եւ Ս. Գէորգ եկեղեցի (Լաւալ, Քէպէք)։

Լսարանը վերջ պիտի գտնէ Կիրակի, 13 Յուլիսին, Սուրբ Պատարագի մատուցմամբ Սրբոց Վարդանանց (Ռիճֆիլտ, Նիւ Ճըրզի) եկեղեցւոյ մէջ։