Բացայայտումի, Յիշատակի Եւ Հայկական Ժառանգութեան Շաբաթավերջը` Հայկական Ծագումնաբանութեան 10-ամեակի Ժողովը՝ Նոյեմբեր 21-ին

ՈՒԱԹԸՐԹԱՈՒՆ (Մասաչուսէց) .- Շաբաթ, Նոյեմբեր 21-ին, Միացեալ Նահանգներէն եւ այլ երկիրներէ ժամանող հայեր պիտի համախմբուին Հայկական Մշակութային եւ Կրթական Կեդրոնին (ACEC) մէջ՝ մասնակցելու Հայկական Ծագումնաբանութեան 10-ամեակի ժողովին։ Այս յոբելեանը կարեւոր հանգրուան մըն է այն շարժումին համար, որուն նպատակն է հայերը վերամիացնել իրենց ընտանիքներուն, նախնիներու բնակավայրերուն եւ պատմութեան հին էջերուն։ Ժողովը, որ կը հովանաւորուի Ամերիկայի Հայ Մշակութային Միութեան (ACAA) կողմէ, պիտի սկսի առաւօտեան ժամը 9-ին։ Օրուան ընթացքին տեղի պիտի ունենան հետաքրքրական դասախօսութիւններ, գործնական հետազօտական ցուցմունքներու ներկայացում, նոր աղբիւրներու ծանօթացում եւ ընտանեկան պատմութեամբ հետաքրքրուող անձերու միջեւ կապեր հաստատելու առիթներ։ Իւրաքանչիւր հայ ընտանիք իր պատմութիւնը ունի։ Ոմանք այդ պատմութիւնը սիրով պահպանած են սերունդէ սերունդ։ Ուրիշներու պարագային, անիկա կը գոյատեւէ միայն բեկորներով՝ լուսանկար մը, ընտանեկան անուն մը, մեծ ծնողներուն յիշած գիւղի մը անունը կամ Հայոց Ցեղասպանութեամբ ընդհատուած պատմութիւն մը։ Շատ մը ժառանգորդներու համար այդ պատմութիւնները վերագտնելու փափաքը վերածուած է անձնական եւ խորապէս իմաստալից որոնումի մը։ Նոյեմբեր 11-ին կը փակուի արձանագրութեան ժամկէտը։ Միօչեայ այս ժողովին պիտի յաջորդէ պատմական «Երգն Հայաստանի» ժապաւէնին յատուկ ցուցադրութիւնը, յաջորդ օրը՝ Նոյեմբեր 22-ին։ Մէկ ամիս միայն մնացած ըլլալով՝ կազմակերպիչները յայտարարած են բանախօսներու վերջնական ցանկը։ Բոլոր հետաքրքրուողները պարտին արձանագրուիլ մինչեւ Նոյեմբեր 11-ի վերջնաժամկէտը։ Արձանագրութեան եւ յաւելեալ տեղեկութիւններու համար այցելել՝ https://armeniangenealogyconference.com/։ Հինգ ժողովներ, բազմաթիւ ընտանեկան կապեր Այն, ինչ որ սկիզբ առած էր հայերուն իրենց նախնիներու պատմութիւնը հետազօտելու գործիքներուն եւ աղբիւրներուն ծանօթացնելու նպատակով, տարիներու ընթացքին վերածուած է հետազօտողներու, պատմաբաններու, ծագումնաբաններու եւ իրենց արմատները վերագտնել փափաքող անհատներու աշխոյժ համայնքի մը։ Հայկական ծագումնաբանութեան ժողովները ցոյց տուած են, որ ժամանակին անվերադարձ կորսուած համարուած ընտանեկան պատմութիւններու վերակազմութիւնը այսօր հետզհետէ աւելի իրագործելի կը դառնայ։ Ներգաղթի արձանագրութիւնները, Օսմանեան շրջանի փաստաթուղթերը, եկեղեցական մատեանները, համայնքային յուշամատեանները, պատմական լուսանկարները եւ ծագումնաբանութեան (DNA) քննութեան զարգացումները նոր դռներ կը բանան, որոնց գոյութիւնը նախորդ սերունդները հազիւ կրնային երեւակայել։ Սակայն հայկական ծագումնաբանութիւնը շատ աւելին է, քան անուններու եւ թուականներու հաւաքածոյ մը։ Անիկա Ցեղասպանութեամբ, բռնի տեղահանութեամբ եւ գաղթով խզուած կապերու վերականգնումն է։ Անիկա նախնիներուն ապրած գիւղերը, անոնց կառուցած համայնքները եւ զանազան ցամաքամասերու վրայ ապրող հայ ընտանիքները իրարու կապող յարաբերութիւնները բացայայտելու փորձն է։ Տասներորդ տարեդարձի ժողովը կը նշէ թէ՛ մինչեւ այսօր արձանագրուած յառաջընթացը եւ թէ՛ ապագային առջեւ բացուող բացառիկ կարելիութիւնները։ Փորձառու եւ ատակ բանախօսներու ցանկ մը Այս տարուան ժողովը մէկտեղ կը բերէ առաջատար հետազօտողներ եւ դասախօսներ, որոնց աշխատանքը կը վերափոխէ այն միջոցները, եւ այդպէս հայերը կը բացայայտեն եւ կը պահպանեն իրենց ընտանեկան պատմութիւնները։ Մարք Արսլան․ հայ ներգաղթեալներու փորձառութեան վերակազմութիւնը Հայկական ծագումնաբանութեան ոլորտի առաջամարտիկներէն Մարք Արսլան իր հայկական արմատներուն հետազօտութեան սկսած է 1971-ին։ Ամերիկայի մէջ ծնած երկրորդ սերունդի հայ մը ըլլալով՝ ան 2005-ին հիմնած է հայկական ծննդաբանութեան ծրագիրը եւ զարգացուցած հայկական ներգաղթի ծրագիրը, որ կը պարունակէ մինչեւ 1930 թուականը Հիւսիսային Ամերիկայի հայկական սփիւռքը փաստագրող ընդարձակ շտեմարան մը։ Անոր տասնամեակներու հետազօտութիւնները բազմաթիւ ընտանիքներու օգնած են գտնելու իրենց ներգաղթեալ նախնիները, հետեւելու անոնց՝ Ամերիկա հասնելու ուղիներուն եւ վերականգնելու սերունդներ առաջ իրարմէ հեռացած ազգականներու կապերը։ Իր ելոյթին ընթացքին ան մասնակիցներուն պիտի ներկայացնէ հայկական ներգաղթի եւ քաղաքացիութեան արձանագրութիւններուն ուսումնասիրութեան համար անհրաժեշտ աղբիւրներն ու գործելաձեւերը։ Կրեկըրի Ժունտանեան եւ Լիզա Միսաքեան․ Ուայթինսվիլի հայերուն պատմութեան պահպանումը Ի՞նչ կը պատահի, երբ ամբողջ համայնք մը կը դառնայ ծագումնաբանական հետազօտութեան նիւթ։ Ուայթինսվիլի հայերու ծրագիրին համահիմնադիրներ՝ Կրեկորի Ճունտանեան եւ Լիզա Միսաքեան պիտի ներկայացնեն, թէ ինչպէ՛ս կարելի է տեղական պատմութիւնը, ընտանեկան արձանագրութիւնները, լուսանկարներն ու անձնական յիշողութիւնները համախմբելով՝ պահպանել հայ-ամերիկեան համայնքի մը պատմութիւնը։ Անոնց ստեղծած նորարարական կայքէջը արդի յուշամատեան մը կը հանդիսանայ՝ շարունակելով սփիւռքի մէջ 19-րդ դարու վերջաւորութենէն ի վեր զարգացած հայկական յիշատակի գիրքերու աւանդոյթը։ Անոնց աշխատանքը օրինակելի ուղի մը կը բանայ նաեւ այլ հայկական համայնքներու համար, որոնք կը փափաքին փաստագրել իրենց պատմութիւնը՝ նախքան անփոխարինելի յիշողութիւններու եւ արձանագրութիւններու անհետացումը։ Զէյնէպ Տեւրիմ Կիւրսէլ․ հայկական կեանքերու բացայայտումը օսմանեան շրջանի լուսանկարներու միջոցով Լուսանկարները կրնան բացայայտել պատմութիւններ, զորս գրաւոր փաստաթուղթերը լուռ կը պահեն։ Զէյնէպ Տեւրիմ Կիւրսէլ՝ Ռաթկըրզ համալսարանի մարդաբանութեան դասախօս եւ հաղորդակցութեան մարդաբանութեան մասնագէտ, հեղինակն է Portraits of Unbelonging գիրքին։ Աշխատութիւնը կ՚ուսումնասիրէ դէպի Միացեալ Նահանգներ հայերու օսմանեան շրջանի արտագաղթը՝ 1890-ական թուականներէն մինչեւ Սուլթան Ապտիւլ Համիտ Բ.-ի իշխանութեան աւարտը՝ 1909-ին։ Անոր հետազօտութիւնը հետաքրքրական տեսանկիւն մը կը ներկայացնէ հայկական գաղթին տեսողական փաստագրութեան եւ պատմական լուսանկարներու միջոցաւ այն անհատներուն ու ընտանիքներուն փորձառութիւնը վերակազմելու կարելիութիւններուն մասին, որոնք ստիպուած էին կողմնորոշուիլ քաղաքական անորոշութեամբ եւ տեղահանութեամբ յատկանշուած աշխարհի մը մէջ։ Պօղոս Չիչէքճեան․ հայ ընտանիքներու կապը Եւրոպայի տարածքին Հայ ընտանիքներու պատմութիւնները հազուադէպօրէն կը սահմանափակուին ներկայիս պետական սահմաններով։ Նոյն ընտանիքին վերաբերող արձանագրութիւնները կրնան ցրուած ըլլալ Հայաստանի, Թուրքիոյ, Ֆրանսայի, Միջին Արեւելքի, Միացեալ Նահանգներու եւ բազմաթիւ այլ երկիրներու մէջ։ Ֆրանսայի մէջ գործող Հայկական Ծագումնաբանութեան Միջազգային Կապերու Կազմակերպութեան (RIGA/RIGAGEN) համահիմնադիրն ու փոխնախագահը՝ Պօղոս Չիչէքճեան, մասնակիցներուն պիտի ներկայացնէ հայկական ծագումնաբանական փաստաթուղթերու պահպանման եւ ընտանիքներու վերամիաւորման ուղղութեամբ Ֆրանսայի մէջ տարուող կարեւոր աշխատանքը։ RIGA-ն անշահաբեր կազմակերպութիւն մըն է, որուն նպատակն է ցրուած արխիւները աւելի մատչելի դարձնել եւ սփիւռքի հայերուն անվճար ծագումնաբանական աջակցութիւն տրամադրել։ Կազմակերպութեան գործունէութիւնը կը փաստէ, թէ միջազգային գործակցութիւնը որքան մեծ կարելիութիւններ կ՚ընձեռէ հայկական ընտանեկան պատմութեան հետազօտութիւնը պատմականօրէն դժուարացուցած արգելքները յաղթահարելու համար։ Ճորճ Աղճայեան․ Ծննդաբանութիւնն ու հայկական ընտանեկան պատմութեան վերակազմութիւնը Ցեղասպանութենէն վերապրածներու ժառանգորդներուն համար, աւանդական փաստաթուղթերու վրայ հիմնուած հետազօտութիւնը յաճախ կը բախի գրեթէ անյաղթահարելի խոչընդոտի մը՝ արձանագրութիւններու ոչնչացումին կամ անհետացումին եւ ընտանեկան կապերու խզումին։ Հայկական ծագումնաբանութեան համաժողովներու կազմակերպիչ եւ Hye Roots: Descendants of Ararat հաղորդաշարի վարիչ Ճորճ Աղջայեան պիտի ներկայացնէ, թէ ինչպէ՛ս գենետիք ծագումնաբանութեան զարգացումները կ՚օգնեն յաղթահարելու այս դժուարութիւնները։ Անոր ելոյթը պիտի կեդրոնանայ ծննդաբանութեան քննութեան կարեւոր դերին վրայ՝ մինչեւ այդ պահը անծանօթ ազգականներու յայտնաբերման, ընտանեկան կապերու վերակազմութեան եւ տեղահանութեան հետեւանքով սերունդներու ընթացքին