ԱՐՑԱԽԻ ՄԷՋ ՑԵՂԱՍՊԱՆՈՒԹԻՒՆ ԳՈՐԾԵԼՈՒ ԱՏՐՊԷՅՃԱՆԱԿԱՆ ԾՐԱԳԻՐԸ ԹԱՓ ԿԸ ՍՏԱՆԱՅ

0 0
Read Time:2 Minute, 29 Second

Ա.Ա.

Բնական կազի մատակարարման խափանում, Արցախը Հայաստանի կապող միջանցքի փակում, Արցախի մէջ գտնուող Դռնբոնի եւ Կաշէնի հանքավայրերու փակման ատրպէյճանական պահանջ։ Տակաւին, արցախցիներու վրայ տարաբնոյթ ճնշումներ եւ հոգեբանական պատերազմ մը, որուն դիմանալու համար արցախցիներուն չի պակսիր կամքն ու վճռակամութիւնը։Սակայն պէտք է կարեւորութեամբ նշել, որ իրավիճակը՝ Սոչիի եռակողմ հանդիպումէն ետք, չափազանց լարուած է եւ արցախցիներուն կողմէ ահազանգուած այն վտանգը, թէ արցախահայութիւնը կը գտնուի ցեղասպանութեան մը սպառնալիքին տակ, շատ մտահոգիչ է։
Ատրպէյճանցիք դարձեալ դադրեցուցին կապոյտ վառելիքին մատակարարումը Արցախի ազատ շրջաններ, ուր բնակչութիւնը ձմեռնային խիստ պայմաններու մէջ կը դիմագրաւէ ապրուստի տարրական պէտքերու օրէ օր նուազեցման վտանգը, որովհետեւ «բնապահպանական մտահոգութիւններ» ունեցող ատրպէյճանցիներ փակած են Արցախը Հայաստանի կապող Լաչինի միջանցքը՝ առաջին հերթին ասպարէզ կարդալով ռուսական խաղաղապահ ուժերուն։ Բնապահպանման համար միջանցքը փակողներուն շարքին մէջ էին նաեւ թրքական ահաբեկչական կազմակերպութեան՝ Գորշ Գայլերու հետեւորդներ, որոնցմէ մին կազմակերպութեան յատուկ նշանաձեւը կատարելով դէմ դրաւ ռուս խաղաղապահներու։ Այս ատրպէյճանցիին արարքը ցուցանիշ մըն է, թէ բնապահպանները խորքին մէջ կը հետապնդեն Արցախի ազատ շրջաններու քաջարի բնակչութիւնը մեկուսացնելու եւ շրջափակելու ծրագիրը, որուն յաջորդ հանգրուանը, ինչպէս Հայաստանի վարչապետը ահազանգեց, ցեղասպանութեան ոճիրներ կրնան ըլլալ։
Ատրպէյճանի իշխանութիւններուն հրահանգով բնական կազի հոսքին դադրեցումը որ անկասկած մարդասիրական եւ տնտեսական ահաբեկչութիւն մըն է, ճիշդ է, որ արցախցիները կը մատնէ չափազանց ծանր կացութեան մը, սակայն ի տես արցախահայութեան վճռակամութեան, ամբողջ հայութեան կը մնայ մէկդի դնել ներքին բոլոր տեսակի տարակարծութիւնները եւ անհասկացողութիւնները եւ իբրեւ մէկ բռունցք ներկայանալ ու լարել ամբողջ ուժը, որպէսզի միջազգային ընտանիքը խօսքէն, դատապարտանքի սին բանաձեւերէն եւ քարոզչական բնոյթի յայտարարութիւններէն անցնի գործի եւ Ատրպէյճանի իշխանութիւնները զսպէ՝ արցախահայութիւնը փրկելով ցեղասպանութենէ մը։
Իսկ ինչ կը վերաբերի Դռնբոնի եւ Կաշենի հանքավայրերուն գործունէութեան դադրեցման պահանջով Լաչինի միջանցքը փակող ատրպէյճանցի «բնապահպաններուն», ապա ատրպէյճանական անկախ սակաւաթիւ աղբիւրներ, որոնցմէ գլխաւորը Պերլինի մէջ գործող Մեյտան Թի Վի-ն է, հրապարակեցին բազմաթիւ ապացոյցներ, որոնք կը փաստեն, որ բնապահպանական խնդիրներով տագնապող ատրպէյճանցի ցուցարարները խորքին մէջ Ալիեւի ընտանիքին համակրող մարդիկ են,որոնք ոչ մէկ առնչութիւն ունին բնապահպանական խնդիրներու հետ։ Անոնցմէ ոչ ոք օրինակի համար մինչեւ այսօր նկատողութիւն մը, կամ ֆէյսպուքեան գրառում մը կատարած է Ատրպէյճանի մէջ գտնուող Տաշքեսանի եւ Գետաբէկի հանքավայրերուն պատճառած բնապահպանական աղէտին մասին։Երկու հանքավայրներն ալ Ալիեւ ընտանիքին կը պատկանին։Իսկ այլախոհ լրագրողներ կը յիշեցնեն Չովտարի հանքավայրը, որուն շուրջ բացուած հետաքննութիւնները՝ անկախ լրագրողներու կողմէ, բացայայտած էր փտածութեան եւ բնապահպանական ահաւոր խնդիրներ։Լաչինի միջանցքը փակող ատրպէյճանցի նորելուկ բնապահպանները օրին ոչ իսկ խօսած են Չովտարի հանքավայրին մասին։ Այլախոհ լրագրող Խատիճա Իսմայիլովա, որ քանի մը անգամ բանտարկուած է քաղաքական իր հայեացքներուն համար, կը յիշեցնէ, որ եթէ այդ օրերուն այս բնապահպանները իրենց բողոքը արտայայտէին, այսօր անոնց ձայնը իսկապէս լսելի կը դառնար։
Սակայն ատրպէյճանցի բնապահպաններուն ստացած հրահանգը բնութեան պահպանման, կամ Մարտակերտի շրջանին մէջ գտնուող Դրնբոնի եւ Կաշէնի հանքավայրերուն հետ գործ չունի։Ատրպէյճանցի բնապահպանները հլու հնազանդ կը կատարեն Պաքուի իշխանութիւններուն հրահանգը, որ կը վերաբերի ռուսական խաղաղապահ ուժերուն։ Պաքու ամէն միջոցի կը դիմէ, որպէսզի ռուսական խաղաղապահ ուժերը հեռացնէ Արցախէն։Ասիկա է ամբողջ խնդիրը։
Նման ահաւոր վիճակի մը մէջ իսկապէս ծիծաղելի պիտի ըլլայ հաւատք ընծայել եւ յոյս կապել մեղադրանքի եւ դատապարտանքի յայտարարութիւններուն, կամ դիտորդներ առաքելու եւրոպական քննարկումներուն։ Մեր յոյսը Երեւանի իշխանութիւններուն արտաքին քաղաքականութեան կանոններուն եւ թիրախներուն մէջ արմատական փոփոխութիւններն են, որոնց իւրաքանչիւր օր ուշացումը, արցախցիները ցեղասպանութեան վտանգին քիչ մը աւելի կը մօտեցնէ։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles