ԱՅՍ ԱՆԳԱՄ ԹՈՒՐՔԻՈՅ ԼՐԱՏՈՒԱԿԱՆ ՄԵՔԵՆԱՆ ՀԱԼԱԾԱՆՔԻ ԱՌԱՐԿԱՅ

0 0
Read Time:1 Minute, 54 Second

P1 KHEMP3

ՀԱՅՐԵՆԻՔ
Խմբագրական
Դեկտեմբեր 16, 2014

Երբ արիւնարբու Ճեմալ փաշայի թոռը` հանրածանօթ լրագրող Հասան Ճեմալը Երեւանի մէջ հայերէնի թարգմանուած, Հայոց Ցեղասպանութեան մասին, իր գիրքը կը ներկայացնէր եւ այդ գծով ներում հայցելու, փոխհատուցում կատարելու, նաեւ պատմութեան դասագրքերը վերաշարադրելու մասին կ՛արտայայտուէր, անդին Պոլսոյ մէջ այլ բաներ կը պատահէին քարոզչական-լրագրական բնագաւառէն ներս, որ վստահաբար նոյնքան կրնայ մտահոգել նոյնինքն Հասան Ճեմալը:
Այս անգամ Էրտողանի վարչամեքենան, հարուածեց իր ոխերիմ թշնամիին՝ Ֆեթհուլա Կիւլէնի քարոզչական կառոյցը: Կառոյց մը, յանձին իր մամուլին՝ «Զաման»ին եւ հեռատեսիլի կայանին՝ «Սամանիոլու»ին (աւելի ծանօթ STV անունով) մեծ ժողովրդավարութիւն կը վայելէ, շարունակ վեր առնելով Էրտողանի հովանաւորած Արդարութիւն եւ Բարգաւաճում Կուսակցութեան կատարած զեղծարարութիւններն ու այդ գծով, յատկապէս Պոլսոյ մէջ տիրող փտածութիւնը:
Տարիներէ ի վեր Փենսիլվանիա ապաստանած այս այլախոհ պահպանողական գաղափարներու տէր կրօնականը կը շարունակէ զայրացնել Էրտողանը, որ Կիւլէնի հոսանքին պատկանող լրագրողները ձերբակալելով, կը հաստատէ թէ անոնք կարմիր գիծէն անդին սկսած էին յառաջանալ: Աւելին, Էրտողանի կամակատար՝ վարչապետ Ահմէտ Տաւութօղլուն, յանդգնած էր ներկայացնելու այնպիսի կացութիւն մը, ուր այս «դաւադիր» լրագրողները ստեղծած էին պետութեան մէջ, այլ պետութիւն մը ստեղծելու իրավիճակը:
«Զաման»ի խմբագիր Էքրէմ Տումանլի որ հետապնդուողներու շարքին է, ահազանգ կը հնչեցնէ եւ հարցադրումի տակ կ՛առնէ ընդհանրապէս երկրէն ներս չտիրող ժողովրդավարութիւնը: Անոր համար հարցը Կիւլէն ընդդէմ Էրտողան չէ, այլ շատ աւելի համընդհանուր, ուր շարունակ ճնշումի տակ է Թուրքիոյ մետիան: Առ այդ, անոր համար սեւ օր մը արձանագրուեցաւ Թուրքիոյ մամլոյ պատմութեան մէջ, կատարուած այդ ոտնձգութիւններով:
Դեռ քանի մը ամիս առաջ, Էրտողան փորձած էր այլ համացանցային կառոյցներ եւ անզսպելի ընկերային ցանցեր չէզոքացնել, պատճառաբանելով թէ, անոնք իրենց սուտ տեղեկութիւններով կ՛անհանգստացնէին զինք:
Հակառակ այս կատարուած կաշկանդումներուն, աւելի գործի լծուած է յատկապէս Կիւլէնի քարոզչական մեքենան եւ ընդհանրապէս ընդդիմադիր ճակատը, որ անշուշտ երբեք չբաժներ Փենսիլվանիոյ այլախոհին պահպանողական եւ հնամաշ գաղափարները:
Արեւմուտքը անդրադառնալով կատարուածին, արդէն իսկ յոյս յայտնած է որ արդար քննութիւն տեղի կ՛ունենայ եւ թէ այս գործողութիւնները, երբեք պէտք չէ որ խախտեն ժողովրդավարութեան հիմքերը:
Աւելին, Էրտողանի Աքիլլէսի կրունկի՝ ընկերային ցանցերէն ներս, սկսած են շրջիլ զինք նսեմացնող իրականութիւններ, որոնց կարգին յատկապէս իր գերսահմանափակ անգլերէն լեզուին վրայ տիրապետելն ու տեղի եւ անտեղի առիթներով բառեր գործածելը, եւ կամ այն մէկ արտայայտութիւնը, ուր ան կոչ կ՛ուղղէր որ գինիի փոխարէն, թուրքը պէտք է որ գործածէ աւելի սննդարար խաղողը:
Հակառակ այս բոլորին, Էրտողանի համար պարտք եւ պարտականութիւն է պաշտպանել այն, ինչ որ տրուած է ժողովուրդին կամքով:
Թէ ո՞րն է ժողովուրդին կամքը: Հաւանաբար, այս մէկը շատ ամբողջական ձեւով կրնայ բացատրել եւ բացայայտել Հասան Ճեմալը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles