ՆԻՒ ԵՈՐՔԻ ՄԷՋ .- ԲԱՆԱՍՏԵՂԾ ԶԱՀՐԱՏԻ 90ԱՄԵԱԿ

0 0
Read Time:2 Minute, 15 Second

p7 Zahrat  Կազմակերպութեամբ՝ ԷսայեանԿեդրոնական Սանուց Միութեան, Շաբաթ գիշեր Մայիս 10ին, տեղի ունեցաւ բանաստեղծ Զահրատի 90ամեակին նուիրուած հանդիսութիւն՝ Նիւ Եորքի Սրբոց Նահատակաց եկեղեցւոյ սրահին մէջ: Այս յատուկ առիթով Պոլսէն ժամանած էր Զահրատի այրին՝ Տիկ. Անայիս Եալտըզճեան եւ Պոլսահայ յայտնի ասմունքող՝ Տիկ. Սիլվա Կոմիկեան:

Սիլվա Կոմիկեան
Սիլվա Կոմիկեան

Ձեռնարկի բացումը կատարեց Միութեան ատենապետ պրն. Արթօ Խրիմեան, բարի գալուստ մաղթելով ներկաներուն եւ մանաւանդ Պոլսէն ժամանած թանկագին հիւրերուն: Ապա ներկայացուց օրուայ դասախօսը՝ Դոկտ. Հրանդ Մարգարեան: “Գիտնական, տարրաբան, թատերագիր, դերուսոյց, բանաստեղծ: Հիմնադիրներէն է Նիւ Եորքի Համազգայինին եւ հիմնադիրը Նիւ Եորքի Համազգայինի թատերախումբին“:

Արթօ Խրիմեան
Արթօ Խրիմեան

Դոկտ. Հրանդ Մարգարեան Լուսապատկերներով (power point) խօսեցաւ 35 վայրկեան միայն, անծանօթին ճանչցնելով Զահրատը, իսկ ծանօթներուն աւելի պայծառ պատկեր մը տալով Զահրատի գրականութեան մասին: Դասախօսը նշեց որ Զահրատ պարզ գրող մը չէ. անոր պարզունակ թուացող տողերուն ետին կայ փիլիսոփայութիւն կայ թագնուած մտքեր ու

Տիկ. Անայիս Եալտըզճեան
Տիկ. Անայիս Եալտըզճեան

խոր արտայայտութիւններ: Թէեւ զուարթախոհ է սակայն Զահրատ կատակաբան չէ, Comedian չէ, իր զուարթ թուացող տողերու ետին, երբեմն թախիծ. երբեմն յուսախաբութիւն եւ նոյնիսկ արցունք կարելի է զգալ կամ տեսնել: Ուրիշ տողերու ետին. քողարկուած քաղաքական ակնարկութիւններ կարելի է նշմարել: Մարգարեան շեշտեց որ Զահրատ նաեւ տիպարներ ունի ինչպէս օրինակ ամենէն համբաւաւորը՝ Կիկոն, Աբբաս, Խարալամպոս, Նորիկ եւայլն: Ճշմարիտ դաստիարակ՝ Մարգարեան կարգ մը բանաստեղծութիւններ պաստառին վրայ ցուցադրելով բացատրութիւններ կուտար ներկաներուն որոնք մեծ հաճոյքով կը հետեւէին եւ ինչպէս յետոյ ակնարկեցին՝ “ասիկա համալսարանական մակարդակի (աքատէմիք) դասախօսութիւն էր“: Մարգարեան բացատրեց նաեւ Զահրատի անուրանալի ազդեցութիւնը արդիականացնելու հայ բանաստեղծութիւնը: Աւարտելով իր խօսքը Մարգարեան յայտարարեց որ Զահրատի բանաստեղծութիւններէն 153 հատ անգլերէնի թարգմանած է եւ հրատարակած: Կապոյտ կողքով գրքի առաջին օրինակը որուն վրայ ճերմակ տառերով յստակ կը կարդացուէր ԶԱՀՐԱՏ 90, նուիրեց Զահրատի տիկնոջ Անայիսին, որ յուզուած ժպիտով եւ հպարտութեամբ ընդունեց զայն:

Դոկտ. Հրանդ Մարգարեան
Դոկտ. Հրանդ Մարգարեան

Ապա տիկ. Զուարթ Պալըքճեան ներկայացուց յայտագրի յաջորդ երկու մասնակցողներու կենսագրականները: Նախ՝ երգահան Պերճ Թիւրապեան որը իր յօրինած երաժշտութեամբ երգեց Զահրատի բանաստեղծութիւներէն: Ապա՝ Պոլսէն յատկապէս ժամանած Տիկ. Սիլվա Կոմիկեան որը ասմունքեց Զահրատի բանաստեղծութիւններէն: Պարզ ու տպաւորիչ էր: Ապրեցնելով ու ծանօթացնելով Զահրատի որոշ տիպարներ: Տիկ. Կոմիկեան չի չափազանցեր, դերասանական աւելորդ շեշտեր ու ձեւակերպութիւններ չունի, սովորական, “խօսելու պէս“ կ`ասմունքէ բայց “խօսածը“ մինչեւ սրտիդ խորը կը թափանցէ ու յարատեւ կ`արձագանգէ: Անմոռանալի վայելք էր իսկապէս:

Պերճ Թիւրապեան
Պերճ Թիւրապեան

Տիկ. Անայիս վերջին խօսողն էր: Իր “Սրտի Խօսք“ին մէջ նշեց իր գոհունակութիւնը Զահրատի 90ամեակի առթիւ կազմակերպուած այս հանդիսութեան եւ շնորհակալութիւն յայտնեց Էսայեան Կեդրոնական Սանուց Միութեան, ատենապետ՝ պրն. Արթօ Խրիմեանին, դասախօս՝ Դոկտ. Հրանդ Մարգարեանին, երաժիշտ՝ Պերճ Թիւրապեանին, եւ հրաշալի ասմունքող Տիկ. Սիլվա Կոմիկեանին:
Պրն. Արթօ Խրիմեանի փակման խօսքով յայտագիրը վերջ գտաւ, որուն յաջորդեց ճոխ հիւրասիրութիւնը:
Կազմակերպողներուն եւ մասնակցողներուն վարձքը կատար այս դաստիարակիչ ու հաճելի երեկոյին համար:

Ներկայ մը

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

Social profiles