կորսուած կապերու վերականգնման գործին մէջ։ Ծննդաբանութիւնը չի կրնար փոխարինել պատմական հետազօտութիւնը։ Սակայն փաստաթուղթերու, բանաւոր պատմութիւններու եւ աշխարհագրական գիտելիքներու հետ համադրուած՝ անիկա կրնայ դառնալ հայկական ընտանեկան պատմութիւնները վերակառուցելու բացառիկ միջոց մը։ Համադամ ճաշ, երաժշտութիւն եւ բարեկամութիւն՝ յիշատակելի երեկոյ մը Ժողովին փորձառութիւնը պիտի շարունակուի նաեւ վերջին ելոյթէն ետք։ Երեկոյեան շուրջ ժամը 6-էն սկսեալ մասնակիցները պիտի համախմբուին հայկական տօնական ընթրիքի մը շուրջ, որ պիտի պատրաստուի Գէորգ Պոյաճեանի եւ Ուոթըրթաունի Հայ Ամերիկեան Ընկերային Ակումբին կողմէ։ Երեկոն պիտի աշխուժացնէ հայկական երաժիշտներու ընտրանի մը՝ Ճոն Պերպերեան — ուտ Մալ Պարսամեան — քլարինէթ Ճէյսըն Նարոյեան — երգ եւ թմբուկ Պրուս Ճիկերճեան — կիթառ Ընթրիքը կը խոստանայ հայկական համեղ ճաշերու, աւանդական երաժշտութեան եւ աշխոյժ զրոյցներու հաճելի երեկոյ մը՝ մասնակիցներուն հնարաւորութիւն տալով խորացնելու օրուան ընթացքին հաստատուած կապերը։ Շատերու համար այսպիսի ոչ պաշտօնական զրոյցները համաժողովին ամէնէն արժէքաւոր բաժիններէն են։ Ընթրիքի մը ընթացքին զրոյցը կրնայ առաջնորդել նախնիներու նոյն գիւղին բացայայտման, անսպասելի ազգակցական կապի մը յայտնաբերման կամ նոր հետազօտական գործակցութեան մը։ Նոյեմբեր 22, Կիրակի․ «Երգն Հայաստանի» պատմական ժապաւէնին բացառիկ ցուցադրութիւնը Հայկական ժառանգութեան նուիրուած շաբաթավերջը պիտի շարունակուի Կիրակի, Նոյեմբեր 22-ին, «Երգն Հայաստանի» պատմական հայկական ժապաւէնին յատուկ ցուցադրութեամբ։ Հ․ Յ․ Դաշնակցութեան Պոսթընի «Սարդարապատ» կոմիտէութեան, Ուաթըրթաունի դպրոցի Հայկական Ակումբին եւ Հայկական Ծագումնաբանութեան Համաժողովին համատեղ նախաձեռնութեամբ կազմակերպուած ցուցադրութիւնը տեղի պիտի ունենայ յետմիջօրէի ժամը 2-ին, Ուաթըրթաունի նոր աւագ դպրոցի սրահին մէջ՝ 50 Columbia Street, Watertown, Massachusetts։ 1930-ին առաջին անգամ ցուցադրուած «Երգն Հայաստանի»-ն խորաթափանց պատուհան մը կը բանայ Հայոց Ցեղասպանութենէն վերապրած հայերու կեանքին վրայ, երբ անոնք տարագրութեան մէջ կը փորձէին վերակառուցել իրենց աշխարհը։ Ժապաւէնը կը պատմէ տիկին Ղազարեանի մասին, որ 1920-ական թուականներուն Ֆրանսայի մէջ ապրող հայ մայր մըն է։ Անոր վեց զաւակներէն հինգը զոհուած են Ցեղասպանութեան ընթացքին։ Միայն մէկ որդի մը վերապրած է, եւ մայրն ու որդին միասին կը փորձեն նոր կեանք մը սկսիլ իրենց հետ կրելով անձնական կորուստի եւ հայրենիքի կործանման ծանր բեռը։ Անցեալի սարսափներուն յիշողութեամբ հետապնդուած՝ տիկին Ղազարեան կը մարմնաւորէ այն վիշտը, տոկունութիւնն ու անորոշութիւնը, զորս ապրած են անհամար հայ վերապրողներ։ Սակայն ժապաւէնը շատ աւելին է, քան մէկ ընտանիքի տառապանքին գեղարուեստական պատումը։ Անիկա կը պարունակէ պատմական բացառիկ տեսարաններ, որոնց շարքին՝ Զմիւռնիոյ հրդեհին պատկերները, հայկական ականաւոր դէմքերու՝ Ալեքսանդր Խատիսեանի եւ Աւետիս Ահարոնեանի ներկայութիւնը, ինչպէս նաեւ Ֆրանսայի մէջ հայկական դպրոցներու, սկաուտական կազմակերպութիւններու եւ համայնքային կեանքի դրուագներ։ Այս պատկերները հազուագիւտ տեսողական վկայութիւն մը կը ներկայացնեն այն սերունդին մասին, որ ականատես եղաւ իր նախնիներու համայնքներուն կործանումին, միաժամանակ հիմնելով նոր հայկական սփիւռքի մը կառոյցները։ Ծագումնաբանութեան համաժողովին մասնակցողներուն համար ժապաւէնը յատկապէս իմաստալից յաւելում մը պիտի ըլլայ նախորդ օրուան ելոյթներուն։ Մինչ ծագումնաբանութիւնը կը փորձէ վերականգնել առանձին նախնիներու ինքնութիւնն ու ընտանեկան կապերը, «Երգն Հայաստանի»-ն հանդիսատեսը դէմ յանդիման կը բերէ այն պատմական աշխարհին հետ, ուր ապրած են այդ նախնիները՝ անոնց ապրած ողբերգութիւնը, վճռակամութիւնը, հաստատութիւնները եւ հայկական ինքնութեան հանդէպ անսասան յանձնառութիւնը։ Ցուցադրութենէն գոյացած հասոյթը պիտի յատկացուի Հ․Յ․Դ․ Արխիւներու Ծրագիրին, որուն նպատակն է պահպանել հայկական պատմական նիւթերը եւ զանոնք մատչելի դարձնել ապագայ սերունդներուն։ Նուիրատուութիւնները եւս սիրով կ՚ընդունուին։ Տոմսեր կարելի է գնել հետեւեալ հասցէով՝ https://www.zeffy.com/en-US/ticketing/film-screening-the-melody-of-armenia Ժապաւէնին նախնական տեսերիզը կարելի է դիտել այստեղ՝ https://www.instagram.com/p/DeKEcrTg2En/?hl=en Ցուցադրութեան մասին յաւելեալ տեղեկութիւններու համար զանգահարել կամ գրութիւն ղրկել՝ (818) 649-4726 թիւին։ Մէկ դար առաջ հայ ընտանիքներ ցրուած էին աշխարհի չորս կողմերը՝ իրենց հետ տանելով իրենց պատմութիւններուն ու կորսուած համայնքներու յիշողութիւններուն բեկորները։ Այսօր, հետազօտութեան, արհեստագիտութեան, գործակցութեան եւ յիշելու հաւաքական վճռակամութեան շնորհիւ, այդ բեկորները դարձեալ կը միաւորուին։

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է

Բացայայտումի, Յիշատակի Եւ Հայկական Ժառանգութեան Շաբաթավերջը` Հայկական Ծագումնաբանութեան 10-ամեակի Ժողովը՝ Նոյեմբեր 21-ին

This story is FREE for you...

Leave a Reply

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

This story is FREE for you...

Leave a Reply

Նմանատիպ Յօդուածներ

Պոսթըն․- Հայկական Ժառանգութեան Այգիին Քանդակը Վերաձեւաւորուեցաւ

«Հետք»-ի Խմբագիր Էտիկ Պաղտասարեան Պիտի Ժամանէ Պոսթըն

ԽՈՐԷՆ ԱՐՔ. ՏՈՂՐԱՄԱՃԵԱՆ՝ ՆԻՒ ՊՐԻԹԸՆԻ ՍՈՒՐԲ ՍՏԵՓԱՆՈՍ ԵԿԵՂԵՑՒՈՅ ՆՈՐ ՀՈՎԻՒ

Աղքատ… Մեծահարուստը, Կամ Վիթխարի ՄԵԾը՝ «Փեփէ» Մուխիքա

Ցեղասպանութեան Ընկերներ. Գերմանիան Ողջակիզումէն Ոչի՞նչ Սորված է