0
0
ԵՐԵՒԱՆ.- Արտագաղթի ուսումնասիրութեան յանձնաժողովը մինչեւ Յունուար 24, պիտի հրապարակէ իր ուսումնասիրութեան արդիւնքները: Հաւաստի տեղեկութիւններու համաձայն` նախնական տեղեկութիւններ արդէն կան եւ անոնք բաւական աղէտալի են:
Գաղթականութեան պետական ծառայութիւնը առաջարկած էր պիւտճէէն գումար յատկացնել` արտագաղթի պատճառները ուսումնասիրելու համար: Այս ուսումնասիրութիւնը Գիտութեան պետական կոմիտէն պատուիրած էր Հայ-ռուսական սլաւոնական համալսարանին: Վարչապետ Տիգրան Սարգսեանը խորհրդարանին մէջ արտագաղթի վերաբերեալ պատգամաւորներուն հարցումներուն պատասխանելով յայտնած էր, որ ուսումնասիրութիւն կը կատարուի արտագաղթի երեւոյթին պատճառները աւելի լաւ հասկնալու, շարժառիթները աւելի մանրակրկիտ գիտնալու համար, որպէսզի իրենց գործողութիւնները արդիւնաւէտ ըլլան:
Հայաստանի Գաղթականութեան ծառայութեան ղեկավար Գագիկ Եգանեանը, որ նաեւ կը մասնակցի ուսումնասիրական աշխատանքներուն, Յունուար 15-ին յայտնած է, որ “Արտագաղթի հոսքերի վերաբերեալ ընտրանքային հետազօտութեան“ արդիւնքները, ըստ պայմանագիրին, պէտք է պատրաստ ըլլան Յունուար 24-ին: Ան չէ ուզած թիւեր հրապարակել` խորհուրդ տալով սպասել ուսումնասիրութեան հրապարակման: “Մեր տեղեկութիւններով, հարցուածների 80 եւ աւելի տոկոսը արտագաղթը կապել են սոցիալ-տնտեսական, մեղմ ասած, վատ պայմանների, աշխատատեղերի բացակայութեան հետ“, գրած է “Հայկական Ժամանակ“ը:
