Ամերիկայի Հայ Աւետարանչական Ընկերակցութիւնը Հայաստանի Եւ Արցախի Երեխաներուն Կը Սփռէ Սուրբ Ծնունդը

0 0
Read Time:1 Minute, 57 Second

Փըրէմըս (Նիւ Ճըրզի).- Ամերիկայի Հայ Աւետարանչական Ընկերակցութիւնը եւ Հայաստանեաց Աւետարանական Եկեղեցին այս տարի եւս կազմակերպեցին Սուրբ Ծննդեան յատուկ 45 միջոցառումներ Հայաստանի եւ Արցախի 30 տարբեր քաղաքներու եւ գիւղերու մէջ։ Միջոցառումներու առաջնահերթ նպատակն էր Յիսուս Քրիստոսի Սուրբ Ծննդեան պատգամը հաղորդել հանդիսատեսին ներկայացումներու, տօնական հանդիսութիւններու, խօսքի եւ երաժշտութեան միջոցով։ Ձեռնարկներուն մասնակցեցան 9000-էն աւելի հովանաւորուած երեխաներ, Կիրակնօրեայ դպրոցի եւ Աւետիսեան դպրոցի սաներ, եւ Ամերիկայի Հայ Աւետարանչական Ընկերակցութեան ընկերային կեդրոններու եւ գեղարուեստի խումբերու մասնակից երեխաներ իրենց ծնողերուն ընկերակցութեամբ։ Արցախի տարբեր քաղաքներու եւ գիւղերու միջոցառումներուն մասնակից 1500-է աւելի երեխաներու մեծամասնութիւնը զոհուած ազատամարտիկներու եւ կարիքաւոր ընտանիքներու երեխաներ էին։ Միջոցառումներու աւարտին իւրաքանչիւր երեխայ ստացաւ Սուրբ Ծնունդի նուէրի արկղ մը լեցուն դպրոցական իրերերով, ձեռնոցներով, գուլպաներով, քաղցրավենիքով եւ այլեւայլ խաղալիքներով։

 

 

 

 

 

 

Սուրբ Ծնունդի հաւաքներուն գլխաւորը Երեւանի Ամերիկայի Հայ Աւետարանչական Ընկերակցութեան կեդրոնին մէջ տեղի ունեցաւ Յունուարի 10-ին եւ 11-ին, որու ներկայ գտնուեցան աւելի քան 1500 երեխաներ իրենց ծնողներուն ընկերակցութեամբ։
Հինգ յաջորդական հանդիսութիւններով Ամերիկայի Հայ Աւետարանչական Ընկերակցութեան «Հայասա» Թատերախումբը՝ Նունէ Աբրահամեանի բեմադրութեամբ ներկայացուց գեղեցիկ եւ հետաքրքիր թատրերգութիւն մը «Երջանկութեան Գաղտնիքը» խորագրով՝ փոխանցելով Սուրբ Ծնունդի բարի լուրը բոլոր ներկաներուն։
Այս տարի Սուրբ Ծննդեան լրացուցիչ միջոցառումներուվ եւ բարեմաղթանքներով այցելութիւններ կատարուեցան նաեւ սամանամերձ Տաւուշի մարզի ինը գիւղերուն։ Յատուկ ծրագրով հաւաքներ կազմակերպուեցան եւ նուէրներ բաժնուեցան նաեւ Իջեւանի Սոս մանկական գիւղի 72 ծնողազուրկ երեխաներուն։ Նոյնպէս այցելութիւն տրուեցաւ Սպիտակ քաղաքի բժշկական վերականգնումի կեդրոնը, ուր կը բուժուին ինքնափակութենէ (autism) տառապող երեսուն երեխայ։ Սուրբ Ծննդեան նուէրները մեծ ուրախութիւն պարգեւեցին անոնց, զգալով որ իրենք առանձին ու լքուած չեն։ Իսկ Գեղարքունիքի մարզի խիստ կարիքաւոր Մարտունի գիւղին մէջ, ուր կ՚ապրին 1915-ի ջարդէն մազապուրծ եղած հայերու ժառանգորդները, կազմակերպուած Սուրբ Ծնունդի նուիրուած հանդիսութեան արձագանքը շատ մեծ էր, քանի որ գիւղին մէջ առաջին անգամ ըլլալով նմանատիպ մեծ միջոցառում մը տեղի կ՚՚ունենար:

Բոլոր երեխաները կը սիրեն նուէրներ ստանալ, յատկապէս երբ այդ նուէրները տարուէ տարի կը դառնան առաւել եւս հետաքրքիր ու գրաւիչ։ Յանուն Ամերիկայի Հայ Աւետարանչական Ընկերակցութեան եւ հազարաւոր մանուկներու որոնք մասնակցեցան այս տօնակատարութիւններուն, շնորհակալութեան խօսք ունինք բոլոր անոնց, որոնք նիւթապէս եւ իրենց աղօթքներով մասնակցեցան այս Ծնունդի ծրագիրներուն։ Նէլսըն Ռանտօլֆ եւ Էլ Ճիպիլեան, անգամ մը եւս համագործակցեցան այս նուէրները հաւաքելու եւ Միացեալ Նահանգներէն Հայաստան առաքելու աշխատանքին։ Անոնք այս տարի եւս կամաւորներու հետ միատեղ Հայաստան մեկնեցան անձնապէս մասնակից դառնալու նուէրներու փաթեթաւորման աշխատանքներուն Ամերիկայի Հայ Աւետարանչական Ընկերակցութեան Երեւանի կեդրոնէն 35 այլ կամաւորներու կողքին։ Վերջին տարիներու անոնց համագործակցական աշխատանքներուն շնորհիւ Ամերիկայի Հայ Աւետարանչական Ընկերակցութեան Հայաստանի եւ Արցախի մէջ իրագործուող Ծնունդի ծրագիրները աւելի զարգացած են եւ կը շարունակեն ծաւալիլ։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles